ⴰⵙⴰⵢⵔⴰⵔ ⵉⵙⴽⵔⵏ ⴰⵎⵢⴰⵖ ⴰⴽⴷ ⵉⴼⴹⵏ ⵏ ⵉⵏⵔⵣⴰⴼ, ⵉⵙⵏⵓⴱⴳ ⵙ ⵓⴳⴳⴰⵔ ⵏ 100 ⵏ ⵓⵎⴳⴳⴰⵢ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⴷ ⵓⴳⴳⴰⵔ ⵏ 240 ⵏ ⵜⵏⵍⵎⴰⴷⵜ ⴷ ⵓⵏⵍⵎⴰⴷ ⵙⴳ 43 ⵏ ⵜⵖⵔⵎⵜ ⴷ ⵜⴳⵔⴰⵡⵜ ⵜⴰⵙⵓⵏⴰⵏⵜ ⵜⴰⴷⴳⴳⵯⴰⵜ ⵏ ⵓⵙⴰⵎⴰⵙ 12 ⵢⵓⵏⵢⵓ 2022, ⵙⵎⴷⵏ ⵉⵎⵓⵙⵙⵓⵜⵏ ⵏ ⵓⵙⴰⵢⵔⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵜⵜⵓⵙⵏⵎⴰⵍⴰⵏ ⴷⴷⴰⵡ ⵜⵎⴰⵜⴰⵔⵜ "ⵉⵡⵏⵏⵉⵜⵏ ⵏ ⵓⵣⵔⴼ" ⴳ ⵓⵙⴰⵜⵉ ⵏ ⵉⵎⵓⵙⵙⵓⵜⵏ ⵏ ⵜⵙⵓⵜⵍⵜ ⵜⵉⵙ 27 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⴳ ⵜⵉⵣⵉ ⵉⵡⵔⵔⵄⵏ ⵙⴳ 02 ⴰⵔ 12 ⵢⵓⵏⵢⵓ 2022 ⴳ ⵕⵕⴱⴰⵟ.
ⵉⴳⴰ ⵓⵙⴰⵢⵔⴰⵔ ⵏ "ⵉⵡⵏⵏⵉⵜⵏ ⵏ ⵓⵣⵔⴼ" ⴳ ⵎⵔⴰⵡ ⵏ ⵡⵓⵙⵙⴰⵏ, ⴰⵙⴰⵢⵔⴰⵔ ⴰⵎⵙⵙⵓⵎⵓ, ⵉⵕⵥⵎⵏ ⴷ ⵉⵏⵏⵓⵕⵥⵎⵏ ⵅⴼ ⵇⴰⵃ ⵉⵡⵜⴰⵢⵏ ⴷ ⵜⴼⵓⵍⵉⵏ... ⴰⵙⴰⵢⵔⴰⵔ ⵏⵏⴰ ⵖ ⵎⵙⴰⴳⴰⵔⵏⵜ ⵜⵡⵏⴳⵉⵎⵉⵏ, ⵜⵜⵓⵙⵏⵏⵣⴰⵢⵏⵜ ⵙ ⵜⵓⴳⵜ ⵏ ⵉⵡⵏⵏⵉⵜⵏ ⴰⵎ ⵜⴰⵎⴷⵢⴰⵣⵜ, ⴰⵍⵍⴰⵙ, ⵜⴰⵎⵣⴳⵓⵏⵜ, ⵓⵏⵓⵖ, ⴰⵥⴰⵡⴰⵏ ⵙ ⵜⵓⴳⵜ ⵏ ⵜⵓⵜⵍⴰⵢⵉⵏ, ⵙⴽⵔⵏⵜ ⵢⴰⵜ ⵜⵔⴽⴽⵓⵙⵜ ⵉⵜⵜⴰⴳⵯⵎⵏ ⵙⴳ ⵜⵓⵙⵙⵏⴰ ⵏⵏⵖ ⵜⴰⵎⵖⵔⵉⴱⵉⵜ ⵎⵉ ⵎⵢⴰⵏⴰⵡⵏ ⵉⵎⵓⵖⵍⵏ. "ⵥⴹⴰⵕⵖ ⴰⴷ ⵉⵏⵉⵖ ⵎⴰⵙ ⵉⴳⴰ ⵓⵙⴼⵙⵔ ⵏ ⵓⴷⵍⵉⵙ ⵢⴰⵏ ⵓⵣⵎⵣ ⴰⴷⵍⵙⴰⵏ ⴷ ⵓⵡⵙⵙⴰⵏ ⵙ ⵢⴰⵏ ⵓⵙⴰⵜⵉ ⴰⵏⴼⴳⴰⵏ ⴷ ⵓⵡⵏⴳⵉⵎ ⵓⴼⵔⵉⴷ, ⵉⵜⵜⵓⵙⵏⵎⴰⵍⴰⵏ ⴹⴰⵕⴰⵜ ⵎⴰⴷ ⴰⵖ ⵉⵙⵙⵉⵏⴼ ⵓⴱⴰⵢⵢⵓⵕ ⴰⵎⴰⴹⵍⴰⵏ, ⵓⴳⴳⴰⵔ ⵏ ⵙⵉⵏ ⵉⵙⴳⴳⵯⴰⵙⵏ ⴰⵢⴰ, ⵙⴳ ⵓⵎⵢⴰⵖ ⴰⵏⴼⴳⴰⵏ ⴷ ⵓⵡⵔⵎⴰⵏ ⵉⵎⵓⵏⵏ, ⵉⴷⴷⵖ ⵉⴳⴰ ⴰⵙⴰⵢⵔⴰⵔ ⵏ ⵓⵎⵙⴰⴳⴰⵔ ⵏ ⵜⵡⵏⴳⵉⵎⵉⵏ ⴷ ⵓⵙⵏⵏⵣⵉ ⵏⵏⵙⵏⵜ, ⵖ ⵢⴰⵏ ⵓⵔⵣⵣⵓ ⴰⵎⴳⵔⵓ ⵉⵛⵛⴰⵕⵏ ⵅⴼ ⵜⴱⵔⵉⴷⵉⵏ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⴳ ⵜⵎⴰⵣⵉⵔⵜ ⵏⵏⵖ...".
ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵙ ⵜⵎⵍⴷⴰ ⵏ ⵜⴳⵉⵔⴰ ⵏ ⵉⵎⵓⵙⵙⵓⵜⵏ ⵏ ⵓⵙⴰⵢⵔⴰⵔ “ⵉⵡⵏⵏⵉⵜⵏ ⵏ ⵓⵣⵔⴼ” ⵉⵙⵏⵓⴱⴳ ⵓⵙⴰⵢⵔⴰⵔ, ⵢⴰⵏ ⵓⵙⴰⵢⵔⴰⵔ ⵢⵓⵎⵥⵏ ⴰⵏⵙⴰ ⵏ 200 ⵏ ⵉⴷ ⵎⵉⵜⵔⵓ ⴰⵎⴽⴽⵓⵥ, ⵉⵍⵉⵏ ⴳⵉⵙ ⵉⵙⴰⴷⴰⴼⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵖ ⵜⵍⵍⴰ ⴰⵡⴷ ⵜⵓⵜⵍⴰⵢⵜ ⵏ ⵓⵙⵏⵎⵍ, ⵉⴼⴹⵏ ⵏ ⵉⵏⵔⵣⴰⴼ, ⵉⵙⴷⵍ 40 ⵏ ⵓⵎⵓⵙⵙⵓ ⵏⵏⴰ ⵙⵙⵓⵜⵉⵢⵏ ⵉⵎⵓⵣⴰⵢⵏ ⴷ ⵉⵎⴳⴳⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ (ⵉⵎⵙⵎⵓⵙⵙⵓⵜⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵎⴷⵢⴰⵜⵏ ⵏ ⵡⴰⵎⵓⵏ ⵓⵖⵔⵉⵎ, ⵉⵎⵓⵣⴰⵢⵏ , ⵉⵎⴰⵔⴰⵜⵏ, ⵉⵎⵔⵣⵓⵜⵏ, ⵉⵏⴰⵥⵓⵕⵏ...) ⴷ ⵓⵍⴰ 70 ⵏ ⵉⵎⵓⵙⵙⵓⵜⵏ ⵏ ⵓⵙⴼⵔⴽ ⴷ ⵓⵡⵔⴰⵔ ⵏⵏⴰ ⵙⵎⵓⵙⵙⴰⵏ ⵓⴳⴳⴰⵔ ⵏ 240 ⵏ ⵡⴰⵣⵣⴰⵏⵏ, ⵙⴳ ⵜⵉⵏⵎⵍ ⵜⴰⴳⴷⵓⴷⴰⵏⵜ ⴷ ⵉⴷⴷⴰⵏ ⵙⴳ 43 ⵏ ⵜⵖⵔⵎⵜ ⴷ ⵜⴳⵔⴰⵡⵜ ⵜⴰⵙⵓⵏⴰⵏⵜ ⵙⴳ ⵜⵓⴳⵜ ⵏ ⵜⵎⵏⴰⴹⵉⵏ ⵏ ⵍⵎⵖⵔⵉⴱ, ⵙⵏⴼⵍⵓⵍⵏ ⵙ ⵜⴳⵓⵔⵉ ⴷ ⵓⵎⵣⴳⵓⵏ ⴷ ⵉⵖⵎⴰⵏ ⵉⵎⵓⵙⵙⵓⵜⵏ ⵉⵏⴰⵥⵓⵕⵏ ⴷ ⵢⵓⵡⵉⵏ ⵅⴼ ⵉⵏⵣⴳⵓⵎⵏ ⵏⵏⵙⵏ ⴷ ⵉⵙⵉⵜⵉⵎⵏ ⵏⵏⵙⵏ.
ⴳ ⵓⵙⴰⵜⵉ ⵏ ⵢⴰⵏ ⵓⵖⴰⵡⴰⵙ ⴰⵏⴱⵖⵓⵔ ⴷ ⵓⵎⵢⴰⵏⴰⵡ ⵉⴱⴹⴰⵏ ⵅⴼ ⵙⵎⵎⵓⵙⵜ ⵏ ⵜⴳⵟⵟⵓⵎⵉⵏ ⵜⵉⴽⵓⵢⴰⵙⵙⵉⵏ ⵜⵉⴷⵙⵍⴰⵏⵉⵏ: “ⵉⵎⴹⴰⴽⴰⵕⵏ ⴷ ⵉⵎⵙⴰⵡⴰⵍⵏ”, “ⴰⵙⵉⵡⵍ ⵅⴼ ⵢⴰⵏ ⵓⴷⵍⵉⵙ”, “ⴰⵏⴱⴳⵉ ⵏ ⵓⵙⴰⵢⵔⴰⵔ”, “ⵉⵡⵏⵏⵉⵜⵏ ⵏ ⵓⵣⵔⴼ” ⴷ ⵓⵍⴰ “ⵜⴰⴳⵟⵟⵓⵎⵜ ⵏ ⵜⵓⴼⴰⵜ ⵉⵥⵍⵉⵏ ⵙ ⵉⵡⵏⵏⵉⵜⵏ ⵏ ⵡⴰⵣⵣⴰⵏⵏ ⵅⴼ ⵉⵣⵔⴼⴰⵏ ⵏⵏⵙⵏ”, ⵉⵎⵢⴰⵖ, ⵉⵙⵙⵉⴷⴷ ⵓⵙⵇⵇⵉⵎ ⵅⴼ ⵜⵓⴳⵜ ⵏ ⵉⵙⴳⵓⵎⵏ ⵏⵏⴰ ⵅⴼ ⵉⵜⵜⵏⵄⴰⵕ, ⴳ ⵓⵙⴰⵜⵉ ⵏ ⵜⵙⵜⵕⴰⵜⵉⵊⵉⵜ ⵉⴱⴷⴷⵏ ⵅⴼ “ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ”, ⵍⵓⵎⵎⵏ ⴰⵣⵔⴼ ⴳ ⵜⵓⴷⵔⵜ, ⴰⵣⵔⴼ ⴳ ⵜⴷⵓⵙⵉ, ⴰⵣⵔⴼ ⴳ ⵜⴷⵍⵙⴰ, ⴰⵣⵔⴼ ⴳ ⵜⴳⵎⵉ, ⵜⵉⵎⴽⵜⵉⵜ ⵜⴰⵎⴳⵔⵓⵜ ⴷ ⵓⵎⵣⵔⵓⵢ, ⵜⴰⵎⵣⵡⴰⴳⵜ, ⴰⴼⵓⵍⵍⵙ ⴰⵎⴳⵓⵔⴰⵏ, ⵜⴰⵎⵓⵔⵉ ⵜⴰⵎⵓⵟⵟⵓⵏⵜ, ⵜⵉⵖⵔⵎⵉⵏ ⵜⵉⵎⵙⵙⵉⴷⴼⵉⵏ, ⵜⴰⵢⵙⵉ ⵜⴰⵎⵖⵔⵉⴱⵉⵜ, ⵜⵓⵙⵙⵏⵉⵡⵉⵏ ⵜⵉⴼⵔⵉⵇⵉⵢⵉⵏ...
ⵙ ⵜⵔⵏⴰⵡⵜ ⵏ ⵓⴼⵙⵔ ⵏ ⵢⴰⵜ ⵜⵙⴷⵍⵉⵙⵜ ⵜⴰⵏⴱⵖⵓⵔⵜ ⴳ ⵍⵍⴰⵜⵏ ⵓⴳⴳⴰⵔ ⵏ 25 ⵏ ⵜⵥⵕⵉⴳⵉⵏ ⵜⵉⵎⴰⵢⵏⵓⵜⵉⵏ ⵏ ⵓⵙⵇⵇⵉⵎ ⴷ ⵉⴷⵍⵉⵙⵏ ⵢⴰⴹⵏⵉⵏ, ⵉⵙⴷⵍ ⵓⵙⴰⵢⵔⴰⵔ “ⵉⵡⵏⵏⵉⵜⵏ ⵏ ⵓⵣⵔⴼ” ⵜⵉⵖⵉⵎⵉⵜⵉⵏ ⵉⵕⵥⵎⵏ ⴳ ⵜⵜⵓⵙⵎⵏⵉⴷⵏ ⵉⴷⵍⵉⵙⵏ ⴷ ⵜⵖⵓⵔⵉⵡⵉⵏ ⵜⵉⵜⵔⴰⵔⵉⵏ ⵏ ⵓⵣⵖⴰⵏ ⴷ ⵢⵓⵡⵉⵏ ⵅⴼ ⵉⵙⴳⵓⵎⵏ ⵉⵣⵔⴼⴰⵏⵏ ⵏ ⵜⵉⵍⴰⵡⵜ: ⵉⵣⵔⴼⴰⵏ ⵏ ⵜⵎⵖⴰⵔⵜ, ⵜⵉⵎⵥⵉ, ⴰⵏⴰⴳⵔⴰⵡ ⴰⴷⵓⵙⴰⵏ, ⵉⵣⵔⴼⴰⵏ ⵏ ⵎⵣⵡⴰⴳⵏ, ⴰⵙⵍⵎⴷ ⵏ ⵡⴰⵣⵣⴰⵏⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵜⵉⵙⵔⵜⴰⵢ ⵜⵉⵏⴼⵔⵓⵜⵉⵏ, ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⴰⵢⵙⵉ ⵜⴰⵎⴰⵣⵉⵖⵜ ⴷ ⵜⵏⵣⵔⵓⴼⵜ, ⵜⴰⵢⵙⵉ ⵜⴰⴼⵔⵉⵇⵉⵜ, ⵜⵉⵎⴽⵜⵉⵜ... ⴰⵎⵓⵏ ⴰⵡⴷ ⵉⵡⵏⵏⵉⵜⵏ ⵉⵏⴰⵥⵓⵕⵏ ⴳ ⵓⵙⴰⵢⵔⴰⵔ ⵏ “ⵉⵡⵏⵏⵉⵜⵏ ⵏ ⵓⵣⵔⴼ”: ⵉⵙⴼⵙⵔⵏ, ⵜⵉⴼⵉⵍⵉⵏ, ⵜⴰⵎⴷⵢⴰⵣⵜ, ⴰⵎⵣⴳⵓⵏ...ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ, ⵉⵣⵔⴼⴰⵏ ⵏ ⵉⴱⵕⵕⴰⵏⵉⵢⵏ ⴷ ⵉⵎⵣⵡⴰⴳⵏ, ⵜⵉⵎⵥⵉ, ⵜⴰⵢⵙⵉ ⵜⴰⵃⵙⵙⴰⵏⵉⵜ, ⵜⵉⵎⴽⵜⵉⵜ...
ⵅⴼ ⵉⴳⴳⵉ ⵏ ⵉⵎⴹⴰⴽⴰⵕⵏ ⵏ ⵉⵡⵏⵏⵉⵜⵏ ⵏ ⵓⵣⵔⴼ, ⵢⵓⵡⵣ ⵓⵙⵇⵇⵉⵎ ⵅⴼ ⵓⵙⴷⵓⵙ ⵏ ⵓⵎⵢⴰⵖ ⵏⵏⵙ ⴰⵎⵓⵟⵟⵓⵏ, ⵙ ⵜⴷⵔⴰⵡⵜ ⵏ ⵇⴰⵃ ⵉⵎⵓⵙⵙⵓⵜⵏ ⵏⵏⵙ ⴰⴽⴷ ⵉⵏⴹⴼⵓⵕⵏ ⵏⵏⵙ ⴳ ⵜⴷⴰⴱⵓⵜⵉⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⴷ ⵉⵎⵖⵔⴰⵏ ⵏ ⵓⵙⵉⵜ ⴰⵍⵉⴽⵟⵕⵓⵏⵉ, ⵙ ⵓⵣⵓⵣⵣⵔ ⵓⵙⵔⵉⴷ ⵏ ⴽⵔⴰ ⵏ ⵜⴳⵟⵟⵓⵎⵉⵏ ⵙⴳ ⵓⵖⴰⵡⴰⵙ, ⴳ ⵓⵙⴰⵜⵉ ⵏ ⵓⵎⵢⴰⵖ ⴰⵡⵔⵎⴰⵏ ⵉⵙⵢⴰⴼⴰⵏ ⵙ ⵢⴰⵏ ⵓⴹⴼⴼⵓⵕ ⴰⴽⵙⵡⴰⵜ ⴳ ⵓⵙⵡⵉⵔ ⵏ ⵜⴷⴰⴱⵓⵜⵉⵏ ⴷ ⵓⵙⵉⵜ ⴰⵍⵉⴽⵟⵕⵓⵏⵉ.
ⵉⵙⵜⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵉⵔⴰ ⵏ ⵜⵙⵓⵜⵍⵜ 27 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⴰⴷ ⵉⵙⵏⵎⴰⵍⴰ ⵜⵉⵡⵉⵍⴰⵜⵉⵏ ⵜⵉⵎⵢⴰⵏⴰⵡⵉⵏ ⵏ ⵉⵡⵏⵏⵉⵜⵏ ⵏ ⵓⵣⵔⴼ ⵙ ⵓⵥⴰⵡⴰⵏ ⴰⴼⴰⴷ ⴰⴷ ⵜⴳ ⵜⵉⵣⵉ ⵏ ⵜⴳⵉⵔⴰ “ⵜⵉⵣⵉ ⵏ ⵜⵓⵎⵔⵜ ⴳ ⵓⵎⵏⵉⴷ ⵏ ⵓⵏⵎⵓⵇⵇⴰⵔ ⴰⵎⴰⵢⵏⵓ ⵉⵎⴰⵍ”, ⵎⴽⴷⴰ ⵙ ⵜⵜ ⵜⵙⵏⵓⵎⵎⵍ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴰⴳⴰⵎ ⵏ ⵜⴳⵓⵔⵉ ⵏ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵜⵎⵍⴷⴰ ⵏ ⵜⴼⵓⴳⵍⴰ ⵏ ⵜⴳⵉⵔⴰ ⵏ ⵉⵎⵓⵙⵙⵓⵜⵏ ⵏ ⵓⵙⴰⵢⵔⴰⵔ “ⵉⵡⵏⵏⵉⵜⵏ ⵏ ⵓⵣⵔⴼ” (ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ)
