ⴳ ⵜⴰⵏⵏⴰⵢⵉⵏ ⵜⵉⵎⵣⵡⵓⵔⴰ ⵅⴼ ⵓⵙⵡⵓⴷⴷⵓ ⵏ ⵜⵡⴰⵖⵉⵜ ⵏ ⵉⵏⴳⴰⵢⵏ ⵏⵏⴰ ⵜⵙⵙⵏ ⵎⵏⵏⴰⵡ ⵏ ⵜⵎⵏⴰⴹⵉⵏ ⴳ ⵍⵎⵖⵔⵉⴱ ⴳⵔ ⴰⵢⵢⵓⵔⵏ ⵏ ⵉⵏⵏⴰⵢⵔ ⴷ ⴱⵕⴰⵢⵕ 2026, ⵉⵙⵙⵓⵜⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴷⵔⵉⵣ ⵏ ⵓⵙⵏⵉⵎⴰⵍ ⵏⵏⴰ ⵙ ⵉⵜⵜⵡⴰⵙⵙⵏ ⵓⵎⵔⴰⵔⴰ ⴰⴽⴷ ⵜⵡⴰⵖⵉⵜ ⴰⴷ. ⵉⵙⵙⵉⵡⵙ ⵓⵙⵏⵉⵎⴰⵍ ⴰⴷ ⵍⵓⵎⵎⵏ ⴳ ⵓⵙⵡⵉⵔ ⵏ ⵓⵙⵙⵓⴼⵖ ⵣⵉⴽ ⵏ ⵓⴳⴰⵔ ⵏ 180 ⵉⴼⴹ ⵏ ⵜⵏⵎⵓⵔⵉⵜ ⴷ ⵓⵏⵎⵓⵔⵉ ⵣⵉ ⵜⵎⵏⴰⴹⵉⵏ ⵉⵙⴷⵉⴷⴷⵉⵏ, ⴰⵔⴰⵢ ⵏ ⵓⵣⵔⴼ ⴳ ⵜⵓⴷⵔⵜ ⴷ ⵙⵙⵍⴰⵎⵜ ⵜⴰⵖⵙⵙⴰⵏⵜ ⵉ ⵉⵎⵣⴷⴰⵖⵏ ⵏⵏⵙⵏⵜ. 

"ⵜⵅⵏⵙ ⴰⵖ ⵜⴰⵖⴹⴼⵜ ⴰⴷ ⴷ ⵓⴼⵔⴰⴽ ⵖⵔ ⵜⵏⵎⵓⵔⴰ ⴷ ⵉⵏⵎⵓⵔⴰⵏ ⵣⵉ ⵢⴰⵜ ⵜⵡⴰⵖⵉⵜ ⵜⴰⵏⴼⴳⴰⵏⵜ ⵏⵏⴰ ⵉⵍⵍⴰⵏ ⵖⴰⵙ ⴷⵔⵓⵖ", ⴰⵔ ⵜⵜⵉⵏⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ."   
ⴰⵔ ⵜⵙⵙⴼⵔⴰⵡ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, "ⵜⵜⵡⴰⵙⵙⵏ ⵜⵎⵀⵍⵜ ⴰⴷ, ⵙ ⵢⴰⵏ ⵓⵙⵎⵓⵙⵙⵓ ⴰⵏⵎⴷⵓ ⵉ ⵎⴰⵔⵔⴰ ⵉⵎⵙⴽⴰⵔⵏ ⵏⵏⴰ ⵉⵏⵜⴰⵢⵏ ⴷⴰⵔⵙ, ⵢⵓⵊⵊⴰ ⵓⵙⵏⵉⵎⴰⵍ ⴰⴷ ⴷ ⵡⴰⵔⴰⵢ ⵏ ⵉⵣⵔⴼⴰⵏ ⴳ ⵡⵓⵍ ⵏ ⵜⵎⵢⴰⴷⴰⵙⵜ ⵏ ⵓⵙⴰⴷⵎⵔ, ⵣⵉ ⵓⵊⴱⴰⵔ ⵏ ⵜⵣⴷⴷⵓⵖⵜ ⴷ ⵡⴰⵙⵙⴰⵢ ⵏ ⴱⴰⵟⵍ ⴷ ⵡⵓⵜⵛⵉ ⴷ ⵓⵏⵀⵍⵍⴰ ⴳ ⵡⴰⴷⴷⴰⴷⵏ ⵉⴷⵓⵙⴰⵏⵏ ⵏ ⵜⵏⵎⵓⵔⴰ ⴷ ⵉⵏⵎⵓⵔⴰⵏ, ⵍⵓⵎⵎⵏ ⵡⵉⵏⵏⴰ ⴷ ⵜⵉⵏⵏⴰ ⵉⵍⵍⴰⵏ ⴳ ⵡⴰⴷⴷⴰⴷⵏ ⵏ ⵉⵎⴷⵍⵉⴼⴰⵏ, ⴷ ⵓⵣⵔⴼ ⴳ ⵓⵙⵍⵎⴷ, ⴰⴽⴷ ⴰⵎⵔⴰⵔⴰ ⵓⵎⵏⵉⴳ ⵏ ⵜⵏⵎⵓⵔⴰ ⴷ ⵉⵏⵎⵓⵔⴰⵏ ⴰⴽⴷ ⵜⴰⵔⴰⵜⵉⵏ ⵏ ⵜⵏⴱⴰⴹⵉⵏ ⵜⵉⴷⵖⴰⵔⴰⵏⵉⵏ ⴷ ⵓⵍⵜⴰⵖ ⵏ ⵡⴰⵎⵓⵏ ⵓⵖⵔⵉⵎ ⴰⴷⵖⴰⵔⴰⵏ ⴷ ⵓⵏⴰⵎⵓⵔ." 
ⵉⵣⵎⵎⴻⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴰⵏⵏⴰⵢⵜ ⵏⵏⵙ ⵜⴰⵎⵣⵡⴰⵔⵓⵜ ⵎⴰⵙ ⵜⴳⴰ ⵜⵉⵔⵎⵉⵜ ⴰⴷ ⵢⴰⵏ ⵓⵎⴷⵢⴰ ⵏ ⵜⵎⵙⴽⴰⵔ ⵉⵖⵓⴷⴰⵏ ⵏ ⵓⵙⵡⵓⴷⴷⵓ ⵏ ⵜⵡⴰⵖⵉⵜⵉⵏ ⵜⵉⴳⴰⵎⴰⵏⵉⵏ, ⴰⵢⴰ ⵙ ⵓⵙⵏⵏⴷ ⵅⴼ ⵉⵙⵖⵍⴰⴼ ⵏⵏⵙ ⵜⵉⵎⵣⵡⵓⵔⴰ ⵏⵏⴰ ⵉⵣⴷⵉⵏ ⴷ ⵓⵎⴷⵓⴷⵉ ⵏ ⵡⴰⵟⵍⴰⵚ 2023 ⴷ ⵜⵎⵢⴰⴷⴰⵙⵜ ⵉⴱⴷⴷⴰⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ. 

ⵉⵙⴷⴷⵉⴷ ⵓⵙⵇⵇⵉⵎ ⵃⵎⴰ ⴰⴷ ⵉⵔⵣⵓ ⵅⴼ ⵓⵙⴱⵓⵖⵍⵓ ⵓⵎⵎⵉⵥⵏ ⵏⵏⴰ ⵉⵙⵎⵓⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵙⴰⴷⵎⵔ ⵉ ⵜⵡⴰⵖⵉⵜⵉⵏ ⵜⵉⴳⴰⵎⴰⵏⵉⵏ, ⴳ ⵉⵙⵖⵍⴰⴼ ⵏⵏⵙ ⵉⴷⵙⵍⴰⵏ, ⵅⴼ ⵡⴰⵛⵛⵉⵍ ⵏ ⵓⵙⴷⵓⵙ ⵏ ⵉⵏⴳⵔⴰⵡⵏ ⵏ ⵜⵓⵙⵎⵉⵔⵜ ⵣⵉⴽ ⵜⴰⴷⵖⴰⵔⴰⵏⵜ ⴷ ⵓⵣⴷⴰⵢ ⵏⵏⵙ ⵓⵙⵔⵉⴷ ⴰⴽⴷ ⵉⵎⵣⴷⴰⵖⵏ. ⴰⵎ ⵓⵢⵏⵏⴰ ⵜⵙⵙⵓⵜⵔ ⵜⵎⵔⵙⵍⵜ ⵜⴰⴷⵙⵜⴰⵔⵜ ⵖⵔ ⴰⵙⵔⵓⵙ ⵏ ⵉⵖⴰⵡⴰⵙⵏ ⵉⴷⵖⵔⴰⵏⵏ ⴷ ⵉⵙⴳⴰⵡⴰⵏⵏ ⴷ ⵉⵏⵎⵏⴰⴹⵏ ⵉ ⵓⵙⵡⵓⴷⴷⵓ ⵏ ⵉⵎⵉⵣⴰⵏ. 
ⴰⵔ ⵜⵙⴳⵉⵔⴰ ⵜⴰⵏⵏⴰⵢⵉⵏ ⵜⵉⵎⵣⵡⵓⵔⴰ ⵙ: "ⴳⴰⵏⵜ ⵜⵖⴰⵔⴰⵙⵉⵏ ⴰⴷ, ⵢⴰⵜ ⵜⵎⵍⴷⴰ ⵏ ⵓⵙⴷⵓⵙ ⵏ ⵓⵙⵎⴰⵔ ⴰⵏⴰⵎⵓⵔ ⴰⵙⵏⵉⵎⴰⵍ ⵉ ⵓⵎⵏⴰⵍⴰ ⵏ ⵜⵡⴰⵖⵉⵜⵉⵏ ⵜⵉⴳⴰⵎⴰⵏⵉⵏ, ⴷ ⵓⵙⴷⵓⵙ ⵏ ⵜⵥⴹⴰⵕⵜ ⵏ ⵜⴳⵍⴷⵉⵜ ⵅⴼ ⵡⴰⵔⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵢⵏⵏⴰ ⵉⵚⴽⴽⵓⵏ ⵜⵉⵔⵙⴰⵍ ⵉ ⵢⴰⵏ ⵓⵎⴷⵢⴰ ⴰⵏⴰⵎⵓⵔ ⵏⵏⴰ ⵅⴼ ⵏⵜⵄⵡⵡⴰⵍ ⴳ ⵓⵎⵏⴰⵍⴰ ⵏ ⵜⴰⵙⵙⴰⵙⵉⵏ ⴷ ⵢⵓⵛⴽⴰⵏ."