ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ "ⵓⵔ ⵉⵍⴽⵉⵎ ⵓⴼⵔⴰⴳ ⵏ ⵡⴰⵣⵣⴰⵏⵏ ⴳ ⵓⵣⵎⵣ ⵏ ⵜⴰⵙⵙⴰⵙⵉⵏ, ⵏⵏⴰ ⵉⵜⵜⵡⴰⵙⵙⴰⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⵙ ⵓⴼⵔⴰⴳ ⴰⵎⵥⵍⵉ ⵏⵉⵖ ⵓⵙⵍⵉⴷ ⵜⴰⵙⴽⵯⴼⵍⵜ ⵉⵜⵜⵓⵙⵙⵓⵜⵔⵏ ⵏⵉⵖ ⵜⴰⴷ ⵉⵜⵜⵓⵙⴹⵕⵚⵏ ⴳ ⵓⵙⵡⵉⵔ ⴰⵎⴰⴹⵍⴰⵏ, ⵎⴰⵢⴰ ⵏⵏ ⴰⴷ ⵉⵙⵔⴰⵙⵏ ⴰⵣⵣⴰⵏ ⴳ ⵓⵙⵓⵔⵙ ⴰⵎⵖⵍⴰⵍ ⵏ ⵜⵕⵥⵉⵢⵉⵏ ⵛⵇⵇⴰⵏⵉⵏ...", ⵉⴷⴷⴰ ⴷ ⵎⴰⵢⴰ ⵏⵏ ⴳ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ, ⴰⵙⵙ ⵏ ⵓⴽⵕⴰⵚ23 ⵎⴰⵕⵚ 2022 ⴳ ⵜⴽⴰⴷⵉⵎⵉⵜ ⵏ ⵜⴳⵍⴷⵉⵜ ⴳ ⵕⵕⴱⴰⵟ, ⵅⴼ ⵉⵎⵔⵙⵉ "ⴰⴼⵔⴰⴳ ⵏ ⵡⴰⵣⵣⴰⵏⵏ ⴳ ⵓⵣⵎⵣ ⵏ ⵜⴰⵙⵙⴰⵙⵉⵏ ⵜⵉⵏⴼⴳⴰⵏⵉⵏ", ⵙ ⵜⴷⵔⴰⵡⵜ ⵏ ⵉⵏⴽⵛⴰⵎⵏ ⵅⴼ ⵓⵏⴳⵎⴰⵎ ⵏ ⵜⵎⵜⵜⴰ ⵉⵎⵓⵏⵏ ⴷ ⵜⵎⵔⵙⴰⵍ ⵏ ⵡⴰⵏⵏⴰⵍ ⴰⵏⴼⴳⴰⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⴷ ⵜⵎⵔⵙⴰⵍ ⵜⵉⵎⵙⴷⴰⵡⵉⵏ ⴷ ⵜⴳⵔⵓⵎⵎⴰⵡⵉⵏ ⵏ ⵓⵙⵡⵉⵏⴳⵎ.

ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ "ⵉⵍⵍⴰ ⵓⵙⴷⴷⵉⴷ ⴷ ⵓⵎⵙⴰⵙⴰ ⴰⴳⵔⴰⵖⵍⴰⵏ ⵅⴼ ⵓⵙⵄⵚⴽⵕ ⵏ ⵡⴰⵣⵣⴰⵏⵏ ⵙ ⵉⵖⵏⴰⵏ ⵏⵉⵖ ⵜⵉⵔⵉⵜ ⴳ ⵉⵎⵏⵣⴰⵖⵏ, ⵉⵖ ⴳⴰⵏ ⴰⵡⴷ ⵉⵎⴰⵍⴰⴼⵏ, ⵣⵖ ⵜⴼⵓⵍⵉⵏ ⵏ ⵜⴳⴳⴰⵍⵉⵏ ⵜⵉⵎⴰⵍⴰⴼⵉⵏ ⵜⵉⵏⵡⴰⵏⴽⵉⵏ ⵏⵉⵖ ⵉⵎⵓⵙⵙⵓⵜⵏ ⵉⵄⵚⴽⵕⵉⵢⵏ ⵡⴰⵔ ⵉⵏⵡⴰⵏⴽⵏ, ⵎⴰⵙ ⵉⴳⴰ ⵜⵉⵕⵥⵉ ⵛⵇⵇⴰⵏⵉⵏ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴷ ⵉⴱⴽⴽⵉⴹⵏ ⵏ ⵉⵎⵏⵖⵉ", ⵜⵙⵙⴽⵜⵉ ⵎⴰⵙ ⴱⴰⵀⵔⴰ ⵏⴽⴹⵏⵜ ⴽⵉⴳⴰⵏ ⵏ ⵜⵖⵜⴰⵙⵉⵏ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ, ⴷ ⴳ ⴽⵉⴳⴰⵏ ⵏ ⵉⵙⵓⵍⴼⵏ, ⴰⵙⵄⵚⴽⵕ ⴷ ⵓⵙⵖⵍⵍⴰ ⵏ ⵡⴰⵣⵣⴰⵏⵏ ⵣⵖ ⵎⴰⵕⵕⴰ ⵜⴼⵓⵍⵉⵏ ⵏⵜⴰⵢⵏⵉⵏ, ⵙⵙⵓⵜⵔⵏⵜ ⴰⵏⴼⴰⵍⴰⵍ ⴰⴷⵖⵢⴰⵏ ⵏ ⵜⵎⵙⴽⵔⵉⵏ ⴰⴷ ⴷ ⵉⴳⵉ ⵏ ⵉⵙⵡⵓⴷⴷⵓⵜⵏ ⵉⵎⵥⵍⵉⵜⵏ ⵅⴼ ⵓⴼⵔⴰⴳ ⵏⵏⵙⵏ".

ⵎⵇⵇⴰⵔ ⵜⵜⵓⴳⴰⵏⵜ ⵜⵓⴳⴳⴰⵙ ⴰⴷ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵅⴼ ⵓⵙⵓⵖⵏ ⵏ ⵉⴳⵉ ⵏ ⵓⴳⴳⴰⵔ ⵏ ⵉⵙⵡⵓⴷⴷⵓⵜⵏ ⵏ ⵜⵎⵔⵔⵓⵜ ⵉⵙⵡⵓⵜⵜⵙⵏ ⴰⴳⴷⴷⵓⵍ ⵏ ⵓⵙⵙⴷⵔⴰⵡ ⵏ ⵡⴰⵣⵣⴰⵏⵏ ⴷ ⵓⵙⵖⵍⵍⴰ ⵏ ⵓⵍⵎⴰⴹ ⵏⵏⵙ ⴳ ⵉⵎⵏⵣⴰⵖⵏ ⵙ ⵓⵏⵄⴰⵕ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵏⴽⵔⴰ ⴷ ⵜⵓⵚⴽⴰ ⴷ ⵡⴰⵏⵏⴰⵍ ⵏ ⵜⴰⴹⴰⵢⵉⵏ ⵜⵉⵎⴰⴹⵍⴰⵏⵉⵏ ⵃⵎⴰ ⴰⴷ ⵜⵜⵓⵏⴼⴰⵍⴰⵍⵏⵜ ⵜⵕⵥⵉⵢⵉⵏ ⵛⵇⵇⴰⵏⵉⵏ ⵉⵜⵜⵓⴳⴰⵏ ⵎⴳⴰⵍ ⴰⵣⵣⴰⵏⵏ, ⵉⵜⵜⵓⵙⵓⵖⵏ ⴰⵙⵏ ⵓⴼⵔⴰⴳ ⴰⵎⵥⵍⵉ ⴷ ⵓⵙⵍⵉⴷ.

ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷ ⵜⴼⵍ ⵜⴽⴰⵕⴹⴰ ⵏ ⵉⵎⵏⵣⴰⵖⵏ ⵉⵙⴳⴰⵡⴰⵏⵏ ⵉⵜⵜⵓⴽⴽⵓⵙⴰⵏ ⵅⴼ ⵉⵎⵏⵖⵉ ⵓⵇⵔⵉⴼ ⴷ ⵉⴹⵉⵚⵏ ⵏ ⵓⵙⵓⴷⴻⴷ ⵏ ⵉⵡⵜⵜⴰ ⵉⵏⴰⵥⴰⵕⵏ ⵉⵜⵜⵓⵙⵎⴰⵢⵏⵓⵏ, ⵜⵙⵏⵎⵍ ⵎⴰⵙ ⵉⵙⵖⴰⵡⵙⴰ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙ ⵓⵙⵔⵓⵙ ⵏⵏⵙⵏ ⴳ ⵡⵓⵍ ⵏ ⵜⵎⵀⴰⵍ ⵏ ⵓⴳⴷⴷⵓⵍ ⵏ ⵓⵙⵎⵔⵙ ⵏ ⵜⵣⵣⵉⴷⴳⴰ ⵏⵏⵙⵏ ⴳ ⵉⵎⵏⵣⴰⵖⵏ ⵙ ⵓⵎⵙⴰⵙⴰ ⴰⴽⴷ ⵉⵎⵏⵣⴰⵢⵏ ⵉⵏⵉⵍⴰⵏⵏ ⵏ ⵓⵙⴳⴳⵯⴰⵙ 2007 ⴷ ⵜⵡⵓⵔⵉ ⵅⴼ ⵜⴷⵔⴰⵡⵜ ⵏⵏⵙⵏ ⴳ ⵜⵓⵚⴽⴰ ⵏ ⵓⴼⵔⴰ, ⴰⴼⴰⴷ ⴰⴷ ⵓⵔ ⵉⵜⵜⵡⴰⵍⵙ ⵓⴼⴰⵔⵙ ⵏ ⵜⴼⴰⴷⵉⵡⵉⵏ ⵏ ⵉⵎⵏⵖⵉ ⴰⵎⵙⵙⵔⵛⵉ ⵉⵎⵟⵟⵓⵏ ⵉⵡⵜⵜⴰ.

ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵙⴷⵉⴷⴷⵉⵢⵏ ⵉⵎⵏⵣⴰⵖⵏ ⵉⵙⴳⴰⵡⴰⵏⵏ ⴳ ⴽⵉⴳⴰⵏ ⵏ ⵉⴷⵖⴰⵔⵏ, ⵍⵓⵎⴰⵕ ⴳ ⵉⴼⵔⵉⵇⵢⴰ, ⵙ ⵓⵙⵢⵉⵍⵉ ⵏ ⵎⴰⵙ ⵙⵢⴰⴼⴰⵏ ⵏ ⵉⵏⴰⵥⴰⵕⵏ ⵉⵎⵉⵣⵉⵢⵏ ⵉⵙⴷⵉⴷⴷⵉⵢⵏ, ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵉⵎⵓⵇⵕⴰⵟⵉⵜ ⴷ ⵓⴼⵔⴰ ⴷ ⵜⵏⴼⵔⵓⵜ ⵜⴰⴳⵔⴰⵖⵍⴰⵏⵜ, ⵉⵙⵖⴰⵡⵙⴰ ⵙⴳ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵓⴳⴳⴰⵔ ⵏ ⵜⴰⵣⵓⵍⵜ ⵜⴰⵖⴰⵔⴰⵏⵜ, ⵃⵎⴰ ⴰⴷ ⵢⵉⵍⵉ ⵓⵙⴷⵔⴼ ⵙⴳ ⵜⵓⵏⴳⵉⵏⵜ ⵏ ⵓⵏⵏⵙⴼⴰⵢⵍⵓ ⴰⵣⴰⵢⴽⵓ, ⵏⵏⴰ ⵉⵙⵎⵓⵜⵜⴳⵏ, ⴰⵔ ⵉⵙⵎⵓⵜⵜⵓⴳ ⵜⵉⴼⴰⴷⵉⵡⵉⵏ ⵏ ⵜⵙⵓⵍⴰⵏⵜ ⵏ ⵉⵎⵏⵣⴰⵖⵏ ⵉⵙⴳⴰⵡⴰⵏⵏ".

ⴳ ⵓⵎⵏⴰⴹ ⴰⴷ, ⵜⵙⵙⴽⵜⵉ ⵙ ⵜⵙⵖⵣⵏⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵅⴼ ⵜⵙⵓⵎⵔⵜ ⵏⵏⴰ ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⵔⵓⵙ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉ ⵓⴼⵔⴰⴳ ⵏ ⵡⴰⵣⵣⴰⵏⵏ, ⵉⴷⴷⵖ ⵢⵓⵎⵏ ⵙ ⵓⵙⵓⵖⵏ ⵏ ⵓⵙⵎⵀⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ ⴳ ⵜⵓⵚⴽⴰ ⵏ ⵓⴼⵔⴰ.

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵜⵙⵡⵓⵜⵜⵙ ⵜⵉⵏⴰⵡⵜ ⴰⴷ ⵜⴰⴳⵔⴰⵖⵍⴰⵏⵜ ⵜⴰⴷⵔⴰⵡⵜ ⴳ ⵓⵙⵢⵉⵍⵉ ⵏ ⵓⵙⵖⴹⴼ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⵙ ⵡⴰⵏⴰⵡⵏ ⵀⵔⵛⵏⵉⵏ ⵏ ⵓⵙⵖⵍⵍⴰ ⵏ ⵡⴰⵣⵣⴰⵏⵏ ⴳ ⵉⴷⵖⴰⵔⵏ ⵏ ⵉⵎⵏⵣⴰⵖⵏ ⵉⵎⴰⵍⴰⴼⵏ ⴳ ⵓⵙⵉⴷⴷ ⵏ ⵜⵓⴳⴳⴰⵙ ⵏⵏⴰ ⵜⴳⴳⴰⵏⵜ ⵜⵎⵜⵜⴰ ⵉⵎⵓⵏⵏ ⴷ ⵜⵓⴳⵜ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵅⴼ ⵓⴼⵔⴰⴳ ⵏ ⵡⴰⵣⵣⴰⵏⵏ ⴳ ⵓⵣⵎⵣ ⵏ ⵉⵎⵏⵣⴰⵖⵏ ⵉⵎⴰⵍⴰⴼⵏ, ⴷ ⵓⵍⴰ ⴰⴱⵟⵟⵓ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴳ ⵓⴱⴰⵔⴰⵣ ⵏ ⵓⴼⵔⴰⴳ ⵏ ⵡⴰⵣⵣⴰⵏⵏ ⴳ ⵓⵣⵎⵣ ⵏ ⵉⵎⵏⵣⴰⵖⵏ ⵉⵎⴰⵍⴰⴼⵏ ⴷ ⵜⴰⵙⵙⴰⵙⵉⵏ ⵜⵉⵏⴼⴳⴰⵏⵉⵏ.

ⵜⴻⵜⵜⵡⴰⵙⵙⴰⵏ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵜⵉⵏⴰⵡⵜ ⴰⴷ ⵙ ⵜⵉⵍⵉⵜ ⵏ ⵎⴰⵙⵙⴰ ⴼⴰⵔⵉⴷⴰ ⵍⵅⵎⵍⵉⵛⵉ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ, ⴷ ⵎⴰⵙⵙⴰ ⵄⴰⵡⴰⵟⵉⴼ ⵃⵢⵢⴰⵕ, ⵜⴰⵎⴰⵡⴰⵙⵜ ⵏ ⵜⴱⴷⴰⴷⵜ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵊⴰ, ⴷ ⵎⴰⵙⵙⴰ ⴼⵉⵔⵊⵉⵏⵢⴰ ⵊⴰⵎⴱⴰ, ⵜⴰⴳⵏⵙⴰⵙⵜ ⵜⴰⵎⵥⵍⵉⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵡⴰⵣⵣⴰⵏⵏ ⴳ ⵉⵎⵏⵣⴰⵖⵏ ⵉⵎⴰⵍⴰⴼⵏ.