"30 ⵏ ⵓⵙⵖⵓⵏ ⴰⵖⵣⵓⵔⴰⵏ ⴰⴼⴰⴷ ⴰⴷ ⵢⵉⵍⵉ ⵡⴰⴷⴷⵓⵔ ⴰⵏⴼⴳⴰⵏ : ⵜⴰⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ..ⵜⴰⵎⵢⴰⴳⴰⵏⵜ ⵉⵜⵜⵓⵙⵙⴹⵕⴰⵏ ⵏⵖⴷ ⴰⴱⵔⵉⴷ ⵉⵎⵏⵏⴳⵣⵉ?" ⵙⵙⵏⵜⵉⵏ ⴰⵙⵙ ⴰⴷ ⵏ ⵓⴽⵡⴰⵙ 7 ⴷⵓⵊⴰⵏⴱⵉⵔ 2023 ⴳ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵕⵕⴱⴰⵟ, ⵜⵡⵓⵔⵉⵡⵉⵏ ⵏ ⵓⴷⵡⴰⵍ ⴰⴳⵔⴰⵖⵍⴰⵏ "30 ⵏ ⵓⵙⵖⵓⵏ ⴰⵖⵣⵓⵔⴰⵏ ⴰⴼⴰⴷ ⴰⴷ ⵢⵉⵍⵉ ⵡⴰⴷⴷⵓⵔ ⴰⵏⴼⴳⴰⵏ : ⵜⴰⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ..ⵜⴰⵎⵢⴰⴳⴰⵏⵜ ⵉⵜⵜⵓⵙⵙⴹⵕⴰⵏ ⵏⵖⴷ ⴰⴱⵔⵉⴷ ⵉⵎⵏⵏⴳⵣⵉ?", ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵢⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴷ ⵙ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵓⵙⵏⵎⴰⵍⴰⵏ ⵓⵙⵙⴰⵏ ⵏ 7 ⴷ 8 ⴷⵓⵊⴰⵏⴱⵉⵔ 2023. ⵜⴻⵜⵜⵡⴰⵥⵍⴰⵢ ⵜⵖⵉⵎⵉⵜ ⵏ ⵓⵕⵥⵥⵓⵎ ⵏ ⵓⴷⵡⴰⵍ ⵙ ⵜⵖⵔⵉ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⴱⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⴰⵢⵜ ⵏⵏⵉ ⵉⵙⵡⴰⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⵉ ⵜⵎⴷⵔⴰⵡⵉⵏ ⴷ ⵉⵎⴷⵔⴰⵡⵏ ⵏ ⵓⵎⵓⵙⵙⵓ ⴰⴷ ⴰⴳⵔⴰⵖⵍⴰⵏ.

ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴳ ⵜⴱⵔⴰⵜ ⵏⵏⵙ ⵜⴰⵎⴰⵜⵜⴰⵢⵜ ⵅⴼ ⵡⴰⵙⵙⴰⵔ ⴰⴽⵙⵡⴰⵜ ⴷ ⵓⵏⴱⵣⴰⵣ ⵙ ⵜⵙⵓⵍⴰⵏⵜ ⵏ ⵓⵙⵡⵉⵏⴳⵎ ⴳ ⵜⴱⵔⵉⴷⵉⵏ ⵕⵡⴰⵏⵉⵏ ⵣⵎⵔⵏⵉⵏ ⴰⴷ ⴳⵏⵜ ⴰⵙⵎⵀⵍ ⵏ ⵉⵎⵏⵣⴰⵢⵏ ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵉⵙⴼⵉⵡ ⴱⴰⴱ ⵏ ⵡⴰⴷⴷⵓⵔ ⵎⴰⵙ ⴷ ⵉⴷⴷⴰ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵣⵎⵣⵣⵓ ⵏ ⵉⵎⵢⴰⵙⴰⵢⵏ ⴷ ⵉⵎⵉⵣⵉⵜⵏ ⵏⵏⵉ ⵉⵙⵡⵓⵜⵜⵓⵙⵏ ⴰⴼⵔⴰ ⴷ ⵍⵀⵏⴰ ⴷ ⵓⴱⵓⵖⵍⵓ ⵏ ⵉⵎⴰⴷⴰⵏⵏ, ⵉⵙⵙⵎⵜⵔ ⴱⴰⴱ ⵏ ⵡⴰⴷⴷⵓⵔ ⵎⴰⵙ ⵓⵔⵜⴰ ⵜⵎⵓⵔⵙ ⵜⴳⵔⵓⵎⵎⴰ ⵜⴰⴳⵔⴰⵖⵍⴰⵏⵜ ⴳ ⵜⵏⴼⵔⵓⵜ ⵏ ⵓⵣⵣⵓⴳⵣ ⵏ ⵇⴰⵃ ⵉⵎⵏⵣⴰⵢⵏ ⵏ ⵓⵍⵖⵓ ⴰⴷ. ⵙ ⵜⵎⵍⴷⴰ ⴰⴷ, ⵜⵓⵍⵍⵖ ⵜⵎⴰⵔⵉⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ, ⴰⵎⵉⵏⴰ ⵊ. ⵎⵓⵃⵎⵎⴷ, ⵙ ⵓⵎⵢⴰⵖ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⴽⴷ ⵉⵎⴰⵙⵙⵏ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⵎⴰⵙ ⵜⵙⵎⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⴰⵙⵓⵜⵍⵜ ⵜⵉⵙ ⴽⴽⵓⵥⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏⴳ 2022, ⵜⵖⵔ ⵙ ⵜⵙⵓⵍⴰⵏⵜ ⵏ ⵜⵓⵎⵙⵉⵙⵜ ⵏ ⵉⵙⵓⵜⴰⵢ ⵓⵍⴳⵉⵏⵏ ⴷ ⵉⵏⴳⵎⵓⵜⵏ ⴰⴽⴷ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵎⴽⴷⴰ ⵜⵓⵍⵍⵖ ⵅⴼ ⵓⵙⵉⵣⵡⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⵍⴰⵍⵜ ⵏⵏⵙ ⵜⴰⵎⵇⵇⵔⴰⵏⵜ ⴳ ⵡⴰⵏⵏⴰⵍ ⵏ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⵎⵣⵡⴰⴳⵜ ⴷ ⵜⵓⵔⴳⵙⴰ ⵉⵜⵜⵡⴰⵏⵏⴰⵍⵏ ⵙⵓⵖⴰⵡⴰⵙ ⵉⵛⵛⴰⵕⵏ ⵏ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵜⴳⵎⵉ ⴳ ⵍⵎⵖⵔⵉⴱ, ⵜⵉⵏⵉ ⵎⴰⵙ ⵜⵏⵏⵓⵔⵣ ⴰⴷ ⵜⴻⵜⵜⵓⵙⵏⵖⵍ ⴰⵎ ⵜⵙⵏⵜⴰⵢⵜ ⴰⴷ ⴳ ⵉⴷⵖⴰⵔⵏ ⵢⴰⴹⵏⵉⵏ ⴳ ⵓⴳⵏⵙⵓ ⵏ ⵉⴼⵔⵉⵇⵉⵢⴰ ⴷ ⴱⵕⵕⴰ ⵏⵏⵙ.

ⵙⴳ ⵜⵙⴳⴰ ⵏⵏⵙ, ⵉⵙⵉⵡⵍ ⵓⵙⵍⵎⴰⴷ ⴰⵎⵙⴷⴰⵡ ⴷ ⵓⵎⴰⵔⴰ, ⵄⴱⴷ ⵍⵃⴰⵢ ⵍⵎⵓⴷⴷⵏ, ⵅⴼ ⵡⴰⵔ ⵜⴰⵡⵉⵜ ⵉⴳⴳⵓⵜⵏ ⴳ ⵢⵉⵏⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵢⵉⵏⵉ ⵎⴰⵙ ⵓⵔ ⵜⵍⵉ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴰⵜⵉⴳ ⴳ ⵓⵎⵏⴰⴹ ⴰⴷ, ⵉⵙⵙⵉⴷⴷ ⵅⴼ ⵉⵎⵣⴰⵔⴰⵢⵏ ⵏⵏⵉ ⵉⵍⵍⴰⵏ ⴳ ⵓⵏⴰⵎⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⴰⵎⴰⴷⵍⴰⵏ, ⴳ ⵓⵙⵓⵜⴳ ⵏⵏⵙ ⵉ ⵓⵙⵓⵔⵙ ⵏ ⵓⵣⵎⵣ ⴰⴷ, ⵉⵙⵙⵎⵜⵔ ⵎⴰⵙⵙ ⵍⵎⵓⴷⴷⵏ ⵙ ⵡⴰⵔ ⵜⴰⵡⵉⵜ ⵏ ⴽⵔⴰ ⵏ ⵉⵎⴳⴳⴰⵢⵏ ⵉⴳⵔⴰⵖⵍⴰⵏⵏ ⴳ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⵏⴰⴹ ⵏ ⵉⵎⵏⵖⴰⵏ ⵏ ⵖⵉⵍⴰⴷ , ⵢⵉⵏⵉ ⵎⵇⵇⴰⵔ ⴷ ⵎⴰⵢⴰ ⵏⵏ ⵎⴰⵙ ⵉⵍⵍⴰ ⵉⵎⵉⴽ ⵏ ⵓⵏⴰⵔⵓⵣ ⵃⵎⴰ ⴰⴷ ⵢⵉⵍⵉ ⵓⴼⵔⴰ ⴷ ⵜⵏⴼⵔⵓⵜ ⵜⴰⵎⴰⴹⵍⴰⵏⵜ.

ⴳ ⵓⵙⵉⵡⵍ ⵏⵏⵙ ⵅⴼ ⵜⴱⵔⵉⴷⵉⵏ ⵏ ⵜⵙⴽⵔⴰⵡⵜ ⵏ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵉⵙⴼⵉⵡ ⵎⴰⵙⵙ ⵍⵎⵓⴷⴷⵏ ⵎⴰⵙ ⵉⵅⵚⵚⴰ ⴰⴷ ⵜⵙⵙⵓⵜⵉ ⵜⵎⴰⴳⵍⴰⵢⵜ ⵜⴰⵏⵣⵔⴰⴼⵜ ⴷ ⵓⵎⵣⴰⵔⴰⵢ ⵖ ⵜⵡⵏⴳⵉⵎⵉⵏ ⴷ ⵓⵙⵙⴷⵔⴰⵡ ⵏ ⵓⵎⵏⴰⴷ ⴰⵎⴰⵜⴰⵢ ⴷ ⵜⵎⵏⴰⵡⴰⵢⵜ ⵜⴰⵏⵎⵓⵍⵍⵉⵜ ⵉ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵙⵖⴹⴼ ⵙ ⵉⵍⵉⵢ ⵏ ⵉⵎⵓⵙⵙⵓⵜⵏ ⴷ ⵉⴽⴰⴱⴰⵕⵏ ⵉⵜⵜⵔⴷⵓⵏ ⵖ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵜⴷⵔⴼⵉ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵢⴰ ⵏⵏ ⴰⴷ ⵉⵙⴱⵉⴹⵉⵕⵏ ⴰⵣⵣⵓⴳⵣ ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵙⴳ ⵜⵙⴳⴰ ⵏⵏⵙ, ⵉⵙⵙⴽⵕⵥ ⵓⵎⴰⵔⴰ ⴰⴼⵖⴰⵏⵉ, ⵄⴰⵜⵉⵇ ⵕⴰⵃⵉⵎⵉ, ⵎⴰⵙ ⵜⴳⴰ ⵜⵙⴽⵔⴰⵡⵜ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴰⴱⵔⵉⴷ ⴰⵙⵓⵍⴰⵏ ⵉⵙⵖⴰⵡⵙⴰⵏ ⵙ ⵜⵡⵉⵍⴰⵜⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵉⵏⴷⵉⵜⵉⵏ ⵏ ⵓⵙⴰⴷⵎⵔ ⵉ ⵜⵏⵥⴰⵕ ⴷ ⵓⴳⴳⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵉⵙⴼⵉⵡ ⴰⵙⵓⵖⵏ ⵏⵓⴼⵔⴰⴳ ⵏ ⵜⵉⵏⴷⵉⵜⵉⵏ ⵜⵉⵎⴰⴹⵍⴰⵏⵉⵏ ⴰⵎ ⵜⴰⴷⵔⴼⵉ ⴷ ⵜⵣⵔⴼⵜ ⴷ ⵡⴰⴷⴷⵓⵔ ⵉ ⵓⵎⵏⴰⵍⴰ ⵏ ⵓⵏⵏⴳⵣⵉ ⵏⵏⵉ ⵉⴳⴰⵏ ⴰⵏⵣⴳⵓⵎ ⵏ ⵜⵏⴼⴳⴰⵏⵜ, ⵉⵖⵔ ⵙ ⵓⵙⴱⵓⵖⵍⵓ ⵏ ⵉⵎⵏⴰⴷⵏ ⵉⵏⴰⵎⵓⵏⵏ ⴷ ⵓⵙⴱⴷⴷⵉ ⵏ ⵢⵉⵏⴰⵡ ⵏ ⵓⴽⵙⴰⵏ ⴷ ⵓⵙⵙⵉⵏⴼ.

ⵉⵙⵙⵏ ⵡⴰⵙⵙ ⴰⵎⵣⵡⴰⵔⵓ ⵏ ⵓⵎⵓⵙⵙⵓ ⴰⴷ ⴰⴳⵔⴰⵖⵍⴰⵏ, ⵏⵏⵉ ⴳ ⵏⵏ ⵍⵍⴰⵏ ⴳ ⵜⵖⵉⵎⵉⵜ ⵏⵏⵙ ⵏ ⵓⵕⵥⵥⵓⵎ ⴽⵉⴳⴰⵏ ⵏ ⵉⵎⴰⵡⵙⴰⵙⵏ ⴷ ⵉⵎⵙⵜⴳⴳⴰⵔⵏ ⵉⵎⴰⵜⵜⴰⵢⵏ, ⴷⵔⵓⵏ ⴳ ⵜⵡⵓⵔⵉⵡⵉⵏ ⵏⵏⵙ ⴽⵉⴳⴰⵏ ⵏ ⵉⵎⴰⵔⴰⵜⵏ ⴷ ⵉⵏⴼⵍⵙⴰⴼⵏ ⴷ ⵉⵏⵎⵣⵔⴰⵢⵏ ⴷ ⵉⵏⵖⵎⴰⵙⵏ ⴷ ⵉⵏⴰⵥⵓⵕⵏ, ⴷ ⵉⵎⵙⵡⵉⵏⴳⵉⵎⵏ ⴷ ⵉⵎⵓⵣⴰⵢⵏ ⴷ ⵉⵎⴳⴳⴰⵢⵏ ⴷ ⵉⵎⵙⴽⵍⴰⵏⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ, ⵃⵎⴰ ⴰⴷ ⵎⴹⵉⴽⵉⵕⵏ ⵅⴼ ⵉⵙⵏⵜⴰⵍ ⵣⴷⵉⵏⵉⵏ ⴷ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵙⵉⴷⴷ ⵏ ⵉⵙⵏⴼⵍⵏⵏ ⵉⵎⴷⵔⵓⵜⵏ ⴷ ⵜⵏⵥⴰⵕ ⴷ ⵓⴳⴳⴰⵏⵉⵏ ⵏⵏⵉ ⵉⵜⵜⵎⵏⴰⵍⴰ ⵓⵎⴰⴹⴰⵍ, ⵙⵉⵙⴼⵉⵡⵏ(ⵜ) ⴳⵉⵙ (ⵜ)ⵉⵎⴷⵔⴰⵡⵏ(ⵜ) ⵜⵓⴳⴳⴰⵣ ⵜⵉⵎⵔⵙⴰⵍⵉⵏ ⴷ ⵜⵖⵔⵎⴰⵏⵉⵏ ⵏⵏⵉ ⵜⵜⴳⴳⴰⵏ ⵉⵡⴰⵏⴽⵏ ⵏ ⵉⴼⵔⵉⵇⵉⵢⴰ ⵅⴼ ⵜⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⴷⵓⵙ ⵏ ⵜⵓⵚⴽⴰ ⵏⵏⵙ ⵜⴰⴷⵉⵎⵓⵇⵕⴰⵟⵉⵜ ⴷ ⵜⵣⵔⴼⴰⵏⵜ, ⴷ ⵜⵉⵍⵉⵜ ⵙ ⵜⵡⵉⵍⴰ ⵉⵕⵡⴰⵏ ⴳ ⵓⴳⵏⵙⵓ ⵏ ⵓⵏⴰⴳⵔⴰⵡ ⴰⵣⵔⴼⴰⵏ ⴰⴳⵔⴰⵖⵍⴰⵏ.

ⵉⵜⵜⵡⴰⵙⵙⵏ ⴰⵡⴷ ⵡⴰⵙⵙ ⴰⴷ ⵙ ⵙⵓⵎⵏⵉⴷ ⵏ ⵢⴰⵏ ⵓⵏⴷⵍ (ⴰⵜⴰⵏⴱⵔ) ⴷ ⵢⴰⵏ ⵓⵇⴰⵕⵉⴹ ⴳ ⵓⵙⴰⵢⵔⴰⵔ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴼⴼⵓⵖⵏ ⴷ ⵙ ⵜⵎⵍⴷⴰ ⵏ ⵜⴼⵓⴳⵍⴰ ⴰⴷ, ⵙ ⵜⵎⴷⵔⴰⵡⵜ ⴰⴽⴷ ⵜⴳⵔⵓⵎⵎⴰ ⵏ ⴱⴰⵔⵉⴷ ⵍⵎⵖⵔⵉⴱ ⴷ ⵍⴱⴰⵏⴽ ⵏ ⵍⵎⵖⵔⵉⴱ ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵏ ⵓⴽⵜⵜⵓⵢ ⴰⴷ ⴰⴷ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⴳⵔⵓⵎⵎⴰ ⵏ ⴱⴰⵔⵉⴷ ⵍⵎⵖⵔⵉⴱ, ⵎⴰⵙⵙ ⴰⵎⵉⵏ ⴱⵏ ⵊⵍⵍⵓⵏ ⵜⵜⵡⵉⵎⵉ, ⴷ ⵍⴱⴰⵏⴽ ⵏ ⵍⵎⵖⵔⵉⴱ, ⵎⴰⵙⵙ ⵄⴱⴷ ⵍⵍⴰⵟⵉⴼ ⵍⵊⴰⵡⴰⵀⵉⵔⵉ, ⵏⵏⵉ ⵉⴳⵏⵙⴻⵙ ⵓⵏⵎⵀⴰⵍ ⵏ ⴷⴰⵔ ⵙⵙⴽⴽⴰ ⴳ ⵍⵎⵖⵔⵉⴱ ⵎⴰⵙⵙ ⵃⴰⵙⴰⵏ ⵔⴳⵔⴰⴳⴰ, ⴰⵏⵎⵀⴰⵍ ⵏ ⵡⴰⵎⵎⴰⵙ ⵏ ⵜⵎⵜⵜⴰ ⵉⵎⵓⵏⵏ ⵉ ⵓⵙⵏⵖⵎⵙ ⴳ ⵕⵕⴱⴰⵟ, ⵎⴰⵙⵙ ⴼⵜⵃⵉ ⴷⴷⴱⴰⴱⵉ.