ⴰⵙⵉⵏⴰⴳ ⵕⵕⴱⴰⵟ - ⵉⴷⵔⵉⵙ ⴱⵏⵣⴽⵔⵉ - ⵉ ⵉⵣⵔⴼⴰⵏ ⵏ ⵓⴼⴳⴰⵏ
ⵉⵙⵔⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵉⵏⴰⴳ ⵏ ⵓⵙⵎⵓⵜⵜⴳ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⴰⴷ ⴰⴷ ⵜⵜⵡⴰⵏⵏⴰⵍⵏⵜ ⵜⵣⵎⵎⴰⵔ ⵏ ⵉⵎⴳⴳⴰⵢⵏ ⵏⵜⴰⵢⵏⵉⵏ ⵙ ⵢⵉⴳⵔⴰⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ. ⴳ ⵓⵙⴳⴳⵯⴰⵙ ⵏ 2017 ⵉⴱⵔⵔⴽ ⴱⴰⴱ ⵏ ⵡⴰⴷⴷⵓⵔ ⵙ ⵜⵓⴽⴽⵉ ⵏ ⵡⴰⵙⵙⴰⵖ ⵉⴷⵔⵉⵙ ⴱⵏⵣⴽⵔⵉ ⵉ ⵓⵙⵉⵏⴰⴳ ⴰⴷ, ⵙ ⵜⵓⵙⵏⵜ ⵏ ⵎⴰⴷ ⵉⵙⵎⴷ ⵉⴳⵍⵍⵉⵏ ⴳ ⵜⵉⵣⵉ ⵏ ⵓⵙⵡⵓⴷⴷⵓ ⵏⵏⵙ ⵉ ⵜⴼⵔⴽⵜ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴳ ⵍⵎⵖⵔⵉⴱ.
ⵉ ⵓⵙⴷⵓⵙ ⵏ ⵜⵡⵓⵔⵉ ⵏⵏⵉ ⵉⴳⴰ ⵓⵙⵉⵏⴰⴳ, ⵜⴻⵜⵜⵡⴰⵙⵔⴰⵙ ⵜⵙⵇⵇⵉⵎⵜ ⵏⵏⵙ ⵜⴰⵎⴰⵙⵙⴰⵏⵜ ⵜⴰⴳⵔⴰⵖⵍⴰⵏⵜ ⴳ ⵓⵙⴳⴳⵯⴰⵙ ⵏ 2019, ⴰⵎⵓⵏⵜ ⴳⵉⵙ ⵜⵙⵓⴳⴰⵔ ⴷ ⵜⵎⵓⵣⴰⵢⵉⵏ ⵜⵉⴽⴰⴷⵉⵎⵉⵢⵉⵏ ⴷ ⵜⵉⵏ ⵓⴱⴰⵔⴰⵣ ⵎⵢⴰⵏⴰⵡⵏⵉⵏ, ⵏⵏⵉ ⵉⵣⵎⵔⵏ ⴰⴷ ⵜ ⵉⵏⵏⴰⵍ ⴰⴼⴰⴷ ⴰⴷ ⵉⵙⴽⵔ ⵜⴰⵙⵎⵉⴳⵍⵜ ⵏ ⵓⵙⵎⵓⵙⵙⵓ ⵏ ⵜⵎⴰⴳⵍⴰⵢⵜ ⵜⴰⵡⵏⴳⵉⵎⵜ ⴷ ⵓⴽⴰⵎ ⵏⵏⵙ, ⴷ ⵓⵙⵏⵎⴰⵍⴰ ⵏ ⵓⵎⵔⴰⵄⴰ, ⴷ ⵜⵎⵙⴰⴷⵓⵔⵜ ⵏ ⵓⵎⵓⵙⵙⵓ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⴷⵔⴰⵡⵉⵏ ⵏ ⵜⵓⵙⵙⵏⴰ ⴷ ⵓⵙⵡⵉⵏⴳⵎ, ⴷ ⵓⵙⵏⴼⵍ ⵏⵏⵙ ⵙ ⵓⵙⵖⵉⵡ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⵙⴳⴰⵡⴰⵏ, ⵉⴷⴷⵖ ⵉⴳⴰ ⴰⵙⴰⵢⵔⴰⵔ ⵏ ⵓⵎⴹⴰⴽⴰⵕ ⴷ ⵓⵙⵡⵉⵏⴳⵎ ⴳ ⵜⵓⴳⵜ ⵏ ⵜⵎⵓⴽⵔⵉⵙⵉⵏ ⵉⵣⴷⵉⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⴳⵊⴷⵉ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⴳ ⵢⵉⴳⵔ ⴰⴷ.
ⵙ ⵓⵎⵙⴰⵙⴰ ⴰⴽⴷ ⵓⵙⵍⴳⵏ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵉⵏⵏⵖⵍⴼ ⴰⵙⵉⵏⴰⴳ ⵕⵕⴱⴰⵟ - ⵉⴷⵔⵉⵙ ⴱⵏⵣⴽⵔⵉ - ⵉ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵙⵎⵉⴳⴰⵍ ⵜⵉⵏⴹⴼⴰⵕⵉⵏ:
- ⴰⵙⴱⵓⵖⵍⵓ ⵏ ⵓⵜⵡⴰⵍ ⵏ ⵉⵙⵎⵓⵜⵜⴳⵏ ⴳ ⵜⵓⴳⵜ ⵏ ⵉⵙⵏⵜⴰⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⵔⵓⵙ ⵏ ⵉⵙⴰⴽⴰⵜⵏ ⵏ ⵜⵣⵣⵓⵍⴰⵏⵜ ⴷ ⵜⴳⵣⵣⵓⵎⵉⵏ ⵏ ⵓⵙⵎⵓⵜⵜⴳ ⴰⵙⵓⵍⴰⵏ ⵉⵚⴰⵃⴰⵏ ⵉ ⵉⴳⵎⴰⵎⵏ ⵏ ⵓⵙⵇⵇⵉⵎ ⴷ ⵉⵎⵙⵖⴰⵏⵏ ⵏⵏⵙ ⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ, ⴷ ⵓⵙⵎⵓⵜⵜⴳ ⵏ ⵉⵎⵙⵎⵓⵜⵜⴳⵏ ⵉⵚⴰⵃⴰⵏ ⵉ ⵜⵓⴳⵜ ⵏ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵉⴷⵎⵙⴰⵏⵏ;
- ⴰⵙⵡⵓⵜⵜⵓ ⵏ ⵡⴰⵙⵙⴰⵔⵏ ⴷ ⵓⵙⴽⴰⵔ ⵏ ⵉⵙⵎⵓⵜⵜⴳⵏ ⵉⵚⴰⵃⴰⵏ ⵉ ⵉⵎⴳⴳⴰⵢⵏ ⵏ ⵡⴰⵎⵓⵏ ⵓⵖⵔⵉⵎ, ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ;
- ⴰⵙⴱⵓⵖⵍⵓ ⵏ ⵜⵎⴷⵔⴰⵡⵉⵏ ⴰⴽⴷ ⵉⵙⵉⵏⴰⴳⵏ ⴰⴽⵙⵓⵍⵏⵉⵏ.
ⵙⴳ ⵍⵍⵉⴳ ⵉⵜⵜⵡⴰⵙⵔⴰⵙ, ⵉⵙⵏⵎⴰⵍⴰ ⵓⵙⵉⵏⴰⴳ ⴽⵉⴳⴰⵏ ⵏ ⵜⵙⵓⵜⵍⵉⵏ ⵏ ⵓⵙⵎⵓⵜⵜⴳ ⵉⵚⴰⵃⴰⵏ ⵉ ⵉⵏⴱⵖⵓⵔⵏ ⵉⴳⵏⵙⴻⵙⵏ ⴽⵉⴳⴰⵏ ⵏ ⵢⵉⴳⵔⴰⵏ ⴷ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⴳⴰ ⵏ ⵓⴳⵎⵎⵓⴹ ⴰⵏⴰⵎⵎⴰⵙ ⴷ ⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ, ⵉⵣⴷⵉⵏ ⵙ ⵓⵎⴰⵜⴰ ⵙ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵉⵣⵔⴼⴰⵏ ⵏ ⵡⴰⵣⵣⴰⵏ, ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴰⵏⴰⵡ ⴰⵏⴰⵎⵓⵏ, ⵜⴰⵎⵣⵡⴰⴳⵜ, ⵉⵏⵥⵉ ⵏ ⵉⵙⵜⴰⵢⵏ, ⵜⴰⵣⵔⴼⵜ ⵏ ⵓⵏⴳⵉⴳⵜ, ⴰⵙⴱⴷⴷⵉ ⵏ ⵓⵙⵏⵓⵃⵢⵓ, ⵜⴰⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵣⵔⴼ ⴳ ⵓⵎⵚⵉⵕⵉⴹ ⵓⵖⴷⵉⵎ.
