ⵙ ⵢⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴷ ⴳ ⵓⵙⴰⵜⵉ ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙⵙ ⵙⵉⵎⵔⴰⵡ ⵏ ⵓⵙⵔⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⴰⵔ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴱⵕⵍⴰⵎⴰⵏ ⵙ ⵜⵎⵚⵕⴰⵢ ⵏⵏⵙ ⵙ ⵙⵏⴰⵜ, ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵢⴰⵜ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵅⴼ « ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ », ⴳ ⵡⵓⵙⵙⴰⵏ ⵏ 6 ⴷ 7 ⴷⵓⵊⴰⵏⴱⵉⵔ 2024 ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⴳ ⵕⵕⴱⴰⵟ ⴳ ⵜⵙⵔⴰⴳⵜ ⵜⵉⵙ ⵜⵥⴰⵜ ⵏ ⵜⵉⴼⴰⵡⵜ.
ⵔⴰⴷ ⵜⵜⵓⵎⵔⴰⵔⴰⵏ ⴳ ⵜⵉⵏⴰⵡⵜ ⴰⴷ ⵉⵙⵏⵜⴰⵍ ⵉⵣⴷⵉⵏ ⵙ ⵉⵙⴰⴽⴰⵜⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⴳ ⴰⵎⵓⵏ ⴰⵡⴷ ⵉⵎⵢⴰⵖⵏ ⵉⵣⵎⵔⵏ ⴰⴷ ⵢⵉⵍⵉ ⴳⵔ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵉⵎⵓⴽⵏⵏ ⵉⴷⵙⵜⴰⵔⵏ ⴷ ⵓⵣⵔⵉⴼⵏ ⴷ ⵉⵏⵣⵔⴰⴼⵏ, ⴷ ⵜⵉⵍⴰⵍⵉⵏ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵡⴰⵎⵓⵏ ⵓⵖⵔⵉⵎ ⴳ ⵉⵙⴰⴽⴰⵜⵏ ⴰⴷ, ⴷ ⴳ ⵡⴰⵏⵏⴰⵍ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏ ⵉⵏⴳⵎⴰⵎⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⴷ ⵜⵎⵙⴰⵔⵉⵏ ⵏ ⵜⵎⴽⵜⵉⵜ.
ⵎⴽⴷⴰ ⵔⴰⴷ ⵜⵙⴰⵡⵍ ⵜⵉⵏⴰⵡⵜ ⴰⴷ ⵅⴼ ⵉⴱⵔⴷⴰⵏ ⵏ ⵓⵙⴱⵖⵔ ⵙⴳ ⵉⵙⴰⴽⴰⵜⵏ ⵍⵍⵉ ⵉⴳⴰⵏ ⵙ ⵉⴷⵔⵉⵣⵏ ⵏⵏⵙⵏ ⴷ ⵜⵢⴰⴼⵓⵜⵉⵏ ⵏⵏⵙⵏ ⴰⵙⴰⵖⵓⵍ ⵏ ⵜⵉⵔⵎⵉⵜⵉⵏ ⵢⴰⴹⵏⵉⵏ ⵏ ⵖⵉⵍⴰⴷ ⴷ ⵢⵉⵎⴰⵍ, ⵍⵓⵎⵎⵏ ⴰⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵏⵏⵉ ⵉⴳⴰⵏ ⵜⵉⵔⵎⵉⵜ ⵜⴰⵏⴱⵖⵓⵔⵜ ⵙ ⵜⵎⵙⴽⵔⵉⵏ ⵏⵏⵙ ⵜⵉⵎⵓⴼⴰⵢⵉⵏ, ⵜⴳ ⵜⵓⴼⵔⵉⴷⵜ ⴳ ⵓⵙⵡⵓⴷⴷⵓ ⵏⵏⵙ ⴷ ⵉⴳⵉ ⵏⵏⵙ ⴷ ⵜⵢⴰⴼⵓⵜ ⵏⵏⵙ ⴷ ⵉⵙⵖⵍⴰⴼ ⵏⵏⵙ.
ⵔⴰⴷ ⴱⴹⵓⵏⵜ ⵜⵡⵓⵔⵉⵡⵉⵏ ⵏ ⵜⵖⵉⵎⵉⵜⵉⵏ ⵜⵉⵙⴳⵓⵎⴰⵏⵉⵏ ⵅⴼ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵏ ⵜⵉⵔⵎⵉⵜⵉⵏ ⵜⵉⴼⵔⵉⵇⵉⵢⵉⵏ ⴷ ⵜⵎⵉⵔⵉⴽⴰⵏⵉⵢⵏ ⵏ ⵉⴼⴼⵓⵙ, ⴳ ⴰⵎⵓⵏⵜ ⴰⵡⴷ ⵜⵉⵏⵏⴰ ⵉⵣⴷⵉⵏ ⵙ ⵉⵎⵢⴰⵖⵏ ⵉⵣⵎⵔⵏ ⴰⴷ ⵢⵉⵍⵉ ⴳⵔ ⵉⵙⴰⴽⴰⵜⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵉⵎⵓⴽⵏⵏ ⵉⴷⵙⵜⴰⵔⵏ ⴷ ⵓⵣⵔⵉⴼⵏ ⴷ ⵉⵏⵣⵔⴰⴼⵏ, ⴷ ⵙ ⵜⵉⵍⴰⵍⵉⵏ ⵏ ⵉⴱⵕⵍⴰⵎⴰⵏⵏ ⴷ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵡⴰⵎⵓⵏ ⵓⵖⵔⵉⵎ ⴳ ⵉⵙⴰⴽⴰⵜⵏ ⴰⴷ, ⴷ ⵙ ⵜⵎⵙⴰⵔⵉⵏ ⵏ ⵡⴰⵏⴰⵡ ⴰⵏⴰⵎⵓⵏ, ⴷ ⵜⵉⵍⴰⵍⵉⵏ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴳ ⵡⴰⵏⵏⴰⵍ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏ ⵉⴳⵎⴰⵎⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ.
ⵔⴰⴷ ⴱⴹⵓⵏⵜ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵅⴼ ⵜⵖⵉⵎⵉⵜⵉⵏ ⵜⵉⵙⴳⵓⵎⴰⵏⵉⵏ ⵅⴼ ⵜⴳⵔⵓⵎⵎⴰ ⵏ ⵉⵙⴳⵓⵎⵏ ⵉⵣⴷⵉⵏ ⴷ : "ⵜⴰⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵉⵎⵓⴽⵏⵏ ⵉⴷⵙⵜⴰⵔⵏ ⴷ ⵓⵣⵔⵉⴼⵏ", "ⵉⵙⴰⴽⴰⵜⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ : ⵜⵉⵍⴰⵍⵉⵏ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵡⴰⵎⵓⵏ ⵓⵖⵔⵉⵎ", "ⵜⴰⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵉⵎⵓⴽⵏⵏ ⵉⵏⵣⵔⴰⴼⵏ" ⴷ "ⵉⵙⴰⴽⴰⵜⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵓⴼⴰⵔⵙ ⴰⵡⵏⴳⵉⵎ ⴷ ⵓⵡⵙⵙⵏⴰⵏ".
ⵔⴰⴷ ⵢⵉⵙⴰⵏ ⵓⵏⵎⵓⵇⵇⴰⵔ ⴰⴷ ⵢⴰⵜⵜⵓⵏ, ⵏⵏⵉ ⵖ ⵔⴰⴷ ⵉⵜⵜⵡⴰⵕⵥⴰⵎ ⵓⵙⴼⵙⵔ ⵏ ⵜⵙⵉⵎⵔⴰⵡⵜ ⵏ ⵜⵉⴷⵜ ⴷ ⵜⵓⵙⵓⵎⵓ ⴷ ⵓⵎⵙⴼⵔⵓ ⴳ ⵓⴱⵕⵍⴰⵎⴰⵏ, ⵜⵉⵍⵉⵜ ⵏ ⴽⵉⴳⴰⵏ ⵏ ⵉⵎⵙⵜⴳⴳⴰⵔⵏ ⵉⵏⴰⵎⵓⵔⵏ ⴷ ⵉⴱⵕⵕⴰⵏⵏ, ⵉⵙⵎⴷⵢⴰⵏ ⵜⴰⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⵜⵏⴱⴹⴰⵢⵜ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴷ ⵓⵍⴰ ⵉⵎⵙⵜⴳⴳⴰⵔⵏ ⵏ ⵜⵎⵜⵜⴰ ⵉⵎⵓⵏⵏ ⴷ ⵜⴰⵎⵓⵏⵜ ⵏ ⵉⴼⵔⵉⵇⵢⴰ, ⴷ ⵉⴳⵏⵙⴰⵙ ⵅⴼ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⵏⴰⵎⵓⵔⵉⵏ ⵏ ⵡⴰⵎⵓⵏ ⵓⵖⵔⵉⵎ, ⴷ ⵓⵍⴰ ⵉⵎⵓⵣⴰⵢⵏ ⴷ ⵉⵎⵙⴽⵍⴰⵏⵏ.
ⵉ ⵓⵙⴽⵜⵉ, ⵉⵙⵙⵉⴷⵔ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵏ ⵓⵙⵔⵓⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⵢⴰⵏ ⵓⵙⴰⴽⴰ ⵉⴽⴽⴰⵏ ⵙⵉⵎⵔⴰⵡ ⵏ ⵉⵙⴳⴳⵯⴰⵙⵏ, ⵢⴰⴷⵙ ⵜⵉⵢⴰⴼⵓⵜⵉⵏ ⴷ ⵉⴷⵔⵉⵣⵏ ⵏ ⵜⵉⵔⵎⵉⵜ ⵉⵙⵙⵕⵚⴰⵏ ⴰⵎⵙⴰⴳⴰⵔ ⵉⴷⵔⴰⵏ ⵉⵏⴳⵔ ⵙⵉⵏ ⵡⴰⵍⵍⴰⵍⵏ ⵉⴷⵙⵍⴰⵏⵏ : ⵜⴰⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵜⵓⵚⴽⴰ ⵜⴰⵎⵔⵙⴰⵍⵜ. ⵉⴳ ⵓⵎⵙⴰⴳⴰⵔ ⴰⴷ , ⵏⵏⴰ ⵢⵓⵎⴰⵏ ⴰⵙⵎⴽⵍ ⵏ ⵜⵕⵥⵉⵢⵉⵏ ⵏ ⵉⵣⵔⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴳⴳⴷ ⵏ ⵉⵎⴰⵍⴰⴷⵏ ⴷ ⵓⵎⵓⴽⵏ ⴰⵎⵔⵙⴰⵍ ⴷ ⵓⵣⵔⵉⴼ, ⵜⴰⵎⴰⵜⴰⵔⵜ ⵏ ⵉⵎⴹⴰⴽⴰⵕⵏ ⵢⵓⴷⴼⵏ ⴷ ⴰⴳⵜ ⵜⴼⵓⵍⵉⵏ ⵉⵕⵛⵎⵏ ⴰⵙⴰⴽⴰ ⴰⴷⵉⵎⵓⵇⵕⴰⵟⵉ ⴳ ⵍⵎⵖⵔⵉⴱ.
ⴰⴳⴰⵎ ⵏ ⵓⵖⴰⵡⴰⵙ (PDF)
