ⵔⴰⴷ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ/ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵙ ⵓⵎⵢⴰⵡⴰⵙ ⴰⴽⴷ ⵜⵙⵇⵇⵉⵎⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⴼⴼⵓⵙ ⵏ ⵉⴼⵔⵉⵇⵢⴰ, ⵢⴰⵏ ⵓⴱⵔⴳⵔⴰⵡ ⴰⴳⵔⴰⵖⵍⴰⵏ ⵅⴼ ⵓⵙⵏⵜⵍ: “ⵜⵉⵎⵙⴽⵔⵉⵏ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵉⴼⵔⵉⵇⵉⵢⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ: ⵉⵏⴰⵥⴰⵕⵏ ⴷ ⵉⵣⵎⴰⵣ ⵉⵎⴰⵢⵏⵜⵏ”, ⵓⵙⵙⴰⵏ ⵏ 23 ⴷ 24 ⵢⵓⵏⵢⵓ 2023 ⵙⴳ ⵜⵙⵔⴰⴳⵜ ⵜⵉⵙ ⵜⴰⵎⵜ ⴷ ⵓⵣⴳⵏ ⵏ ⵜⵉⴼⴰⵡⵜ (08:30) ⴳ ⵜⵎⴷⵉⵏⵜ ⵏ ⵎⵕⵕⴰⴽⵛ. ⵉⵙⵡⵓⵜⵜⵙ ⵓⴱⴳⵔⴳⵔⴰⵡ ⴰⴷ ⴰⴳⵔⴰⵖⵍⴰⵏ, ⵏⵏⵉ ⴷ ⵉⴷⴷⴰⵏ ⴳ ⵓⵙⴰⵜⵉ ⵏ ⵓⵙⴼⵓⴽⵍⵓⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⴽⵜⵜⵓⵢ ⵡⵉⵙ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎⴹⴰⴽⴰⵕ ⵅⴼ ⵜⵙⵜⵔⴰⵜⵉⵊⵉⵢⵉⵏ ⵏⵏⵉ ⵉⵣⵎⵔⵏ ⴰⴷ ⵙⴷⵓⵙⵏⵜ ⵉⵣⵎⴰⵣ ⵏ ⵓⵖⵏⴰⵙ ⴷ ⵓⵙⵔⵇⴱ ⵏ ⵓⵎⵢⴰⵡⴰⵙ ⵃⵎⴰ ⴰⴷ ⵜⴱⵓⵖⵍⵓ ⵜⵕⵡⵉ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵉⴼⵔⵉⵇⵉⵢⵏ ⴷ ⵓⵍⴰ ⴰⵎⵔⴰⵔⴰ ⵏ ⵜⵡⵏⴳⵉⵎⵉⵏ ⴷ ⵜⵉⵔⵎⵉⵜⵉⵏ ⵉⵏⴳⵔⴰⵜⵙⵏ ⵙⴳ ⵢⴰⵜ ⵜⵙⴳⴰ, ⴷ ⵉⵏⴳⵔ ⵜⵓⴳⵜ ⵏ ⵉⵎⴳⴳⴰⵢⵏ, ⵙⴳ ⵜⵙⴳⴰ ⵢⴰⴹⵏⵉⵏ, ⵉⵖ ⴳⴰⵏ ⵜⴰⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⵙⴳⴷⵍ ⵏ ⵓⵙⵔⴼⵓⴼⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⴷ ⵜⵙⵇⵇⵉⵎⵜ ⵏ ⵓⵙⴳⴷⵍ ⵏ ⵓⵙⵔⴼⵓⴼⵏ ⵉⴹⴼⵕⵏ ⵉ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵜⵙⵇⵇⵉⵎⵜ ⵜⴰⴳⵔⴰⵖⵍⴰⵏⵜ ⵏ ⵡⴰⵏⵛⴰ ⴰⵣⴳⴳⵯⴰⵖ ⴷ ⵜⵎⵙⵎⵓⵏⵜ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⴽⵔⴰ ⵏ ⵉⵎⵓⵣⴰⵢⵏ ⵉⴳⵔⴰⵖⵍⴰⵏⵏ.
ⵎⴽⴷⴰ ⵉⵙⵡⵓⵜⵜⵙ ⵓⴱⵔⴳⵔⴰⵡ, ⵏⵏⵉ ⵔⴰⴷ ⵉⵜⵜⵡⴰⵙⵙⴰⵏ ⵙ ⵜⴷⵔⴰⵡⵜ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵉⴼⵔⵉⵇⵉⵢⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵓⵣⴰⵢⵏ ⴷ ⵉⴳⵏⵙⴰⵙ ⵏ ⵜⵎⴰⴷⴷⴰⵙⵉⵏ ⴷ ⵉⵥⵟⵟⴰⵜⵏ ⵉⴳⵔⴰⵖⵍⴰⵏⵏ, ⴰⵙⵎⵏⵉⴷ ⵏ ⵉⵏⴰⵥⴰⵕⵏ ⴷ ⵉⴱⵓⵖⵍⵓⵜⵏ ⵓⵍⴳⵉⵏⵏ ⴷ ⵉⵎⵔⵙⴰⵍⵏ ⵣⴷⵉⵏⵉⵏ ⵙ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵜⵓⴳⵜ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⴷ ⵓⵎⵙⴳⴷⴰⵍ ⵅⴼ ⵉⵏⴰⵥⴰⵕⵏ ⴷ ⵉⴼⵙⵙⴰⵢⵏ ⴷ ⵢⵓⵙⴰⵏ ⴷ ⵓⵍⴰ ⴰⵙⵎⵏⵉⴷ ⵏ ⵜⵎⵙⴽⵔⵉⵏ ⵏ ⵖⵉⵍⴰⴷ ⴷ ⵉⵣⵎⴰⵣ ⵍⵍⴰⵏⵉⵏ.
ⵔⴰⴷ ⴳⵏⵜ ⵙⵎⵎⵓⵙⵜ ⵜⵖⵉⵎⵉⵜⵉⵏ ⵏ ⵓⴱⵔⴳⵔⴰⵡ ⴰⵙⵓⵍⴼ ⵏ ⵓⵎⴹⴰⴽⴰⵕ ⵅⴼ ⵉⵏⴰⵥⴰⵕⵏ ⵓⵚⴽⵉⵡⵏ ⴽⵔⵙⵏⵉⵏ ⵏⵏⵉ ⵜⵜⵎⵏⴰⵍⴰⵏ ⵉⵎⴰⵙⵙⵏ ⵉⵏⴰⵎⵓⵔ ⵉⴼⵔⵉⵇⵉⵢⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴰⵎ ⵉⵙⵓⴳⴰⵎ ⴷⵔⵓⵙⵏⵉⵏ ⴷ ⵉⵎⵓⴽⵔⵉⵙⵏ ⵓⵍⴳⵉⵏⵏ ⴷ ⵉⵙⴽⵔⴰⴼ ⵏⵏⵉ ⴼⵍⵍⴰⵙⵏ ⵉⵜⵜⵓⵙⵖⵓⵏⵏ, ⵎⴽⴷⴰ ⵔⴰⴷ ⵙⵡⵓⵜⵜⵙⵏⵜ ⵜⵓⴳⵜ ⵏ ⵜⴽⵛⵛⵓⵎⵉⵏ ⴰⴷ ⵙⵙⵉⴷⴷⵏⵜ ⵅⴼ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴷ ⵜⵎⵢⴰⴷⴰⵙⵉⵏ ⵜⵜⵓⵙⵏⴼⵍⵓⵍⵏⵉⵏ ⴷ ⵉⴱⵔⴷⴰⵏ ⵏ ⵓⵎⵢⴰⵡⴰⵙ ⵉⵏⴳⵔ ⵉⵎⴰⵙⵙⵏ ⴰⴼⴰⴷ ⴰⴷ ⵙⵎⵏⵉⴷⵏ ⵢⴰⵜ ⵜⵏⵜⴰⵎⵜ ⵜⴰⵎⴳⴳⴰⵔⵓⵜ ⵉⵙⵉⴳⵣⵓⵍⵏ ⵜⵉⵢⴰⴼⵓⵜⵉⵏ ⵜⵉⵎⵇⵇⵔⴰⵏⵉⵏ ⵏ ⵓⴱⵔⴳⵔⴰⵡ ⴷ ⵉⵙⵖⵍⴰⴼ ⵏⵏⵙ.
ⵜⵉⵡⵓⵔⵉⵡⵉⵏ ⵏ ⵓⴱⵔⴳⵔⴰⵡ ⴰⴷ ⵔⴰⴷ ⵜⵏⵜ ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ/ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷ ⵎⴰⵙⵙ ⴰⵏⴷⵔⵓ ⴽⵔⵉⵙⵜⵓⴼⵍ ⵏⵉⵙⵏ, ⴰⴳⵎⴰⵎ ⵏ ⵜⵙⵇⵇⵉⵎⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ /ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵉⴼⴼⵓⵙ ⵏ ⵉⴼⵔⵉⵇⵢⴰ, ⵎⴰⵙⵙ ⵔⵉⵎⵉ ⵏⴳⵓⵢ ⵍⵓⵎⴱⵓ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵎⴰⵙⵙ ⵃⴰⵎⵉⴷ ⵙⵍⵓⵎ ⴷⵢⴰⴽⴰⵜⵉ, ⴰⴳⵎⴰⵎ ⵏ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⵙⴳⴷⵍ ⵏ ⵓⵙⵔⴼⵓⴼⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⴷ ⵎⴰⵙⵙ ⵎⵓⵃⴰⵎⵎⴰⴷ ⴷⴷⵅⵉⵙⵉ, ⴰⵏⵎⵀⴰⵍ ⵏ ⵍⴱⵓⵍⵉⵙ ⴰⵏⴱⴽⴰⴹ ⴳ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵔⴰⴷ ⵉⵙⵡⵓⴷⴷⵓ ⵜⵉⵡⵓⵔⵉⵡⵉⵏ ⵏⵏⵙ ⵎⴰⵙⵙ ⵊⵓⵣⵉⴼ ⵡⵉⵜⴰⵍ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⵔⴼⵜ ⵜⴰⵎⵙⵙⵓⴳⵓⵔⵜ ⴳ ⵖⴰⵏⴰ.
