ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵕⴰⵙ 13 ⵢⵓⵍⵢⵓⵣ 2022 ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⵢⴰⵜ ⵜⵉⵏⴰⵡⵜ ⵜⴰⵏⵖⵎⴰⵙⵜ ⵉⵙⵎⵏⵉⴷ ⴳⵉⵙ ⵉⵎⵙⴳⵔⴰⵏ ⵉⵎⵣⵡⵓⵔⴰ ⵏ ⵜⵙⵇⵇⵉⵎⵜ ⵏ ⵓⵙⴰⴳⴳⵯ ⵏ ⵓⵙⴽⵓ ⵏ ⵉⵎⵊⵕⵉⵜⵏ ⵏⵏⴰ ⵉⵜⵜⵡⴰⵙⵏⴰⵢⵏ ⴹⴰⵕⴰⵜ ⵉⵎⵊⵕⵉ ⵏ ⵜⴽⵏⵙⴰ ⴷ ⵜⴽⵕⴹⵉ ⵉⵎⵙⴰⵔⵏⵏ ⴳ ⵓⵙⴰⴽⴰ ⵏ ⵏⵏⴰⴹⵓⵕ-ⵎⵍⵉⵍⵢⴰ ⵜⵉⴼⴰⵡⵜ ⵏ ⵓⵙⵉⵎⵡⴰⵙ 2022. ⴳ ⵜⴳⵓⵔⵉ ⵏⵏⵙ ⴳ ⵓⵙⵎⵏⵉⴷ ⵏ ⵉⵎⵙⴳⵔⴰⵏ ⵏ ⵜⵙⵇⵇⵉⵎⵜ, ⵜⵙⵎⴰⵢⵏⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴰⵡⵏⵏⵉ ⵅⴼ ⵓⵖⵉⵍⵓⴼ ⴰⵏⵖⴱⵓ ⵏ ⵓⵙⵇⵇⵉⵎ ⵅⴼ ⵜⵎⵏⵜⵉⵍⵜ ⵏ ⵉⵎⴰⵍⴰⴷⵏ ⴳ ⵢⵉⵎⴰⵏⵏ ⴷ ⵉⵜⵡⴰⵖⵏ ⵜⵜⵓⵣⵎⵎⴻⵎⵏⵉⵏ ⵉⴷⴷⵖ ⵓⵔⵎⵏ ⵉⴼⴹⵏ ⵏ ⵉⵎⵣⵡⴰⴳⵏ ⴰⵣⵔⴰⵢ ⴰⵎⴳⵔⵓ ⵙⴳ ⵓⴳⵍⵍⴰⵢ ⵏ ⵡⵓⵣⵣⴰⵍ ⵏⵏⴰ ⵜⵙⵏⵓⵎⵎⵍ ⵙ ⵉⵎⵊⵕⵉ ⵏ ⵜⴽⵏⵙⴰ ⵓⵔ ⵉⵍⵉⵏ ⴰⵏⴰⵡ, ⵍⴰ ⵖ ⵜⵡⵉⵍⴰ ⵏⵏⵙ ⵡⴰⵍⴰ ⵖ ⵜⵎⴰⵎⴽⵜ ⵉⵜⵜⵓⵙⵖⵣⵏⵏ ⵡⴰⵍⴰ ⴰⵙⴰⵢⵔⴰⵔ ⵏⵏⵙ ⴷ ⵡⵓⵟⵟⵓⵏ ⵏ ⵉⵎⵣⵡⴰⴳⵏ ⵏⵏⴰ ⴳⵉⵙ ⵉⴷⵔⵓⵏ ⴷ ⵓⵍⴰ ⵓⵟⵟⵓⵏ ⵏ ⵓⵏⴳⵉⵙⵏ ⴷ ⵉⵜⵡⴰⵖⵏ, ⵜⵙⵎⴰⵢⵏⵓ ⵙ ⵜⵎⵍⴷⴰ ⴰⴷ ⴰⴼⵛⴰⴷ ⵏⵏⵙ ⵉⵔⵖⴰⵏ ⵉ ⵜⵡⵊⵉⵡⵉⵏ ⵉⵎⵣⵡⴰⴳⵏ ⵎⵎⵓⵜⵏⵉⵏ. ⴰⵎⵓⵏ ⴳ ⵜⵏⵜⴰⵎⵜ ⴰⴷ ⵚⴹⵉⵚ ⴷ ⵎⵔⴰⵡ (16) ⵏ ⵉⵎⵙⴳⵔⴰⵏ ⵉⵎⵣⵡⵓⵔⴰ, ⴳⴰⵏⵉⵏ ⵜⴰⵎⵖⵓⵏⵜ ⵏ ⵜⵎⵓⵛⴰ ⵏⵏⴰ ⵉⵜⵜⵓⵙⵎⵓⵏⵏ ⴷ ⵉⵏⴰⴳⴰⵏ ⵏⵏⴰ ⵙ ⵉⵜⵜⵓⵙⵙⴼⵍⴷ ⵅⴼ ⵜⴱⵔⵉⴷⵜ ⵏ ⵓⵖⵍⵓⵢ ⵏ ⵉⵎⵣⵡⴰⴳⵏ ⴰⴳⵍⵍⴰⵢ ⵏ ⵡⵓⵣⵣⴰⵍ ⵉⵏⴳⵔ ⵏⵏⴰⴹⵓⵕ ⴷ ⵎⵍⵉⵍⵢⴰ, ⵙⴳⵉⵙⵏ ⵎⴰⵙ ⵉⵍⴽⵎ ⵓⵟⵟⵓⵏ ⵏ ⵜⵎⵜⵜⴰⵏⵉⵏ ⴳ ⵉⵎⵏⴰⵍⴰⵜⵏ ⴰⴷ 23 ⵏ ⵜⵎⵜⵜⴰⵏⵜ, ⵢⴰⵡⴹ ⵓⵟⵟⵓⵏ ⵏ ⵉⵎⵜⵡⴰⵖⵏ 217 ⵏ ⵓⴳⴳⵉⴷⵏ, ⵙⴳⵉⵙⵏ 140 ⵙⴳ ⵉⴼⵔⴷⵉⵙⵏ ⵏ ⵜⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ ⴷ 77 ⵙⴳ ⵉⵎⵣⵡⴰⴳⵏ. ⴰⵔ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⴷ ⴷⴷⴰⵏ ⵡⴰⴷⴷⴰⴷⵏ ⵏ ⵜⵎⵜⵜⴰⵏⵜ ⵜⵜⵓⵣⵎⵎⴻⵎⵏⵉⵏ, ⵙ ⵓⵎⵙⴰⵙⴰ ⴰⴽⴷ ⵓⵣⵣⵔⴰⵢ ⴰⵎⵙⵏⵉⵊⵊⵉ ⵉ ⵜⴼⴽⴽⵉⵡⵉⵏ ⵏ ⵓⵏⴳⵉⵙⵏ, ⵙⴳ ⵓⵖⵓⴼⵓ ⴰⵎⵉⴽⴰⵏⵉⴽⵉ (Asphyxie Mécanique) ⴷ ⵓⴷⵃⵃⵓⵢ ⴷ ⵓⴽⵯⵎⴰⵔ ⴷ ⵜⴹⵓⵕⵉ ⵙⴳ ⵉⴳⴳⵉ ⵏ ⵓⵖⵔⴰⴱ ⵏ ⵓⴳⵍⵍⴰⵢ ⴷ ⵓⵏⵢⴰⵎⴰ ⵏ ⵓⵙⴰⵢⵔⴰⵔ ⴷ ⵓⴳⵓⴷⵉⵢ ⵏ ⵓⵟⵟⵓⵏ ⵉⴳⴳⵓⵜⵏ ⵏ ⵉⵎⵣⵡⴰⴳⵏ ⴳ ⵓⵙⴰⵔⴰⴳ ⵉⵏⵢⴰⵎⴰⵏ ⵏ ⵓⵙⴰⴽⴰ ⵏⵏⴰ ⵎⵉ ⵔⴳⵍⵏⵜ ⵜⴳⴳⵓⵔⵉⵏ ⵏⵏⵙ ⵎⵍⵉⵃ. ⵉⴳ ⵓⵙⵎⵎⵉⵍⵉ ⴰⵎⵙⵏⵉⵊⵊⵉ ⴰⴱⵔⵉⴷ ⴰⵎⵢⵉⵡⵏ ⵉ ⵓⵙⵡⵓⵜⵜⵓ ⵏ ⵜⵎⵏⵜⵉⵍⵉⵏ ⵏ ⵜⵎⵜⵜⴰⵏⵜ ⵏ ⴽⵓ ⴰⴷⴷⴰⴷ ⵡⴰⵃⴷⴰⵜ. ⵉⵙⴷⴷⵉⴷ ⵓⵙⵇⵇⵉⵎ ⵎⴰⵙ ⵓⵔ ⵉⵜⵜⵡⴰⵎⴹⴰⵍ ⴰⵡⴷ ⵢⴰⵏ ⵓⵎⵜⵜⵉⵏ ⵙⴳ ⵉⵎⵣⵡⴰⴳⵏ ⵎⵎⵓⵜⵏⵉⵏ ⴳ ⵓⵙⵙⴽⵍⴻⵍ ⵏ ⵓⴳⵍⵍⴰⵢ, ⵉⵜⵜⵓⵙⴷⴷⵉⴷ ⵙⴳ ⵓⵟⵟⵓⵏ ⵏ ⵜⴼⴽⴽⵉⵡⵉⵏ ⴳ ⵓⵔⵣⴰⴼ ⵏⵏⵙ ⵉ ⵓⵃⴰⵏⵓ ⵏ ⵉⵎⵜⵜⵉⵏⵏ ⴷ ⵎⴰⵙ ⵜⴹⴼⵓⵕ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵓⵙⵇⵇⵉⵎ ⵉⵎⴰⵢⵏⵓⵜⵏ ⵏ ⵓⵙⵎⵎⵉⵍⵉ ⴰⵎⵙⵏⵉⵊⵊⵉ ⴷ ⵉⵙⴼⵙⵉⵜⵏ ⵏ ⵓⵙⵎⵎⵉⵎ ⴰⵎⵖⵢⴰⵢ (ADN). ⵜⵏⵏⵉⵡⵍ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵅⴼ ⵓⵙⵙⴰⵎⵓ ⵏ ⵜⵡⵍⴰⴼⵉⵏ ⴷ ⵜⵥⵕⵉⴳⵉⵏ ⵏ ⵓⵙⵃⵉⵍⵍⴻⵍ ⴳ ⵡⴰⵙⵉⵜⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⵏⵏⴰ ⵓⵔ ⴷⴰⵔ ⴰⵎⵢⴰⵙⵙⴰ ⵙ ⵉⵎⵏⴰⵍⴰⵜⵏ, ⴰⵢⵏⵏⴰ ⴷ ⵢⵓⴷⵊⴰⵏ ⴰⵔⴰⵜⴰⵢ ⴰⵏⵖⴱⵓ ⵖ ⴷⴰⵔ ⵓⵎⵏⴰⴷ ⴰⵎⴰⵜⴰⵢ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⵅⴼ ⵉⴱⵔⵔⵉⵡⵏ ⵏ ⵓⵙⵎⵔⵙ ⵏ ⵓⵇⵕⵟⴰⵚ ⴷ ⵓⵍⵎⴰⴹ ⵏ ⵓⵏⵀⵍⵍⴰ ⴰⵎⵙⵏⵉⵊⵊⵉ. ⵙ ⵓⵖⵓⵍ ⵙ ⵉⵎⵊⵕⵉⵜⵏ ⴷ ⵉⵎⵙⴳⵔⴰⵏ ⵏⵏⴰ ⵙ ⵜⵙⵢⴰⴼⴰ ⵜⵙⵇⵇⵉⵎⵜ ⴷ ⵉⵏⵎⵓⵇⵇⴰⵔⵏ ⵏⵏⴰ ⵜⴳⴰ, ⴰⵎⵓⵏⵜ ⴳ ⵉⵎⵙⴳⵔⴰⵏ ⵉⵎⵣⵡⵓⵔⴰ ⴽⵕⴰⴹ ⴷ ⵎⵔⴰⵡ (13) ⵏ ⵜⵙⵓⵎⴰⵔ ⵜⵉⵎⵣⵡⵓⵔⴰ, ⵉⵙⴷⴷⵉⴷ ⴳⵉⵙⵏⵜ ⵓⵙⵇⵇⵉⵎ ⵅⴼ ⵡⴰⴷⴷⵓⵔ ⵏ ⵜⵖⴱⵉ ⵏ ⵓⵔⵣⵣⵓ ⴰⵏⵣⵔⴰⴼ ⴰⴼⴰⴷ ⴰⴷ ⵉⵙⵙⴰⵎⵓ ⵜⵉⵙⴳⴳⵯⵉⵏ ⵇⴰⵃ ⵏ ⵉⵎⵏⴰⵍⴰⵜⵏ ⴷ ⵜⵙⴽⵯⴼⵍⵜ ⵏ ⵓⵎⵙⴰⵙⴰ ⵏ ⵓⵙⵎⵔⵙ ⵏ ⵜⴽⵕⴹⵉ ⴷ ⵓⵙⵎⵏⵉⴷ ⵏ ⵜⵢⴰⴼⵓⵜⵉⵏ ⵏ ⵉⵔⵣⵣⵓⵜⵏ ⵉ ⵓⵎⵏⴰⴷ ⴰⵎⴰⵜⴰⵢ ⴷ ⵓⵙⵡⵓⵜⵜⵓ ⵏ ⵜⵎⵙⵜⴳⴳⴰⵔⵉⵏ. ⵉⵖⵔ ⵓⵙⵇⵇⵉⵎ ⴰⵡⴷ ⵙ ⵓⵙⴷⵓⵙ ⵏ ⵓⵥⵟⵟⴰ ⵏ ⵓⵙⵡⵓⴷⴷⵓ ⵏ ⵓⵃⵟⵟⵓ ⵏ ⵓⵏⴳⵔⴰⵡ ⴰⵎⴰⵜⴰⵢ ⴳ ⵜⵙⴳⴰ ⵏ ⵓⴳⵍⵍⴰⵢ ⴷ ⵓⴹⴰⴽⴰⵍ ⵏ ⵜⵏⴼⵔⵓⵜ ⵏ ⵓⴳⴳⵉⴷⵏ, ⵉⵣⵎⵎⴻⵎ ⵎⴰⵙ ⵓⵔ ⴷⴰ ⵜⵜⴰⵡⵉ ⵜⵎⵢⴰⴷⴰⵙⵜ ⵏ ⵜⵎⵓⵏⵉ ⵏ ⵓⵕⵓⴱⴱⴰ, ⵙ ⵓⵥⵍⴰⵢ, ⴳ ⵢⵉⴳⵔ ⵏ ⵜⵎⵣⵡⴰⴳⵜ, ⵏⵏⴰ ⵢⵓⴷⴰⵏ ⵙ ⵜⵔⴳⵍⴰ ⵏ ⵉⵡⵜⵜⴰ ⵏⵏⵙⵏ ⴷ ⵓⵙⵔⵇⴱ ⵅⴼ ⵓⵙⵡⵓⴷⴷⵓ ⵏ ⵓⴱⵥⵥⵄ ⵏ ⵉⵎⵣⵡⴰⴳⵏ ⵣⵖ ⵉⵡⴰⵏⴽⵏ ⵏ ⵓⵏⵎⵉⵍⴰ, (ⵓⵔ ⴷⴰ ⵜⵜⴰⵡⵉ) ⵅⵙ ⵙ ⵜⵡⴰⵖⵉⵜⵉⵏ ⴷ ⵉⵙⵏⵜⵔⵏ. ⵎⴽⴷⴰ ⵉⵙⴰⵡⵍ ⵓⵙⵇⵇⵉⵎ ⴳ ⵓⵎⵏⴰⴹ ⴰⴷ ⵅⴼ ⵓⵏⴷⴰⵎ ⵏⵏⵙ ⵉ ⵓⵙⵡⵓⴷⴷⵓ ⴰⵏⴼⵔⵓ ⴰⵎⵥⵍⵉ ⵉ ⵜⵎⵣⵡⴰⴳⵜ ⵏⵏⴰ ⵜⵜⴳⴳⴰⵏ ⵉⵡⴰⵏⴽⵏ ⵏ ⵓⵕⵓⴱⴱⴰ, ⵍⵓⵎⴰⵕ ⵉ ⵉⵎⵣⵡⴰⴳⵏ ⵏ ⵜⵙⴳⴰ ⵏ ⵓⴳⵎⵎⵓⴹ ⴰⵏⴰⵎⵎⴰⵙ ⴷ ⵉⴼⵔⵉⵇⵢⴰ, ⵎⵇⵇⴰⵔ ⵉⵍⵍⴰ ⵓⵎⵙⴰⵙⴰ ⵏ ⵇⴰⵃ ⵎⴰⵙ ⵉⴳⴰ ⵉⴳⵉ ⴷ ⵜⵖⵜⴰⵙⵜ ⵜⴰⵏⴼⴳⴰⵏⵜ, ⵉⵍⵍⴰ ⵅⴼ ⵜⵏⴱⴰⴹⵉⵏ ⴰⴷ ⵓⵔ ⵜ ⵜⵙⵔⵙⵏⵜ ⵉⵏⴳⵔ ⵉⴼⴰⵙⵙⵏ ⵏ ⵉⵥⵟⵟⴰⵜⵏ ⵏ ⵜⵙⴱⴱⴰⴱⵜ ⴳ ⵉⵡⴷⴰⵏ. ⵉⵙⵙⴽⵕⵥ ⵓⵙⵇⵇⵉⵎ ⴳ ⵜⴳⵉⵔⴰ ⵏ ⵜⵙⵓⵎⴰⵔ ⵏⵏⵙ ⵅⴼ ⵓⵙⵓⵖⵏ ⵏ ⵓⵡⵇⵇⵔ ⵏ ⵉⵎⵏⵣⴰⵢⵏ ⵏ ⵓⵙⵓⵖⵏ ⴷ ⵓⵎⵙⴰⵙⴰ, ⵎⴽⵏⵏⴰ ⴰⴽⴽⵯ ⴳⴰⵏⵜ ⵜⵎⵙⴰⵔⵉⵏ ⵉ ⵓⴼⵔⴰⴳ ⵏ ⵜⵏⴼⵔⵓⵜ ⵜⴰⴽⵎⴰⵎⵜ. ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵎⵙⴰⵙⴰ ⵓⵙⵏⴰⵢ ⵏ “ⵜⵙⵇⵇⵉⵎⵜ ⵏ ⵓⵙⴰⴳⴳⵯ ⵉ ⵓⵙⴽⵓ ⵏ ⵉⵎⵊⵕⵉⵜⵏ”, ⵏⵏⴰ ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ 27 ⵢⵓⵏⵢⵓ 2022, ⴰⴽⴷ ⵉⵏⴰⵡⴰⵢⵏ ⵏ ⵜⵥⵍⴰⵢⵜ ⴷ ⵜⵎⵓⵣⴰⵢⵜ ⴳ ⵓⵙⴷⴰⵡ ⵏ ⵜⵎⵣⵡⴰⴳⵜ. ⵙⴷⵓⵙⵏ ⵉⵎⴰⵡⴰⵢⵏ ⴰⴷ ⴽⵉⴳⴰⵏ ⵉⴳⵉ ⵏ ⵓⵎⴷⴰⵢ ⴰⵎⵙⵖⴰⵔⵓ ⴷ ⵓⵣⵣⵓⵍⴰⵏ ⵉ ⵎⴰⴷ ⵉⵊⵕⴰⵏ ⴷ ⵓⵙⴷⴷⵉⴷ ⵏ ⵜⵎⵓⵛⴰ ⵏⵏⴰ ⴼⵍⵍⴰⵙ ⵉⵜⵜⵓⵣⵓⵣⵣⵔⵏ. ⴰⵎⵓⵏ ⴳ ⵜⵙⵇⵇⵉⵎⵜ ⵏ ⵓⵙⴰⴳⴳⵯ, ⵎⴰⵙⵙⴰ ⴷ ⵉⴷ ⵎⴰⵙⵙ : ⵎⵓⵃⵎⵎⴰⴷ ⵍⵄⵎⴰⵔⵜⵉ, ⴰⵎⵣⴷⴰⵢ ⵏ ⵜⵙⵇⵇⵉⵎⵜ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵓⴳⵎⵎⵓⴹ; ⵎⵓⵃⵎⵎⴰⴷ ⵛⴰⵔⴼ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⵜ; ⵄⴱⴷ ⵕⵕⴰⴼⵉⵄ ⵃⵉⵎⴹⵉ, ⴰⵏⵎⵀⴰⵍ ⵏ ⵓⵎⴷⴰⵢ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵇⵇⵉⵎ; ⴷⴷⵓⴽⵜⵓⵔ ⵄⴰⴷⵉⵍ ⵙⵙⵃⵉⵎⵉ, ⴰⵎⵙⴳⵏⴰⴼ, ⴰⴳⵎⴰⵎ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵓⴳⵎⵎⵓⴹ; ⵎⴰⵍⵉⴽⴰ ⵍⴽⵉⵃⵍ ⴷⴷⴰⵡⴷⵉ, ⵜⴰⴳⵎⴰⵎⵜ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵓⴳⵎⵎⵓⴹ.