ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵕⴰⵙ 3 ⵏⵓⵡⴰⵏⴱⵉⵔ 2021 ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⵢⴰⵜ ⵜⴰⵙⵇⵇⴰⵢⵎⵓⵜ ⵅⴼ ⵉⵎⵔⵙⵉ: "ⴰⵣⵓⵛⵛⵍ ⵏ ⵓⵎⵣⵣⵔⵉ ⵏ ⵜⴳⵣⵣⴰⵢⵜ: ⵎⴰⵏ ⵜⴰⵎⵢⴰⴷⴰⵙⵜ?", ⵎⴰⵢⴰ ⵏⵏ ⴳ ⵓⵙⴰⵜⵉ ⵏ ⵓⴽⴰⵎⴷ ⵏ ⵓⵙⵇⵇⵉⵎ ⵙ ⵓⵎⵙⴳⴷⴰⵍ ⴷ ⵓⵎⵔⴰⵔⴰ ⴰⴳⴷⵓⴷⴰⵏ ⵙⴳ ⵜⵉⵣⵉ ⵏ ⵓⴱⵔⵔⵃ ⵏ ⵜⵏⴱⴰⴹⵜ ⴳ ⵓⵙⴰⴽⵓⴷ ⵏ 18 ⴽⵟⵓⴱⵕ 2021 ⵅⴼ ⵜⵖⵜⴰⵙⵜ ⵏⵏⵙ ⵏⵏⴰ ⵉⴱⵣⵣⵉⵣⵏ ⴰⵣⵓⵛⵛⵍ ⵏ ⵓⵙⵎⵏⵉⴷ ⵏ ⵓⵎⵣⵣⵔⵉ ⵏ ⵜⴳⵣⵣⴰⵢⵜ ⵉⴳ ⵜⴰⴼⴰⴷⴰ ⵏ ⵓⵙⴰⴷⴼ ⵖⵔ ⵉⵙⴰⵢⵔⴰⵔⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⴰⵎ ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ ⴷ ⴳ ⵓⵙⵡⵓⵜⵜⵙ ⵏ ⵓⵙⵇⵇⵉⵎ ⴰⵔⵎⴰⵙ ⵏ ⵜⵎⵓⴽⵔⵉⵙⵉⵏ ⵏⵏⴰ ⵍⵍⴰⵏⵉⵏ ⴷ ⵓⵙⵖⵓⴷⵓ ⵏ ⵜⵏⴰⴼⵓⵖⵉⵏ ⵏⵏⵙⵏⵜ.
ⵢⵓⴷⴼ ⵓⵙⵏⵎⴰⵍⴰ ⵏ ⵓⵎⵙⴳⴷⴰⵍ ⴰⴷ ⴰⴳⵯⵏⵙⴰⵏ ⴳ ⵓⵎⵏⴰⴹ ⵏ ⵜⴱⵔⴰⵜ ⵏⵏⴰ ⵉⵙⵡⴰⵍⴰ ⵓⵙⵇⵇⵉⵎ ⴰⵙⵙ ⵏ 25 ⴽⵟⵓⴱⵕ 2021 ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴹⴰⵕⴰⵜ ⵓⴼⵓⵖ ⵏ ⵜⵖⵜⴰⵙⵜ ⵏ ⵜⵏⴱⴰⴹⵜ ⵅⴼ ⵜⵙⵖⵣⵏⵜ ⵏ ⵢⴰⵜ ⵜⵎⵢⴰⴷⴰⵙⵜ ⵜⴰⵎⴰⵢⵏⵓⵜ ⵏ ⵓⵖⴹⴰⴼ ⵉⴱⴷⴷⵏ ⵅⴼ "ⴰⵎⵣⵣⵔⵉ ⵏ ⵜⴳⵣⵣⴰⵢⵜ" ⴷ ⵜⵏⵜⴰⵎⵜ ⵏⵏⴰ ⵙⵖⵣⵏⵏⵜ ⵜⵏⴱⴰⴹⵉⵏ ⵜⵉⴷⵓⵙⴰⵏⵉⵏ ⴷ ⵏⵏⴰ ⵉⴳⴰⵏ ⵙⴳ ⵉⵙⵖⵍⴰⴼ ⵏⵏⵙⵏⵜ ⴰⵕⵥⵥⵓⵎ ⵏ ⵓⵎⵙⴳⴷⴰⵍ ⵅⴼ ⵓⵎⵣⵣⵔⵉ ⵏ ⵜⴳⵣⵣⴰⵢⵜ ⴷ ⵜⴱⵔⵉⴷⵉⵏ ⵏ ⵓⵙⵏⴼⵍ ⵏⵏⵙ ⵙ ⵓⵎⵣⵣⵔⵉ ⴰⴷⵓⵙⴰⵏ ⴰⴼⴰⴷ ⴰⴷ ⵜⵜⵓⵙⵙⵉⵏⴼⵏⵜ ⵜⴱⴱⴰⵢⴹⴰⵕⵉⵏ ⵉⵣⴷⵉⵏ ⵙ ⵓⵙⵡⵓⴷⴷⵓ ⵏ ⵜⴼⵔⴽⵜ ⴰⴷ.
ⵉⵜⵜⵡⴰⵙⵙⵏ ⵓⵏⵎⵓⵇⵇⴰⵔ, ⵉⵕⵥⵎ ⵜⵉⵡⵓⵔⵉⵡⵉⵏ ⵏⵏⵙ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵉⵍⵉⵜ ⵏ ⵎⴰⴷ ⵉⵜⵜⴳⴳⴰⵏ 50 ⵏ ⵓⴳⴳⵉⴷ, ⵉⵏⴳⵔ ⵓⵏⴽⵛⴰⵎ ⴷ ⵓⵎⴷⵔⴰⵡ, ⴳⵏⵙⴻⵙⵏ ⴽⵉⴳⴰⵏ ⵏ ⵜⵣⵓⵏⴰ ⵜⵉⵎⴰⵡⵙⴰⵙⵉⵏ ⵙⴳⵉⵙⵏⵜ ⵜⴰⵙⵇⵇⵉⵎⵜ ⵜⴰⵎⴰⵙⵙⴰⵏⵜ ⴷ ⵜⴰⵜⵉⵇⵏⵉⵜ ⵉⴹⴼⵕⵏ ⴽⵓⴼⵉⴷ-19 ⴳ ⵍⵎⵖⵔⵉⴱ ⴷ ⵜⵎⴰⵡⴰⵙⵜ ⵏ ⵜⴷⵓⵙⵉ ⴷ ⵜⵎⴰⵡⴰⵙⵜ ⵏ ⵜⵣⵔⴼⵜ ⴷ ⵜⵎⴰⵡⴰⵙⵜ ⵏ ⵓⴳⵏⵙⵓ, ⵜⴰⵎⴰⵡⴰⵙⵜ ⵜⴰⵎⴰⵔⵉⵜ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⵍⵏ ⵙ ⵓⵎⵓⵜⵜⵉ ⴰⵎⵓⵟⵟⵓⵏ ⴷ ⵓⵙⴳⴳⴷ ⵏ ⵜⵎⵙⵙⵓⴳⵓⵔⵜ ⴷ ⵜⵎⵔⵙⵍⵜ ⵏ ⵓⴱⵕⵍⴰⵎⴰⵏ ⴷ ⵜⵎⵔⵙⵍⵜ ⵏ ⵓⵎⴰⵣⵣⴰⵍ ⵏ ⵜⴳⵍⴷⵉⵜ ⴷ ⵉⵏⵎⵓⵍⵍⴰ ⴷ ⵜⵎⵙⵎⵓⵏⵉⵏ ⵜⵉⵣⵔⴼⴰⵏⵉⵏ, ⵉⵜⵜⵓⵙⵡⵓⵜⵜⴰ ⴳⵉⵙ ⵓⵣⵎⵣ ⴰⴽⵓⴷⴰⵏ ⵏ ⵉⴼⵙⵔⵏ ⵏ ⵉⵏⴽⵛⴰⵎⵏ ⴷ ⵜⵎⵔⴰⵔⵓⵜⵉⵏ ⵏ ⵉⵎⴷⵔⴰⵡⵏ ⴰⴼⴰⴷ ⴰⴷ ⵢⵉⵍⵉ ⵓⵎⵏⵍⵍⵉ ⵏ ⵓⵎⵙⴰⵡⴰⵍ ⴷ ⵓⵙⵙⵓⴼⵖ ⵏ ⵉⵏⵥⵉⵜⵏ ⴷ ⵉⵅⴼⴰⵡⴰⵍⵏ.
ⵉⵜⵜⵡⴰⵙⵙⵏ ⵓⵎⵙⴳⴷⴰⵍ ⵙ ⵓⵎⵢⴰⵖ ⵉⴼⴰⵡⵏ ⵉⵕⵥⵎⵏ ⵉⵏⴳⵔ ⵉⵏⴽⵛⴰⵎⵏ ⴷ ⵉⵎⴷⵔⴰⵡⵏ ⴷ ⵓⵙⵏⴽⴷ ⵏ ⵜⵎⵓⵛⴰ ⵜⵉⵎⴰⵙⵙⴰⵏⵉⵏ ⵅⴼ ⵜⵓⴳⵜ ⵏ ⵉⵙⴳⵓⵎⵏ ⴷ ⵢⵓⵡⵉⵏ ⵙ ⵓⵎⴰⵜⴰ ⵅⴼ ⵓⵙⴰⴷⴼ ⴰⵣⵔⴼⴰⵏ ⵉⵏⴳⵔ ⵓⵙⵜⴰⵢ ⵏ ⵜⴳⵣⵣⴰⵢⵜ ⴷ ⵜⵙⵖⵣⵏⵜ ⵏ ⵓⵎⵣⵣⵔⵉ ⵏ ⵜⴳⵣⵣⴰⵢⵜ ⴷ ⵎⴰⵏ ⵜⵓⵍⴳⵉⵏⵜ ⵉ ⵜⵙⵖⵣⵏⵜ ⵏ ⵓⵎⵣⵣⵔⵉ ⵏ ⵜⴳⵣⵣⴰⵢⵜ ⴷ ⵓⴼⵔⴰⴳ ⵏⵏⵙ ⵉ ⵓⵣⵔⴼ ⴳ ⵜⵓⴷⵔⵜ ⴷ ⵜⴷⵓⵙⵉ ⵜⴰⵎⴰⵜⵓⵜ ⴷ ⵓⴼⵔⴰⴳ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⴷ ⵉⵙⵡⵓⴷⴷⵓⵜⵏ ⵏⵏⴰ ⵉⵖⵉⵢⵏ ⴰⴷ ⵙⵙⵓⴳⵔⵏ ⴰⴼⵊⵊⵉⵊ ⵏ (ⵜ)ⵉⵏⵎⵓⵔⴰⵏ(ⵜ) ⵙ ⵉⵣⵔⴼⴰⵏ ⵏⵏⵙⵏ ⵉⴷⵙⵍⴰⵏⵏ ⴷ ⵓⵙⵙⵓⴳⵔ ⵏ ⵜⵍⴻⵍⵍⵉ ⵏⵏⵙⵏ ⵜⵓⴼⵔⵉⴷⵜ. ⵔⴰⴷ ⵏⵉⵜ ⵉⵣⴷⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴹⴼⴼⵓⵕ ⵏⵏⵙ ⵉ ⵉⵎⵔⵙⵉ ⴰⴷ, ⴳ ⵓⵙⵉⴷⴷ ⵏ ⵜⵢⴰⴼⵓⵜⵉⵏ ⵏ ⵜⵡⵓⵔⵉ ⵏ ⵜⵙⵇⵇⵉⵎⵜ ⵏⵏⴰ ⵉⵙⵏⵉⵢ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴳ ⵓⵙⴰⵜⵉ ⵏ ⵓⵎⵢⴰⵖ ⵏⵏⵙ ⴰⴽⴷ ⵜⴱⵔⴰⵜ ⵏ ⵓⵙⵇⵇⵉⵎ ⵏ ⵡⴰⵙⵙ ⵏ 25 ⴽⵟⵓⴱⵕ 2021.
