ⵜⵃⵔⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⴷⴳⴳⵯⴰⵜ ⵏ ⵡⴰⵙⵙ ⵏ ⵓⵙⴰⵎⴰⵙ 05 ⵏⵓⵡⴰⵏⴱⵉⵔ 2023, ⵜⵓⴳⴳⴰⵣ ⵜⵉⴳⵔⴰⵖⵍⴰⵏⵉⵏ ⵏ ⵓⵙⴷⴷⵉⴷ ⵉ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ ⴰⴷ ⴱⵔⵔⵃⵏⵜ ⵙ ⵜⴱⴷⴰⴷⵜ ⴰⴽⴷ ⴼⴰⵍⴰⵙⵟⵉⵏ ⴷ ⵓⴼⵔⴰⴳ ⵏ ⵓⵖⵔⵉⵎⵏ ⴷ ⵓⵙⴱⴷⴷ ⴰⴷⵖⵢⴰⵏ ⵏ ⵜⵢⵜⵉ ⵙ ⵓⵇⵕⵟⴰⵚ ⴷ ⵓⵙⵙⵍⴽⵎ ⵏ ⵜⵡⵉⵙⵉ ⵜⴰⵏⴼⴳⴰⵏⵜ ⵜⴰⵏⴱⵣⴰⵣⵜ ⴷ ⵜⴷⵖⵢⴰⵏⵜ ⵙ ⵢⵉⴳⵔ ⵏ ⵖⵣⵣⴰ.

ⵉⴷⴷⴰ ⴷ ⵎⴰⵢⴰ ⵏⵏ ⴳ ⵓⵎⵏⴰⴹ ⵏ ⵓⵏⵎⵓⵇⵇⴰⵔ ⴰⵎⵥⵍⴰⵢ ⵏⵏⵉ ⵜⵙⵙⵉⵅⴼ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⴰⵎⴰ ⵏ ⵓⴱⵔⴳⵔⴰⵡ 14 ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⵜⵜⵓⵙⵏⵎⴰⵍⴰⵏ ⴳ ⵜⵎⴰⵥⵓⵏⵜ ⵏ ⴷⴷⴰⵏⵉⵎⴰⵕⴽ ⴽⵓⴱⵏⵀⴰⴳⵏ, ⵓⵙⵙⴰⵏ ⵏ 06 ⴷ 07 ⴷ 08 ⵏⵓⵡⴰⵏⴱⵉⵔ 2023.

ⵙ ⵎⴰⵏ ⴰⵢⴰ, ⴹⴰⵕⴰⵜ ⴰⵙⵙⴼⵍⴷ ⵙ ⵓⵏⴳⵎⴰⵎ ⴰⵙⵉⵎⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴼⴰⵍⴰⵙⵟⵉⵏ (ⵏⵜⵜⴰ ⵜ ⴷ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵉⴳⴰⵏ ⴰⴳⵎⴰⵎ ⴳ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵢⵓⵎⵥⵏ ⵜⴰⵙⴽⵯⴼⵍⵜ "ⴰ"); ⴼⴰⵡⵏⵜ ⵜⵓⴳⴳⴰⵣ ⵏ ⵓⵏⵄⴰⵕ ⴰⴷ ⴰⴳⵔⴰⵖⵍⴰⵏ ⵙ ⵢⴰⵏ ⵓⵙⵉⵡⴹ ⵉⴱⴷⴷⵏ ⴰⴽⴷ ⴼⴰⵍⴰⵙⵟⵉⵏ, ⴰⵔ ⵉⵇⵇⴰⵔ ⵙ ⵜⴱⵔⵉⴷⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⴱⴷⴷ ⵏ ⵉⵎⵏⵖⵉ ⴷ ⵓⴼⵔⴰⴳ ⵏ ⵓⵖⵔⵉⵎⵏ ⴷ ⵜⵓⴽⴽⵉ ⵏ ⵉⵎⵢⴰⵡⴰⵙⵏ ⵉⴷⵖⵢⴰⵏⵏ ⵉ ⵉⴼⴰⵍⴰⵙⵟⵉⵏⵉⵢⵏ ⴳ ⵖⵣⵣⴰ. "ⵓⵔ ⵙⵓⵔ ⵏⴻⵏⵏⵉ ⴰⵢⴰⵎⴰⵔ", ⴰⴷ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⵅⵛⵏ "ⴰⵣⴷⴰⵢ ⵏ ⵜⴼⵔⴳⵉ ⵏ ⵓⵎⴷⴰⵏ ⵇⴰⵃ, ⵓⵔ ⴷⴰ ⵜⵜⴱⴷⴰⴷ ⵜⵉⵢⵜⵉ ⵏ ⵜⴳⵯⵎⵎⴰ ⵏ ⵎⵉⴷⴷⵏ ⵏⵏⵙ ⴷ ⵉⵙⵙⵏⴼⵉⵢⵏ ⵏⵏⵙⵏ ⴷ ⵉⵙⴳⵏⴰⴼ ⵏⵏⵙⵏ ⴷ ⵉⴷⵖⴰⵔⵏ ⵏ ⵓⵙⵓⵎⴷ ⵏⵏⵙⵏ". "ⴰⵙⵓⵔⵙ ⵓⵔ ⵉⵣⵎⵉⵔⵏ ⴰⴷ ⵉⵜⵜⵓⵙⵢⴰⵀ.. ⵡⴰⵍⴰ ⴰⴷ ⵉⵜⵜⵓⵙⵢⴰⵀ ⵓⵙⴳⴷⵍ ⵉ ⴰⵢⵜ ⵖⵣⵣⴰ ⴰⴷ ⴰⵡⴹⵏ ⵙ ⵜⵖⴰⵡⵙⵉⵡⵉⵏ ⵜⵉⴷⵙⵍⴰⵏⵉⵏ ⴰⴼⴰⴷ ⴰⴷ ⴷⴷⵔⵏ", ⴰⴷ ⵜⵏⵏⴰ ⵜⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵎⵍⴷⴰ ⵏ ⵜⵥⵕⵉⴳⵜ ⵏ ⵡⴰⵍⵖⵓ ⵏ ⵜⴰⴹⴰ.

"ⵉⵇⵇⴰⵏ ⴷ ⴰⴷ ⵉⵙⵎⴷ ⵓⵙⵓⵔⵙ ⴰⴷ ⵖⵉⵍⴰⴷ", ⴰⵙ ⵜⵙⵎⴷ ⴰⵎⵉⵏⴰ ⴱⵓⵄⵢⵢⴰⵛ, ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵙⵎⴰⵜⴰⵏⵜ ⵜⵙⵏⵓⵔⴰⵢⵉⵏ ⵏ ⵜⵎⵜⵜⴰ ⵉⵎⵓⵏⵏ (18 ⵏ ⵜⵙⵏⵓⵔⴰⵢⵜ) ⵜⵉⴼⴰⵡⵜ ⵏ ⵡⴰⵙⵙ ⴰⴷ ⵢⴰⵏ ⵓⵙⵉⵡⴹ ⵉⵛⵛⴰⵕⵏ ⴰⵎ ⵡⴰⴷ ⵏⵏⵉ ⵉⵙⵎⴰⵢⵏⵓⵏ ⵜⴰⵖⵓⵔⵉ ⵉ ⵇⴰⵃ ⵜⴼⵓⵍⵉⵏ ⴰⴷ ⵡⵇⵇⵔⵏⵜ ⵜⵉⵎⵔⵉⵙⵉⵏ ⵏⵏⵙⵏⵜ ⵉⵣⴷⵉⵏ ⵙ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ ⴷ ⵓⵙⵍⴳⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵕⵥⵥⵓⵎ ⴰⴷⵖⵢⴰⵏ ⵓⵔ ⵉⵍⵉⵏ ⵜⵉⴼⴰⴷⵉⵡⵉⵏ ⵉ ⵇⴰⵃ ⵓⵖⵔⵉⵎⵏ ⵏⵏⵉ ⵉⵜⵜⵢⴰⵎⴰⵥⵏ. ⵉⵙⵙⴽⵕⵥ ⵓⵙⵉⵡⴹ ⵅⴼ ⵓⵙⵖⵓⵏ ⵏ ⵓⴼⵔⴰⴳ ⵏ ⵓⵖⵔⵉⵎⵏ ⴷ ⵜⵓⵚⴽⵉⵡⵜ ⵜⴰⵏⴰⴷⴰⵡⵜ, ⴳ ⴰⵎⵓⵏ ⵉⵙⴳⵏⴰⴼ ⴷ ⵉⵙⵙⵏⴼⵉⵢⵏ ⴷ ⵜⵉⵏⵎⴰⵍ ⴷ ⵓⵙⵖⵓⵏ ⵏ ⵡⴰⴷⴰⴼ ⵏ ⴽⵉⴳⴰⵏ ⵏ ⵜⵡⵉⵙⵉ ⵙ ⵖⵣⵣⴰ ⵙ ⵜⵡⵉⵍⴰ ⵜⴰⵏⴼⵔⵓⵜ ⴷ ⵜⴷⵖⵢⴰⵏⵜ ⴷ ⵙ ⵓⴽⵙⴰⵢ ⵉⵅⵚⵚⴰⵏ ⴷ ⵓⵡⴰⴹ ⵏⵏⵙ ⵖⵔ ⵡⵉⴷⴰ ⵙⵔⵙ ⵉⵙⵖⴰⵡⵙⴰⵏ, ⵙⵍⴰⵡⴰⵏ ⴰⴽⴽⵯ ⵜⵉⵡⵜⵎⵉⵏ ⴷ ⵡⴰⵣⵣⴰⵏⵏ. ⵙ ⵓⵙⴽⴰⵔ ⵙ ⵜⵎⵏⵜⵉⵍⵉⵏ ⵜⵉⵏⴼⴳⴰⵏⵉⵏ, ⵉⵖⵔⴰ ⵓⵙⵉⵡⴹ ⵏ ⵜⵙⵏⵓⵔⴰⵢⵉⵏ ⵏ ⵜⵎⵜⵜⴰ ⵉⵎⵓⵏⵏ, ⴰⵎ ⴰⵙⵉⵡⴹ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵙⴱⴷⴷ ⴰⴷⵖⵢⴰⵏ ⵏ ⵜⵢⵜⵉ ⵙ ⵓⵇⵕⵟⴰⵚ.

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⴷ ⵙ ⵓⵎⵙⴰⵙⴰ ⴷ ⵉⵙⵏⵎⴽⵜⴰ ⵜⵎⵜⵜⴰ ⵉⵎⵓⵏⵏ, ⴹⴰⵕⴰⵜ ⴽⵕⴰⵎⵔⴰⵡ ⵏ ⵡⵓⵙⵙⴰⵏ ⵎⴰⴷ ⵉⵙⵙⵏⵜⵉ ⵉⵎⵏⵖⵉ ⴰⴷ ⴰⵎⴰⵢⵏⵓ, ⵎⵎⵓⵜⵜⵉⵏ ⵎⴰⴷ ⵉⵜⵜⴳⴳⴰⵏ 1.4 ⵏ ⵎⵍⵢⵓⵏ ⵏ ⵓⴳⴳⵉⴷⵏ ⵙⴳ ⵉⵥⵥⵍⵎⴹ ⵏ ⵖⵣⵣⴰ ⴳ ⵓⴳⵏⵙ ⵏ ⵢⵉⴳⵔ, ⵎⵎⵜⵏ ⴰⵔ ⵖⵉⵍⴰⴷ ⵎⴰⴷ ⵉⵜⵜⴳⴳⴰⵏ 9500 ⵏ ⵓⴳⴳⵉⴷⵏ, ⵙⴳⵉⵙⵏ 3900 ⵏ ⵡⴰⵣⵣⴰⵏ ⴷ ⵓⴳⴳⴰⵔ ⵏ 2400 ⵏ ⵜⵎⵖⴰⵔⵜ, ⵖ ⵜⵉⵣⵉ ⵍⵍⵉ ⵙⵖⴰⵡⵙⴰⵏ ⵓⴳⴳⴰⵔ ⵏ 23 ⵏ ⵉⴼⴹⵏ ⵙ ⵓⵊⵓⵊⵊⵉ ⴰⴷⵖⵢⴰⵏ ⴳ ⵓⴳⵏⵙ ⵏ ⵉⵙⴳⵏⴰⴼ ⵏⵏⵉ ⵉⵙⵡⵓⵔⵉⵏ ⵙ ⵓⴳⴳⴰⵔ ⵏ ⵜⵣⵎⵔⵜ ⵏⵏⵙⵏ.