2004-2024
ⵜⴰⵙⵉⵎⵔⴰⵡⵜ ⵏ ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ
ⴰⴽⵜⵜⵓⵢ ⵏ ⵓⵙⵔⵙ ⴷ ⵓⵙⴰⴽⴰ
ⴰⵔ ⵉⵕⵥⵥⵎ ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵎⵓⵙⵙⵓⵜⵏ ⵏ ⵏ ⵓⴽⵜⵜⵓⵢ ⵏ ⵜⵙⵉⵎⵔⴰⵡⵜ ⵏ ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ ⴳ ⵍⵎⵖⵔⵉⴱ
ⴷⴰ ⵉⵙⴼⵓⴳⵍⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴳⴳⵯⴰⵙ ⵏ 2024 ⵙ ⵓⴽⴽⵜⵜⵓⵢ ⵡⵉⵙⵙ 20 ⵏ ⵓⵙⵔⵓⵙ ⵏ ⵓⵏⴳⵔⴰⵡ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⵏⵏⵉ ⵉⴳⴰⵏ ⵓⵙⵔⵙ ⴰⵅⴰⵜⴰⵔ ⴳ ⵓⵙⴰⴽⴰ ⵏ ⵓⵍⴽⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⴷ ⵉⵎⵓⴽⵏⵏ ⵓⵚⴽⵉⵡⵏ. ⵔⴰⴷ ⵙⵙⵏⵜⵉⵏ ⵉⵎⵓⵙⵙⵓⵜⵏ ⵏ ⵉⵎⵊⵕⵉ ⴰⴷ ⵙ ⵓⵙⴼⵙⵔ ⵏ ⵜⵡⵍⴰⴼⵉⵏ ⴷ ⵉⴼⵉⴷⵢⵓⵜⵏ ⵏ ⵓⵏⴳⵔⴰⵡ ⴷ ⵜⵙⵇⵇⵉⵎⵜ ⵏ ⵓⴹⴼⴼⵓⵕ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏⵏⵙ, ⴰⵙⵙ ⵏ ⵓⵙⵉⵎⵡⴰⵙ 26 ⵉⵏⵏⴰⵢⵔ 2024, ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ.
ⵜⵏⵏⴰ ⵎⴰⵙⵙⴰ ⴰⵎⵏⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⵢⴰⵏ ⵙⴳ ⵉⵙⵔⴰⵙ ⵉⵅⴰⵜⴰⵔⵏ ⴳ ⵓⵎⵣⵔⵓⵢ ⵏⵏⵖ ⴰⵜⵔⴰⵔ. ⵉⴳⴰ ⵢⴰⵜ ⵜⵉⵔⵎⵉⵜ ⵜⴰⵎⴷⵢⴰⵜ, ⵜⴰⵎⵥⵍⵉⵜ ⴷ ⵜⵎⵣⵡⴰⵔⵜ, ⴳ ⵉⵎⵏⴰⴹⵏ ⵏⵏⵙ, ⴳ ⵜⵎⵢⴰⴷⴰⵙⵉⵏ ⵏⵏⵙ ⴷ ⵉⴼⵔⴷⵉⵙⵏ ⵏⵏⵙ, ⴳ ⵜⵙⵏⴰⵎⴽⵉⵏ ⵏⵏⵙ ⴷ ⵓⴷⵔⵉⵣ ⵏⵏⵉ ⴷ ⵉⴼⵍ, ⵙ ⵓⵙⵏⵜⵉ ⵙⴳ ⵓⵎⵙⴰⴳⴰⵔ ⴰⵡⵓⵔⵎⴰⵏ ⴷ ⵓⵎⵥⵍⵉ, ⴳ ⵜⵉⵔⵎⵉⵜⵉⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⵉ ⵜⵉⵔⴰⵜ ⵏ ⵓⵡⴰⵏⴽ ⴷ ⵡⴰⵎⵓⵏ". "ⵙ ⵎⴰⵏ ⴰⵢⴰ, ⵓⵔ ⴰⵔ ⵏⵙⴼⵓⴳⵍⵓ ⴰⵙⵙ ⴰⴷ ⵖⴰⵙ ⵙ ⵓⵙⵔⵙ ⵏ "ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ", ⵏⵏⴰ ⵏⵙⵜⵉ ⴰⴷ ⵉⴳ ⵜⴰⵎⵜⴰⵔⵜ ⵏ
ⵓⵙⴳⴳⵯⴰⵙ ⴰⴷ, ⵎⴰⵛⴰ ⴰⵡⴷ ⵙ ⵓⵙⴰⴽⴰ ⵏ ⵉⵎⵓⴽⵏⵏ ⴷ ⵜⴷⵉⵏⴰⵎⵉⵜⵉⵏ ⵜⵉⵏⴰⵎⵓⵏⵉⵏ ⵏⵏⵉ ⵉⵎⵓⵔⵙ ⵡⴰⵎⵓⵏ ⴰⴷ ⵜⵏ ⵢⴰⵡⴹ ⵙ ⵓⵙⵙⵏⵜⵉ ⵙⴳ ⵜⵉⵔⵎⵉⵜ ⴰⴷ”, ⴰⴷ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵣⵎⵣⵣⵓ ⵏ ⵓⵕⵥⵥⵓⵎ ⵏ ⵉⵎⵓⵙⵙⵓⵜⵏ ⵏ ⵓⴽⵜⵜⵓⵢ ⵡⵉⵙⵙ ⵙⵉⵎⵔⴰⵡ.
ⵙ ⵜⵉⵔⵎⵉⵜ ⵏⵏⴰ ⵉⴳⴰⵏ ⴰⵙⵙⴰ ⵙⴳ ⵜⵉⵔⵎⵉⵜⵉⵏ ⵜⵉⵙⴰⵖⵓⵍⵉⵏ, ⵏⵏⴰ ⵙⵙⵓⵜⵔⵏ ⴽⵉⴳⴰⵏ ⵏ ⵉⵡⴰⵏⴽⵏ ⴷ ⵜⵎⴰⴷⴷⴰⵙⵉⵏ ⴰⴷ ⴱⴹⵓⵏ ⵉⴼⵔⴷⵉⵙⵏ ⵏⵏⵙⵏⵜ ⴷ ⵜⵓⵚⴽⴰ ⵅⴼ ⵓⴼⴰⵔⵙ ⵏⵏⵙⵏⵜ, ⵉⵎⵓⵔⵙ ⵍⵎⵖⵔⵉⴱ ⴳ ⵜⵙⵉⵍⴰⵡⵜ ⵏ ⵢⴰⵏ ⵓⵣⵓⵔⵜ ⵉⵥⵍⵉⵏ, ⴰⵎⵣⵡⴰⵔ ⴷ ⵓⵔ ⵊⵊⵓ ⵉⵍⵍⵉⵏ ⴳ ⵓⴳⴰⵔⵓ ⵏⵏⵖ ⴰⵙⴳⴰⵡⴰⵏ, ⴷ ⵜⵖⵔⵉ ⵏ ⵉⵣⵔⵉ ⵉⵙⵏⴼⵍ ⵜ ⵙ ⵜⴷⵉⵏⴰⵎⵉⵜ ⵏ ⵉⵎⴰⵍ... ⵙⴳ ⵓⵎⵓⴽⵏ ⵏ ⵉⵎⵍⴰⴷⵏ ⵏ ⵓⵏⴳⵉⵙⵏ ⴷ ⴰⵢⵜ ⵉⵣⵔⴼⴰⵏ ⵙ ⵓⵣⵣⵔⴰⵢ ⵉ ⵓⴷⵓⵙⵜⵓⵔ ⴷ ⵜⴷⵙⵜⴰⵔⵜ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⴷ ⵙⴳ ⵓⵙⵓⵎⵓ ⴷ ⵜⵣⵔⴼⵜ ⵙ ⵓⵃⵟⵟⵓ ⵏ ⵜⵎⵃⴹⵉⵜ (ⴰⵕⵛⵉⴼ) ⴷ ⵜⵎⴽⵜⵉⵜ ⴷ ⵓⵙⵕⵚⵚⴰ ⵏ ⵜⵏⴼⵔⵓⵜⵉⵏ ⵜⵉⴷⵙⵜⴰⵔⵉⵏ ⵏ ⵡⴰⵔ ⴰⵍⴰⵙ, ⴷ ⵙⴳ ⵓⵏⴱⴰⴹ ⵏ ⵜⵏⴼⵔⵓⵜ ⵙ ⵜⵣⵣⵉⴳⵣⵜ ⵏ ⵓⵔⵎⵎⵓⵙ ⵏ ⵜⵏⴼⵔⵓⵜ ⵉ ⵜⵏⴰⴼⵓⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵓⴽⵏ ⵏ ⵜⵏⴱⴹⴰⵢⵜ ⴷ ⵓⵙⵕⵚⵍ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ... ⵉⵙⵔⴰⵙ ⵉⵎⵇⵇⵔⴰⵏⵏ ⵜⵜⵢⴰⵡⴰⴹⵏ ⴳ ⵙⵏⴰⵜ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ, ⵉⴳⴰ ⵓⵎⵏⵉⴷ ⴰⵏⵎⵏⴰⴷ ⵢⴰⵏ ⵙⴳ ⵉⵎⴰⵙⵙⵏ ⵏ ⵓⴽⴰⵎ ⵏⵏⵙ ⵏⵏⵉ ⵙ ⵜⵡⴰⵙⵙⴰⵏ ⵜⵉⵔⵎⵉⵜ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⵙ ⵓⵎⴰⵜⴰ, ⴷ ⵜⵉⵔⵎⵉⵜ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⵙ ⵓⵥⵍⴰⵢ.
ⵙ ⵎⴰⵏ ⴰⵢⴰ, ⴳ ⵓⵙⴼⵓⴳⵍⵓ ⵙ “ⵓⴽⵜⵜⵓⵢ ⵏ ⵓⵙⵔⵙ ⴷ ⵓⵙⴰⴽⴰ", ⵔⴰⴷ ⵉⵙⵙⵉⴷⴼ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵜⵥⵍⴰⵢⵜ ⵏ ⵜⵉⵔⵎⵉⵜ ⴰⴷ ⴷ ⵓⴷⵔⵉⵣ ⵏⵏⵙ ⵅⴼ ⵜⵎⵀⵍⵜ ⵏ ⵓⵙⴷⵓⵙ ⵏ ⵜⴷⵉⵎⵓⵇⵕⴰⵟⵉⵜ ⴷ ⵜⵏⴱⴰⴹⵜ ⵏ ⵓⵙⵍⴳⵏ ⴳ ⵍⵎⵖⵔⵉⴱ, ⴷ ⵓⵍⴰ ⴰⵙⵙⵉⵙⴼⵉⵡ ⵏ
ⵜⵎⵔⵉⵙⵜ ⵉⵜⵜⵓⵙⵎⴰⵢⵏⵓⵏ ⴷ ⵉⵙⵓⵍⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵉⵣⵔⴼⴰⵏ ⵏ ⵓⴼⴳⴰⵏ. ⵔⴰⴷ ⵢⴰⵎⵓ ⴳ ⵓⵙⴼⵓⴳⵍⵓ, ⵏⵏⵉ ⵔⴰⴷ ⵉⴽⴽ ⴰⵙⴳⴳⵯⴰⵙ ⴰⴽⴽⵯ ⵏ 2024, ⵢⴰⵏ ⵓⵖⴰⵡⴰⵙ ⵉⵅⴰⵜⴰⵔⵏ ⴷ ⵉⵎⵢⴰⵏⴰⵡⵏ, ⵍⵍⵉ ⵔⴰⴷ ⵉⵙⵙⵉⵙⴼⵉⵡ ⵜⴰⴱⵖⵓⵔⵜ ⵏ ⵜⵉⵔⵎⵉⵜ ⴰⴷ ⴷ ⵓⴷⵔⵉⵣ ⵏⵏⵙ, ⵙ ⵉⵙⴳⵓⵎⵏ ⵉⵎⵇⵇⵔⴰⵏⵏ, ⴷⵉⴳⵙⵏ ⵙ ⵓⵥⵍⴰⵢ: ⵜⴰⵎⴽⵜⵉⵜ ⴷ ⵓⵎⵣⵔⵓⵢ; ⵜⴰⵏⴰⴹⵉⵏ ⴷ ⵉⴷⵍⵉⵙⵏ ⴷ ⵜⵥⵕⵉⴳⵉⵏ; ⵉⵙⵓⵔⴰ ⵓⵏⵜⵉⵎⵏ ⴷ ⵉⵎⵢⴰⵡⴰⴹⵏ; ⵉⵎⵓⵙⵙⵓⵜⵏ ⵉⵏⴰⵥⵓⵕⵏ ⴷ ⵉⴷⵍⵙⴰⵏⵏ ⴷ ⵉⴽⴰⴷⵉⵎⵉⵢⵏ; [...] ⵉⵍⴰⵏ ⴰⵙⵡⵉⵔ ⴰⵏⵎⵏⴰⴹ ⴷ ⵓⵏⴰⵎⵓⵔ ⴷ ⵓⴳⵔⴰⵖⵍⴰⵏ.
2004-2024
ⵜⴰⵙⵉⵎⵔⴰⵡⵜ ⵏ ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ
ⴰⴽⵜⵜⵓⵢ ⵏ ⵓⵙⵔⵙ ⴷ ⵓⵙⴰⴽⴰ
