ⵉⵙⵓⵍ ⴷⴰ ⵉⵜⵜⴹⴼⵕ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵏⵣⴳⵓⵎ ⴰⵅⴰⵜⴰⵔ, ⵜⴰⵏⴹⵡⴰ ⵜⴰⵎⴳⵔⵓⵜ ⴳ ⵓⵙⵡⵉⵔ ⵏ ⵜⵎⴷⵉⵏⵉⵏ ⵏ ⵍⴼⵏⵉⴷⵇ ⴷ ⵙⴱⵜⴰ ⴷ ⴳ ⵓⵙⵡⵉⵔ ⵏ ⴱⵏⵉ ⵏⵚⴰⵕ ⴷ ⵎⵍⵉⵍⵢⴰ, ⴷ ⵓⵢⵏⵏⴰ ⵜⵏ ⵉⴹⴼⵕⵏ ⵣⴳ ⵉⴹⵉⵚⵏ ⵉⵏⵎⵉⵣⵉⵜⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵓⵎⵎⵏ ⴳ ⵓⵙⵡⵉⵔ ⵏ ⵓⵣⵔⴼ ⴳ ⵜⵓⴷⵔⵜ ⴷ ⵉⵣⵔⴼⴰⵏ ⵏ ⵉⵛⵉⵔⵔⵉ ⴷ ⵉⵣⵔⴼⴰⵏ ⵉⵣⴷⵉⵏ ⴷ ⵜⴰⵣⵡⴰⴳⵜ ⴷ ⵉⵣⵔⴼⴰⵏ ⵢⴰⴹⵏⵉⵏ ⵉⴷⵙⵍⴰⵏⵏ, ⴷ ⵓⵢⵏⵏⴰ ⵉⵜⵙ ⵉⵎⵓⵏⵏ ⴰⵡⴷ  ⵏ ⵡⴰⴷⴷⴰⴷⵏ ⵏⵏⴰ ⵉⵣⵎⵔⵏ ⴰⴷ ⵙⵙⵉⵖⵏ ⴰⴷⴷⵓⵔ ⴰⵏⴼⴳⴰⵏ ⴷ ⵜⵏⴼⵔⵓⵜ ⵜⴰⵖⵙⵙⴰⵏⵜ.

 ⴰⵔ ⵉⵜⵜⴰⵣⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵛⴼⴰⴷ ⵏⵏⵙ ⵉⵔⵖⴰⵏ ⵉ ⵜⵡⵊⵉⵡⵉⵏ ⵏ ⵡⵓⵏⴳⵉⵙⵏ ⵏ ⵜⵡⴰⵖⵉⵜ ⴰⴷ, ⴰⵔ ⵉⵜⵜⴰⴽⴽⴰ ⵉ ⵓⵎⴰⵜⴰ, ⵉⵎⵙⴳⵔⴰ ⵉⵎⵏⵣⴰ ⵏ ⵜⵉⴹⴰⴼ ⵏⵏⵙ ⴳ ⵓⴱⴰⵔⴰⵣ ⴷ ⵓⵎⵓⵟⵟⵓⵏ ⴷ ⵓⵙⵏⵎⴰⵍⴰ ⵏ ⵜⵎⵓⵛⴰ ⴹⴰⵕⵜ ⵏ ⵓⵏⵥⴰⵥ ⵏⵏⵙⵏⵜ ⵣⴳ ⵉⵙⵓⴳⴰⵎ ⵉⵎⵏⵏⴰⵡⵏ.

ⵉⴱⴷⴷⴰ ⵓⵙⵇⵇⵉⵎ ⴳ ⵜⵉⴹⴰⴼ ⵏⵏⵙ ⴷ ⵓⵙⴼⵙⵉ ⵏ ⵜⵎⵓⵛⴰ ⵅⴼ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵙⵖⵡⴰⵏ ⵉⴳⵔⴰⵖⵍⴰⵏⵏ ⵉⵣⴷⵉⵏ ⴷ ⵓⵣⵔⴼ ⴳ ⵜⵓⴷⵔⵜ, ⴷ ⵜⵏⴼⵔⵓⵜ ⵏ ⵡⵓⴳⴳⵉⴷⵏ, ⴷ ⵉⵣⵔⴼⴰⵏ ⵏ ⵉⵛⵉⵔⵔⴰⵏ, ⴷ ⵓⵎⵏⵣⴰⵢ ⵏ ⵡⴰⵔ ⴰⵎⵏⴰⵍⴰ ⵉ ⵓⵎⵄⴰⵍⴰ  ⴰⵎⵜⵜⴰⵖⴰⵍ ⴷ ⵓⵙⵓⴷⵔⵙ ⵣⴳ ⵡⴰⴷⴷⵓⵔ ⴷ ⵓⵙⵏⵓⵃⵢⵓ ⴷ ⴳⴰⵔ ⵓⵜⵛⵉ, ⴳ ⵓⵎⵏⵉⴷ ⵏ ⵓⵙⵎⴷ ⵏ ⵉⵔⵣⵣⵓⵜⵏ ⴷ ⵓⵙⵎⵓⵏ ⵏ ⵜⵎⵓⵛⴰ ⵜⵉⵎⵢⴰⵏⴰⵡⵉⵏ ⵍⵍⵉ ⵉⵣⵎⵔⵏ ⴰⴷ ⴰⵖ ⵜⴰⵊⵊ ⴹⴰⵕⵜ ⵏ ⵓⵢⴰ ⴰⴷ ⵏⵙⵙⵓⴼⵖ  ⵢⴰⵜ ⵜⴰⵏⴰⴹⵜ ⵙ ⵓⴳⴰⵔ ⵏ ⵉⴼⵔⵓⵔⵉⵜⵏ.

I. ⵜⴰⵎⵢⴰⴷⴰⵙⵜ ⵏ ⵜⵉⴹⴰⴼ

ⴱⴰⵛ ⴰⴷ ⵉⵙⴷⵓⵙ ⵜⵉⴹⴰⴼ ⴷ ⵓⴹⴼⴼⵓⵕ ⴳ ⵓⴱⴰⵔⴰⵣ ⵏ ⵓⵙⴰⵢⵔⴰⵔ ⴰⵎⴰⵜⴰⵢ ⴷ ⵓⵙⴰⵢⵔⴰⵔ ⴰⵎⵓⵟⵟⵓⵏ, ⵙ ⵢⴰⵏ ⵜⴰⵍⵖⴰ ⵜⴰⵅⴰⵜⴰⵔⵜ, ⵜⴳⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵡⴰⵙⵙ ⵏ 29 ⵢⵓⵍⵢⵓⵣ 2026 ⵜⴰⵙⵇⵇⵉⵎⵜ ⵏ ⵜⵖⴹⴼⵜ ⴷ ⵓⵣⴷⴷⵓⵢ ⴷ ⵓⴹⴼⴼⵓⵕ, ⵏⵏⴰ ⵉⵜⵜⵓⴳⴰⵏ ⵣⴳ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵓⵙⵏⵇⵔ ⴷ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵟⴰⵡⵉⵏ-ⵍⵃⵓⵙⵉⵎⴰ, ⵙ ⵜⵎⵏⵜⵉⵍⵜ ⵏ ⵓⵣⵎⵎⴻⵎ ⵏ ⵡⴰⴷⴷⴰⴷⵏ ⵏ ⵜⴰⵏⴹⵡⴰ ⵜⴰⵎⴳⵔⵓⵜ ⵊⴰⵊ ⵏ ⵜⵏⴱⴹⴰⵢⵜ ⵏⵏⵙⵏⵜ ⵜⴰⴷⵖⵔⴰⵏⵜ, ⴷ ⴳ ⵜⵎⵏⴰⴹⵜ ⵏ ⵜⴰⴷⴷⴰⵔⵜ ⵜⴰⵎⵍⵍⴰⵍⵜ-ⵙⵟⵟⴰⵜ, ⵙ ⵜⵎⵏⵜⵉⵍⵜ ⵏ ⵓⵢⵏⵏⴰ ⵉⵣⵎⵎⴻⵎ ⵓⵙⵇⵇⵉⵎ ⵣⴳ ⵓⵙⵏⴼⵍ ⵏⵏⵙ ⵖⵔ ⵢⴰⵏ ⵡⴰⵏⵙⴰ ⵏ ⵓⵙⵎⵓⵏ ⴷ ⵡⴰⵙⵙⴰⵢ ⵏ ⵜⵏⵎⵓⵔⴰ ⴷ ⵉⵏⵎⵓⵔⴰⵏⵏ ⵖⵔ ⵜⵎⴷⵉⵏⵜ ⵏ ⵍⴼⵏⵉⴷⵇ, ⴰⴽⴷ ⵜⵎⵀⵍⴰ ⵏ ⵜⵉⴹⴰⴼ ⴷ ⵜⵎⵀⵍⴰ ⵏ ⵓⵎⵢⴰⵡⴰⴹ ⴷ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵓⵏⵏⴰ ⵉⵍⵍⴰⵏ ⵅⴼ  ⵜⵎⵙⴽⵉⵔⵜ ⵖⵔ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ.

ⴰⵔ ⵉⵜⵜⴹⴼⴰⵕ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⴳ ⵓⴱⴰⵔⴰⵣ ⴳ ⵎⴰⵕⵕⴰ ⵜⵉⵎⴷⵉⵏⵉⵏ ⵍⵍⵉ ⵉⵙⵙⵏⵏ ⵜⵉⴳⵔⵓⵎⵎⵉⵏ ⵏ ⵉⵄⵔⵔⵉⵎⵏ ⴷ ⵉⵛⵉⵔⵔⴰⵏ ⵏⵖⴷ ⵜⵉⵏⵏⴰ ⵉⵙⵙⵏⵏ ⵜⵉⵔⵎⵉⵜⵉⵏ ⵏ ⵜⴰⵏⴹⵡⴰ ⵜⴰⵎⴳⵔⵓⵜ. ⵙⵙⵏⵜⵎⵏⵜ ⵜⵔⵓⴱⴱⴰ ⵏ ⵜⵉⴹⴰⴼ ⴳ ⵓⴱⴰⵔⴰⵣ, ⴳ ⴱⵏⵉ ⵏⵚⴰⵕ ⵓⵍⴰ ⵜⴰⵎⴰ ⵏ ⵙⴱⵜⴰ, ⵜⵉⵔⵎⵉⵜⵉⵏ ⵜⵉⵎⵏⵏⴰⵡⵉⵏ ⵏ ⵜⴰⵏⴹⵡⴰ.

ⵜⵙⵙⵖⴷ ⵜⵔⴰⴱⴱⵓⵜ ⵏ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵉ ⵜⵓⴳⴳⵉⵡⵉⵏ ⵏ ⵉⵄⵔⵔⵉⵎⵏ ⴷ ⵉⵛⵉⵔⵔⴰⵏⴰⵏ, ⴳ ⵓⵎⵓⴷⴷⵓ ⵏ ⵓⴽⵛⵛⵓⵎ ⵉ ⵜⴰⵏⴹⵡⴰ ⵖⵔ ⵙⴱⵜⴰ ⵏⵖⴷ ⵎⵍⵉⵍⵢⴰ ⵉⵜⵜⵓⵣⴷⵖⵏ ⴳ ⵙ ⵓⵟⵟⵓⵏ ⵏ ⵜⵎⴷⵉⵏⵉⵏ ⵜⵉⵎⵖⵔⵉⴱⵉⵢⵉⵏ, ⴷ ⵉⵄⵔⵔⵉⵎⵏ ⴷ ⵉⵛⵉⵔⵔⴰⵏ ⴳ ⵜⴰⵎⴰ ⵏ ⵉⴷⵖⴰⵔⵏ ⵏ ⵜⵏⴹⵡⴰ, ⴳ ⴱⵏⵉ ⵏⵚⴰⵕ-ⵎⵍⵉⵍⵢⴰ ⴷ ⵍⴼⵏⵉⴷⵇ-ⵙⴱⵜⴰ.

ⵢⴰⵏⵏⴰⵢ ⵓⵙⵇⵇⵉⵎ ⵉⴼⵉⴷⵢⵓⵜⵏ ⴷ ⵜⵓⴳⴳⵉⵡⵉⵏ ⵉⵣⴷⵉⵏ ⴷ ⵜⵏⴹⵡⴰ ⵜⴰⵎⴳⵔⵓⵜ ⴷ ⵓⵢⵏⵏⴰ ⵜⵜ ⵉⴹⴼⴰⵕⵏ ⵣⴳ ⵜⵓⵎⴰⵢⵉⵏ  ⵜⴷⴰⴱⵓⵜⵉⵏ ⵜⵉⵎⵓⵟⵟⵓⵏⵉⵏ ⵉⴽⵙ ⴷ ⵉⵏⵙⵜⴰⵖⵔⴰⵎ ⴷ ⵜⵉⴽ-ⵜⵓⴽ... ⴰⵎ ⵓⵢⵏⵏⴰ ⵜⴰⵏⵏⴰⵢ ⵜⵔⴰⴱⴱⵓⵜ ⵏ ⵜⵉⴹⴰⴼ, ⴳ ⵓⵙⵡⵉⵔ ⴰⵏⴰⵎⵎⴰⵙ, ⵓⵥⵕⵉⴳⵏ ⵏ 23 ⵏ ⵜⴳⵔⵓⵎⵎⴰ ⴳ ⴼⴰⵢⵙⴱⵓⴽ, ⵏⵏⴰ ⵉⵙⵎⵓⵏⵏ  ⵓⴳⴰⵔ ⵏ ⵢⴰⵏ ⵓⵎⵍⵢⵓⵏ ⴷ 86 ⵏ ⵉⴼⴹ ⵏ ⵓⴳⵎⴰⵎ, ⴰⵔ ⴼⵙⵙⵔⵏⵜ ⵙ ⵜⴰⵎⵓⵏⵜ ⵏⵏⵙⵏⵜ ⵓⵙⵏⵉⵎ ⵏ ⵓⴳⴰⵔ ⵏ 1400 ⵏ ⵜⵥⵕⵉⴳⵜ ⴳ ⵡⴰⵙⵙ, ⵜⵜⵓⵡⴰⵙⴼⴹⵏⵜ ⵙⵎⵎⵓⵙ ⵏ ⵜⴳⵔⵓⵎⵎⵉⵏ ⵜⵉⴷⵙⵍⴰⵏⵉⵏ ⵣⵉ ⴷⵉⴽⵙⵏⵜ, ⴳ ⵡⴰⵙⵙ ⵏ ⵓⴽⵡⴰⵙ 30 ⵢⵓⵍⵢⵓⵣ 2026.

II. ⴰⵏⵢⴰ ⵏ ⵜⵏⴹⵡⴰ

ⵙ ⵓⴱⴷⴰⴷ ⵅⴼ ⵜⵉⴹⴰⴼ ⴳ ⵓⴱⴰⵔⴰⵣ ⴷ ⵓⵎⵓⵟⵟⵓⵏ ⴷ ⵓⵏⵖⵎⴰⵙ ⴷ ⵓⵢⵏⵏⴰ ⵉⵣⵎⵎⴻⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵣⴳ ⵢⵓⵏⵢⵓ ⵉⵣⵔⵉⵏ, ⴰⵔ ⵉⵙⵙⵎⵏⵉⴷ ⵓⵙⵇⵇⵉⵎ ⵜⴰⴽⵔⵓⵏⵓⵍⵓⵊⵉⵜ ⵏ "ⵜⵏⴹⵡⴰ ⵏ ⵜⵏⵎⵓⵔⴰ ⴷ ⵉⵏⵎⵓⵔⴰⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ" ⵖⵔ ⵙⴱⵜⴰ ⵏⵖⴷ ⵎⵍⵉⵍⵢⴰ:

16 ⵢⵓⵏⵢⵓ 2026: ⴰⵎⴰⵥ ⵏ 30 ⵏ ⵓⵎⵏⴽⴰⴷ ⵉ ⵜⴰⵣⵡⴰⴳⵜ ⵖⵔ ⵓⵕⵓⴱⴱⴰ ⴳ ⵜⵎⴷⵉⵏⵜ ⵏ ⵏⵏⴰⴹⵓⵕ؛

23 ⵢⵓⵏⵢⵓ 2026: ⴰⵎⴰⵥ ⵏ ⵡⴰⵜⵜⴰⵢⵏ  ⵏ 30 ⵏ ⵓⵎⵏⴽⴰⴷ ⵉ ⵜⵣⵡⴰⴳⵜ ⴳ ⵙⵓⵙ ⵎⴰⵙⵙⴰ ⵖⵔ ⵜⴰⵏⵉⵍⴰ ⵏ ⵜⴳⵣⵉⵔⵉⵏ ⵜⵉⴽⵏⴰⵔⵉⵢⵉⵏ؛

30 ⵢⵓⵏⵢⵓ 2026: ⴰⵙⵇⵚⵃ ⵏ ⵜⵉⴹⴰⴼ ⵜⴰⵏⴼⵔⵓⵜ ⴳ ⵍⴼⵏⵉⴷⵇ ⴷ ⵓⵙⴷⵓⵙ ⵏ ⵜⵉⵍⵉⵜ ⵜⴰⵏⴼⵔⵓⵜ ⴳ ⵎⵏⵏⴰⵡⵜ ⵜⵉⴼⵔⵉⵡⵉⵏ ⴰⵙⴷⵓⵙ ⵏ ⵓⵎⴰⵜⵔ ⵏ ⵜⵏⴼⵔⵓⵜ ⴳ ⵎⵏⵏⴰⵡ ⵏ ⵉⴷⵖⴰⵔⵏ ⵉⵎⴳⴷⴰⵍⵏ ⴷ ⵉⴼⵜⴰⵙⵏ ⵉⵏⵎⴰⵍⴰⵏ ⵣⴳ ⵜⵎⴷⵉⵏⵜ, ⵙ ⵓⵎⵙⴰⵙⴰ ⴰⴽⴷ ⵓⵢⵏⵏⴰ ⴼⵙⵔⵏ ⵉⵎⴰⵙⵙⵏ ⵉⵏⵖⵎⴰⵙⵏ  ⵉⵏⴰⵎⵓⵔⵏ؛

8 ⵢⵓⵍⵢⵓⵣ 2026: ⴰⴼⵙⴰⵔ ⵏ ⵓⵖⵜⴰⵙ ⵏ ⵜⵙⵏⴱⴹⴰⵢⵜ ⵜⴰⵚⴱⵍⵢⵓⵏⵉⵜ ⵜⴰⵏⴰⴼⵍⵍⴰⵜ ⵓⵟⵟⵓⵏ 814/2026 ⵏⵏⴰ ⵉⵙⴷⵉⴷⴷⵏ ⵎⴰⵙ ⴳ ⵡⴰⴷⴷⴰⴷ ⵏ ⵡⴰⵎⴰⵥ ⵏ ⵉⵎⵣⵡⴰⴳⵏ ⴳ ⵢⵉⵍⵍ, ⵓⵔ ⵉⵥⴹⴰⵕ ⴰⴷ ⵜⵜⵡⴰⵙⵔⵙⵏ ⴳ ⵓⵏⴰⴳⵔⴰⵡ ⵏ ⵜⵔⴰⵔⵉⵜ ⴰⴷⵖⵢⴰⵏⴹⴰⵕⵜ ⵏ ⵉⵡⵜⵜⴰ, ⵎⴰⵛⴰ ⴰⵔ ⵜⵜⵓⴳⴰⵏⵜ ⵖⵉⴼⵙⵏ ⵜⵖⴰⵔⴰⵙⵉⵏ ⵏ ⵜⵔⴰⵔⵉⵜ ⵉⵜⵜⵓⵣⵎⵎⴻⵎⵏ ⴳ ⵓⵙⵍⴳⵏ ⵏ ⵉⴱⵕⵕⴰⵏⵉⵢⵏ؛

8 ⵢⵓⵍⵢⵓⵣ 2026: ⵜⵉⴹⴰⴼ ⵏ ⵜⵓⵎⴰⵢⵜ ⵜⴰⵎⵣⵡⴰⵔⵓⵜ ⵏⵏⴰ ⴳ ⵜⵍⵍⴰ ⵜⴽⵏⴷⴰⵡⵜ ⴳ ⵜⴰⵙⵏⴰ ⵏ ⴼⴰⵢⵙⴱⵓⴽ ⴰⵔ ⵜⴼⵙⵙⵔ ⵜⵓⵎⴰⵢⵉⵏ ⵅⴼ ⵜⴰⵣⵡⴰⴳⵜ, ⴷ ⵅⴼ ⵚⴱⵍⵢⵓⵏ, ⴷ ⵅⴼ ⵉⵎⵖⵔⵉⴱⵉⵢⵏ ⴳ ⵚⴱⵍⵢⵓⵏ (...), ⵉⵣⵔⵉ ⵡⵓⵟⵟⵓⵏ ⵏ ⵉⵎⴹⴼⵓⵕⵏ ⵏⵏⵙ 90 ⵏ ⵢⵉⴼⴹ ⵏ ⵓⵎⴹⴼⵓⵕ, ⴰⵔ ⵉⵙⵙⵎⴰⵜⴰⵔ "ⵎⴰⵙ ⴷ ⵉⵎⵣⵡⴰⴳⵏ ⵏⵏⴰ ⵉⵜⵜⵡⴰⵎⴰⵥⵏ ⴳ ⵡⴰⵎⵎⴰⵙ ⵏ ⵢⵉⵍⵍ ⴳ ⵜⵏⴹⵡⴰ ⵖⵔ ⵙⴱⵜⴰ ⵏⵖⴷ ⵎⵍⵉⵍⵢⴰ ⵙ ⵓⵛⵓⵛⴼ ⵓⵔ ⴷⴰ ⵜⵜⵓⵡⴰⵔⵔⵓⵏ " "ⵙ ⵓⵙⵉⵡⴹ" ⵣⴳ "ⵓⴽⴰⴱⴰⵕ ⴰⵏⴱⴰⴹⴰⵏ ⴰⵚⴱⵍⵢⵓⵏⵉ", ⴰⵎ ⵓⵢⵏⵏⴰ ⴷ ⵉⴷⴷⴰⵏ ⴳ ⵜⵥⵕⵉⴳⵜ. ⵜⵣⵎⵎⴻⵎ ⵜⵥⵕⵉⴳⵜ ⴰⴷ ⵢⴰⵏ ⵓⵎⵔⴰⵔⴰ ⴰⵅⴰⵜⴰⵔ؛

13 ⵢⵓⵍⵢⵓⵣ 2026: ⵜⵉⴹⴰⴼ ⵏ ⵜⵓⵎⴰⵢⵜ ⴰⵔ ⵉⵙⵙⵎⴰⵜⴰⵔⵏ "ⵙ ⴰⴳⴷⴷⵓⵍ ⵏ ⵜⵙⵏⴱⴹⴰⵢⵜ ⵜⴰⵚⴱⵍⵢⵓⵏⵉⵜ ⵜⴰⵏⴰⴼⵍⵍⴰⵜ ⵉ ⵜⵔⴰⵔⵉⵜ ⵜⴰⴷⵖⵔⴰⵏⵜ ⵏ ⵉⵎⵣⵡⴰⴳⵏ" ⵊⴰⵊ ⵏ ⵜⴳⵔⵓⵎⵎⴰ ⵜⵍⵍⴰ ⴳⵉⵙ ⴷⴰⵜ ⵏ ⵎⴰ ⵜⵜⵓⵙⴼⴹ ⵓⴳⴰⵔ ⵏ 124 ⵏ ⵢⵉⴼⴹ ⵏ ⵓⴳⵎⴰⵎ ⴰⵔ ⵜⵜⵣⵓⵣⵣⵓⵔ ⵓⵙⵏⵉⵎ ⵏ 231 ⵏ ⵜⵥⵕⵉⴳⵜ ⴳ ⵡⴰⵙⵙ؛

14 ⵢⵓⵍⵢⵓⵣ 2026: ⵜⵉⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⴰⵔ ⵜⵜⴰⵎⵎⵏ ⵜⴰⵣⵡⴰⴳⵜ ⵏ 20 ⵏ ⵡⵓⴳⴳⵉⴷ ⵣⴳ ⵏⵏⴰⴹⵓⵕ؛

15 ⵢⵓⵍⵢⵓⵣ 2026: ⵜⴰⵢⵍⴰⵏⵜ ⵜⴰⴳⵍⴷⴰⵏⵜ ⵜⴰⵎⵖⵔⵉⴱⵉⵜ ⴰⵔ ⵜⵜⴰⵎⵎ ⵜⵉⵔⵎⵉⵜ ⵏ ⵜⴰⵣⵡⴰⴳⵜ ⵜⴰⵎⴳⵔⵓⵜ ⵏ 50 ⵏ ⵡⵓⴳⴳⵉⴷ ⵖⵔ ⵙⴱⵜⴰ ⵣⴳ ⵍⴼⵏⵉⴷⵇ؛

17 ⵢⵓⵍⵢⵓⵣ 2026: ⵜⴰⵢⵍⴰⵏⵜ ⵜⴰⴳⵍⴷⴰⵏⵜ ⵜⴰⵎⵖⵔⵉⴱⵉⵜ ⴰⵔ ⵜⵜⴰⵎⵎ ⴰⴽⵛⵛⵓⵎ ⴰⵎⴳⵔⵓ ⵏ ⵜⵎⵔⴰⵡⵉⵏ ⵏ  ⵉⵎⵣⵡⴰⴳⵏ ⵙ ⵓⵛⵓⵛⴼ ⵖⵔ ⵙⴱⵜⴰ؛

19 ⵢⵓⵍⵢⵓⵣ 2026: ⴰⵎⴰⵥ ⵏ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⵉ ⵜⵉⵔⵎⵉⵜ ⵏ ⵜⴰⵣⵡⴰⴳⵜ ⵜⴰⵎⴳⵔⵓⵜ ⵏ 200 ⵏ ⵡⵓⴳⴳⵉⴷ ⵣⴳ ⵜⴰⵔⴰⵅⴰⵍ ⴷ ⴱⵍⵢⵓⵏⵛ؛

15-27 ⵢⵓⵍⵢⵓⵣ 2026: ⴰⵣⵎⵎⴻⵎ ⵏ 1500 ⵏ ⵡⴰⴷⴷⴰⴷ ⵏ ⵜⴰⵣⵡⴰⴳⵜ ⵖⵔ ⵙⴱⵜⴰ ⵣⴳ ⵉⵎⵅⴰⵜⴰⵔⵏ ⴷ ⵡⵓⵎⵥⵉⵢⵏ؛

28 ⵢⵓⵍⵢⵓⵣ 2026: ⴰⵡⴰⴹ ⵏ ⵢⴰⵜ ⵜⵄⵔⵔⵉⵎⵜ ⵣⴳ ⵜⵎⴷⵉⵏⵜ ⵏ ⵍⵄⵔⴰⵢⵛ ⵖⵔ ⵙⴱⵜⴰ ⵙ ⵓⵛⵓⵛⴼ. ⵡⴰⵅⵅⴰ ⵜⵏⴹⵓ ⵢⴰⵜ ⵜⵉⴳⵔⵓⵎⵎⴰ ⵏ ⵉⵎⵏⴹⴰⵡⵏ ⴳ ⵓⵙⴰⴽⵓⴷ ⵏ 28 ⵢⵓⵍⵢⵓⵣ ⵜⵣⵔⵉ 100 ⵏ ⵡⵓⴳⴳⵉⴷ ⴳ ⵡⴰⵙⵙ ⴰⴷ, ⵜⴰⵖⵓⵍ ⴰⵔ ⵜⵜⵡⵔⵔⴰⵄ ⵜⵡⵍⴰⴼⵜ ⵏ ⵜⵄⵔⵔⵉⵎⵜ ⴷ ⵜⵎⴷⴷⴰⴽⵯⵜ ⵏⵏⵙ ⴰⵔ ⵜⵜⴰⵙⵉⵏⵜ ⵜⴰⵎⴰⵜⴰⵔⵜ ⵏ ⵜⵔⵏⴰⵡⵜ ⴹⴰⵕⵜ ⵏ ⵡⴰⵡⴰⴹ ⵖⵔ ⵙⴱⵜⴰ ⵙ ⵢⴰⵜ ⵜⵎⴰⵎⴽⵜ ⵜⴰⵅⴰⵜⴰⵔⵜ ⴰⵍⵍⵉⴳ ⵜⴳⴰ ⵢⴰⵜ ⵜⵎⵜⵜⴰ ⵜⴰⵏⵖⵎⴰⵙⵜ  ⵏ ⵜⴽⵏⴷⴰⵡⵜ ⵙ ⵓⴱⴷⴰⴷ ⵅⴼ ⵓⴼⴰⵙⵔ ⵡⴰⵔ ⴰⵏⵥⴰⵥ ⵏⵖⴷ ⵏⵏⴰ ⵓⵔ ⵉⵎⵓⵏ ⴷ ⵓⵏⴰⵎⴽ ⵏ ⵡⵓⵖⵜⴰⵙ ⵏ ⵜⵙⵏⴱⴹⴰⵢⵜ ⵜⴰⵚⴱⵍⵢⵓⵏⵉⵜ ⵜⴰⵏⴰⴼⵍⵍⴰⵜ؛

29 ⵢⵓⵍⵢⵓⵣ 2026: ⴰⵔⵣⴰⵢ ⵏ ⵉⵏⵖⵎⵉⵙⵏ ⴷ ⵜⵓⵎⴰⵢⵜ ⵊⴰⵊ ⵏ ⵉⵙⴰⵢⵔⴰⵔⵏ ⵉⵎⵓⵟⵟⵓⵏⵏ ⴳ ⵢⵉⴹ ⵏ ⵓⴽⵕⴰⵙ ⴷ ⵓⴽⵡⴰⵙ ⵏⵏⴰ ⴰⵔ ⵉⵙⵙⵎⴰⵜⴰⵔⵏ ⵎⴰⵙ ⵏⵏⵓⵕⵥⵎⵏ "ⵉⵡⵜⵜⴰ" ؛

29-30 ⵢⵓⵍⵢⵓⵣ 2026: ⴰⵡⴰⴹ ⵏ ⵡⵓⵟⵟⵓⵏⵏ ⵉⵎⵇⵕⴰⵏⵏ ⵏ ⵉⵄⵔⵔⵉⵎⵏ ⴷ ⵡⵓⵎⵥⵉⵢⵏ ⴷ ⵜⵡⵊⵉⵡⵉⵏ ⵖⵔ ⵜⵎⴷⵉⵏⵜ ⵏ ⵍⴼⵏⵉⴷⵇ, ⴷ ⵓⵙⴼⴰⵍ ⵏ ⵜⵎⵀⵍⵜ ⵏ ⵜⵏⴹⵡⴰ ⵜⴰⵎⴳⵔⵓⵜ. ⴳ ⵜⵎⵀⵍⵉⵡⵉⵏ ⵏ ⵓⵔⵣⵣⵓ ⴳ ⵓⴱⴰⵔⴰⵣ ⵏ ⵜⵔⵓⴱⴱⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰⵏⵜ ⵉⵜⵙⵏⵜ ⵜⴳⵔⵓⵎⵎⵉⵏ ⵜⵉⵎⵢⴰⵏⴰⵡⵉⵏ ⵏ ⵉⵄⵔⵔⵉⵎⵏ ⵎⴰⵙ ⵟⵟⴼⵏⵜ  ⵜⵉⴱⵔⴰⵜⵉⵏ ⴳ ⵡⴰⵜⵙⴰⴱ ⴰⵔ ⴰⵙⵏ ⵇⵇⴰⵔⵏⵜ ⴰⴷ ⴷⴷⵓⵏⵜ ⵖⵔ ⵜⴰⵡⵡⵓⵔⵜ ⵏ ⵜⵏⴹⵡⴰ ⴹⴰⵕⵜ ⵏ ⵡⴰⵎⵎⴰⵙ ⵏ ⵢⵉⴹ ⵉ ⵜⵏⴹⵡⴰ ⵜⴰⵎⴳⵔⵓⵜ ⵖⵔ ⵙⴱⵜⴰ؛

30 ⵢⵓⵍⵢⵓⵣ 2026: ⵜⴰⵏⴹⵡⴰ ⵏ ⵉⴼⴹⴰⵏ ⵏ ⵜⵏⵎⵓⵔⴰ ⴷ ⵉⵏⵎⵓⵔⴰⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ, ⴳⵉⵙⵏ ⵉⵛⵉⵔⵔⴰⵏ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ ⴷ ⵜⵎⵖⴰⵔⵉⵏ ⵖⵔ ⵜⵎⴷⵉⵏⵜ ⵏ ⵙⴱⵜⴰ. ⴰⵢⴰ ⵢⵓⵊⵊⴰ  ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵉ "ⵓⴳⴷⴷⵓⵍ" ⵏ ⵓⵎⵓⴷⴷⵓ ⴷ ⵜⴰⵏⴹⵡⴰ ⵖⵔ ⵙⴱⵜⴰ ⵉ ⵜⴳⵔⵓⵎⵎⴰ ⵏ ⵉⵄⵔⵔⵉⵎⵏ ⴷ ⵡⵓⵎⵥⵉⵢⵏ,  ⴰⴷ ⵎⵏⴰⵍⴰⵏ ⴰⴽⴷ ⵜⵉⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ؛

30 ⵢⵓⵍⵢⵓⵣ 2026: ⴰⴽⵛⵛⵓⵎ ⵏ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ ⴱⴰⵛ ⴰⴷ ⵖⵜⵍⵏ ⵜⵉⵔⵎⵉⵜⵉⵏ ⵏ ⵜⵏⴹⵡⴰ ⵖⵔ ⵎⵍⵉⵍⵢⴰ ⴳ ⵜⴰⵎⴰ ⵏ ⴱⵏⵉ ⵏⵚⴰⵕ ⴷ ⴼⴰⵔⵅⴰⵏⴰ ⴷ ⵉⴱⵔⴷⴰⵏ ⵉⵏⵎⴰⵍⴰⵏ ⵣⴳ ⵓⴼⵔⴰⴳ ⴷ ⵓⴼⵜⴰⵙ. ⵜⵣⵎⵎⴻⵎ ⵜⵔⴰⴱⴱⵓⵜ ⵏ ⵓⵙⵇⵇⵉⵎ ⴰⴷⴷⴰⴷⵏ ⵜⴳⵓⵔⵉ ⵙ ⵉⵥⵕⴰ ⴷ ⵓⵙⵙⴽⵯⵎⴹ ⵏ ⵜⵀⵉⵔⵔⵉⵜⵉⵏ ⵜⵓⵙⵍⵉⴳⵉⵏ ⴷ ⵜⵉⵢⵢⴰⴹ ⵏ ⵜⵏⴱⴰⴹⵉⵏ ⴷ ⵓⵙⵓⴳⵉ ⵅⴼ ⵡⴰⵢⴷⴰⵜⵏ ⵉⴳⴷⵓⴷⴰⵏⵏ؛

29-30-31 ⵢⵓⵍⵢⵓⵣ 2026: ⵜⵉⴹⴰⴼ ⵏ ⵖⴰⵔⴰⵙⵉⵏ ⵏ "ⵓⴳⴷⴷⵓⵍ" ⵏ ⵓⵎⵓⵜⵜⵉ ⵙ ⵡⴰⵎⴰⵥ ⵏ ⵡⵓⵟⵟⵓⵏ ⵏ ⵉⵎⵓⴷⴷⵓⵜⵏ ⵍⵍⵉ ⵉⴷⴷⴰⵏ ⵖⵔ ⵜⵎⴷⵉⵏⵉⵏ ⵏ ⵓⴳⴰⴼⴰⵢ, ⵍⵓⵎⵎⵏ ⴳ ⵉⵙⵔⵙ ⵉⴱⵔⴷⴰⵏⵏ ⴷ/ⵏⵖⴷ ⵉⵙⵔⴰⵙ ⵏ ⵓⵍⴰⵡⴰⵢ ⴳ ⵜⵎⴷⵉⵏⵉⵏ ⵏ ⵜⴰⴷⴷⴰⵔⵜ ⵜⴰⵎⵍⵍⴰⵍⵜ, ⵍⵎⵃⵎⵎⴰⴷⵉⵢⴰ, ⵊⴷⵉⴷⴰ, ⵇⵏⵉⵟⵔⴰ, ⴼⴰⵙ, ⵡⵊⴷⴰ, ⵉⵏⵣⴳⴰⵏ, ⵎⵕⵕⴰⴽⵛ, ⵇⵚⵕ ⵍⴽⴱⵉⵔ...؛

31 ⵢⵓⵍⵢⵓⵣ 2026: ⵜⴰⵔⴳⵍⴰ ⵏ ⵜⵃⵓⵏⴰ ⴳ ⵙⴱⵜⴰ ⵙ ⵓⵎⵙⴰⵙⴰ ⴰⴽⴷ ⵓⵖⵜⴰⵙ ⵏ "ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⴷⵖⴰⵔⴰⵏⵜ" ⴷ ⵙ ⵓⴱⴷⴰⴷ ⵅⴼ "ⵜⵓⵜⵔⴰ" ⵏ ⵍⴱⵓⵍⵉⵙ ⴰⴷⵖⵔⴰⵏ (ⵙ ⵓⵎⵙⴰⵙⴰ ⴰⴽⴷ ⵓⵙⵉⵡⴹ ⴰⵎⴰⴷⴷⵓⴷ ⵏ ⵜⴽⵓⵏⴼⵉⴷⵉⵔⴰⵍⵉⵜ ⵏ ⵉⴷ ⴱⴰⴱ ⵏ ⵜⵎⵙⵙⵏⵜⴰⵢ ⴳ ⵙⴱⵜⴰ)؛

31 ⵢⵓⵍⵢⵓⵣ 2026: ⴰⵏⵜⴰⵎ ⵏ ⵜⵎⵢⵢⴰⵖⵉⵏ ⵏ ⵡⴰⵍⴰⵙ ⵙ ⵓⵎⵅⴰⵙ ⵏ ⵉⵏⵊⴷⴰ. ⴰⵎ ⵓⵢⵏⵏⴰ ⵜⴰⵏⵏⴰⵢ ⵜⵔⴰⴱⴱⵓⵜ ⵏ ⵜⵉⴹⴰⴼ ⴳ ⵓⴱⴰⵔⴰⵣ ⴳ ⵡⴰⵍⴰⵙ ⵙ ⵓⵎⵅⴰⵙ  ⴷ ⴰⵡⴷ ⵉⴹⵉⵚⵏ ⵏ ⵓⵄⵎⵓⴷ ⴷ ⵉⵣⵎⵎⵓⵍⵏ ⵅⴼ ⵜⴰⵣⵣⵉⵜ ⵏ ⵉⵄⵔⵔⵉⵎⵏ, ⵏⵏⴰ ⴳ ⵍⵍⴰⵏ ⵡⵉⵏⵏⴰ ⵓⵔ ⵉⵖⵉⵏ ⵉ ⵜⵡⴰⴷⴰ ⵙ ⵜⵎⵏⵜⵉⵍⵜ ⵏ ⵜⴰⵢⵜⵉ ⴷ ⵓⵄⴰⴼⵓⵙ ⵏⵖⴷ ⵙ ⵜⵎⵏⵜⵉⵍⵜ ⵏ ⵓⵡⵃⴰⵍ ⴷ ⵓⵓⴷⵄⴰⵇ(...) 

1 ⵖⵓⵛⵜ 2026: ⵜⵉⴹⴰⴼ ⵏ ⵓⵙⵎⵓⵙⵙⵓ ⵏ ⵜⵏⴱⴰⴹⵉⵏ ⵉ ⵉⵏⵙⵎⵓⴷⴷⴰ ⴷ ⵜⵀⵉⵔⵔⵉⵜⵉⵏ ⵏ ⵡⴰⵙⵙⴰⵢ ⴱⴰⵛ ⴰⴷ ⵙⵏⵉⵏ ⵡⵓⴳⴳⵉⴷⵏ ⵣⴳ ⵜⵎⴷⵉⵏⵜ ⵏ ⵍⴼⵏⵉⴷⵇ ⵖⵔ ⵜⵎⴷⵉⵏⵉⵏ ⵏⵏⵙⵏ ⵜⵉⵥⵓⵕⴰⵏⵉⵏ, ⴹⴰⵕⵜ ⵏ ⵜⵡⵓⵔⵔⵉⵜ ⵏⵏⵙⵏ ⵣⴳ ⵜⵎⴷⵉⵏⵜ ⵏ ⵙⴱⵜⴰ؛

1 ⵖⵓⵛⵜ 2026: ⴰⵡⴰⴹ ⵏ ⵜⴳⵔⵓⵎⵎⵉⵏ ⵖⵔ ⵜⵎⴷⵉⵏⵜ ⵏ ⵙⴱⵜⴰ ⵉⴹⴼⵕⵏ ⵉ ⵢⴰⵜ ⵜⴳⵔⵓⵎⵎⴰ ⴰⵔ ⵜⵜⵇⵇⴰⵔ ⵉ ⵉⵅⴼ ⵏⵏⵙ ⵉⵙⵎ ⵏ "ⴰⵖⵢⴰⵢ ⴰⵏⴰⵎⵓⵔ" ⴳ ⵚⴱⵍⵢⵓⵏ, ⵜⵜⵓⵡⴰⵙⵏⵎⵍⴰⵏ ⵊⴰⵊ ⵏ “ⵉⵏⴰⵣⵉⵢⵏ ⵉⵎⴰⵢⵏⵓⵜⵏ”. ⵜⵣⵓⵣⵣⵔ ⵜⴳⵔⵓⵎⵎⴰ ⴰⴷ ⵢⴰⵏ ⵓⵙⵉⵡⴹ ⵏ ⵓⵙⵎⵓⵙⵙⵓ ⴳ ⵡⴰⵙⵙ ⵏ 31 ⵢⵓⵍⵢⵓⵣ ⴱⴰⵛ ⴰⴷ ⵎⵣⵖⵏ ⵅⴼ ⵙⴱⵜⴰ ⴷ ⵓⴼⵔⴰⴳ ⵏⵏⵙ ⵎⵏⵉⴷ ⵏ “ⵡⴰⵍⵉⴽ”. ⵙⵙⵏⵜⵎⵏⵜ ⵎⵏⵏⴰⵡ ⵏ ⵉⴼⵉⴷⵢⵓⵜⵏ ⵜⴼⵓⵀⵔⵉⵜⵉⵏ, ⴷ ⵉⵙⴷⵉⴷⴷⵉⵢⵏ ,ⵉⴹⴼⴼⵓⵕⵏ ⴷ ⵜⴽⵕⴹⵉ ⵉ ⵉⵏⵊⴷⴰ ⴷ ⵉⵎⵣⴷⴰⵖ ⵏ ⵙⴱⵜⴰ, ⵍⵓⵎⵎⵏ ⵉⵏⵎⵙⵍⵎⵏ. ⵉⵅⵚⵚⴰ ⴰⴷ ⵏⵉⵏⵉ ⵎⴰⵙ ⵜⴰⴳⵔⵓⵎⵎⴰ ⴰⴷ ⵜⵜⵡⴰⵙⵙⵏ ⵙ ⵓⴽⵙⴰⵏ ⵏⵏⵙ ⴰⵅⴰⵜⴰⵔ ⵉ ⵉⵎⵣⵡⴰⴳⵏ/ⵜⵎⵣⵡⴰⴳⵉⵏ ⴷ ⵉⵏⵙⵍⵎⵏ/ⵜⵏⵙⵍⵎⵉⵏ؛

2 ⵖⵓⵛⵜ 2026: ⴰⵙⵎⴰⵍ ⵏ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⵅⴼ ⵜⴰⵏⴹⵡⴰ ⵏ 40000 ⵏ ⵡⵓⴳⴳⵉⴷ ⵖⵔ ⵜⵎⴷⵉⵏⵜ ⵏ ⵙⴱⵜⴰ ⴷ 1135 ⵏ ⵡⵓⴳⴳⵉⴷ ⵖⵔ ⵜⵎⴷⵉⵏⵜ ⵏ ⵎⵍⵉⵍⵢⴰ, ⴷ ⵜⵎⵜⵜⴰⵏⵜ ⵏ 11 ⵏ ⵡⵓⴳⴳⵉⴷ, ⴳ ⵓⵎⵏⵉⴷ ⵏⵏⴰ ⴳ ⵙⵙⵎⵉⵔⵏⵜ ⵜⵏⴱⴰⴹⵉⵏ ⵏ ⵙⴱⵜⴰ ⵉⵜⵜⵓⵣⴷⵖⵏ ⵅⴼ ⵜⴰⵏⴹⵡⴰ ⵏ 50 ⵏ ⵢⵉⴼⴹ ⵏ ⵡⵓⴳⴳⵉⴷ ⵉⵍⵎⵎⴰ 60 ⵏ ⵢⵉⴼⴹ ⵏ ⵡⵓⴳⴳⵉⴷ, ⴷⴰⵜ ⵎⴰ ⵉⵜⵜⵓⵙⵙⵎⵉⵔ 72 ⵏ ⵢⵉⴼⴹ ⵏ ⵡⵓⴳⴳⵉⴷ, ⵙ ⵓⵎⵙⴰⵙⴰ ⴰⴽⴷ ⵉⵙⵓⴳⵜⵏ ⵉⵚⴱⵍⵢⵓⵏⵉⵢⵏ, ⴷ ⵜⵎⵜⵜⴰⵏⵜ ⵏ 80 ⵏ ⵡⵓⴳⴳⵉⴷ. ⴰⵔ ⵉⵜⵜⵣⵎⵎⴰⵎ ⵓⵙⵇⵇⵉⵎ ⴰⵎⵢⴰⴳⴰⵔ ⵏ ⵜⵎⵓⵛⴰ ⵜⵉⵚⴱⵍⵢⵓⵏⵉⵢⵉⵏ ⵉⵣⴷⵉ ⴰⵡⴷ ⴷ ⵓⵟⵟⵓⵏ ⵏ ⵡⵓⴳⴳⵉⴷⵏ ⵍⵍⵉ ⵉⵖⵜⵙⵏ ⵓⵖⵓⵍ ⵙ ⵓⵎⵅⴰⵙ ⵏⵏⵙⵏ ⴷ ⵓⵟⵟⵓⵏ ⵏ ⵡⵉⵏⵏⴰ ⵉⵖⵜⵙⵏ ⴰⴷ ⵇⵇⵉⵎⵉⵏ, ⴷ ⴰⴽⴷ ⵓⵟⵟⵓⵏ ⵏ ⵉⵛⵉⵔⵔⴰⵏ ⵡⴰⵔ ⵜⴰⵎⵓⵏⵜ ⵍⵍⵉ ⵉⵍⵍⴰⵏ ⴳ ⵙⴱⵜⴰ.

III. ⵓⵢⵏⵏⴰ ⴷ ⵓⵊⵊⴰⵏ ⵉⵎⵊⵕⵉⵜⵏ ⵏ ⵜⴽⵔⴹⵉ ⴳ ⵜⴰⵏⴹⵡⴰ ⵜⴰⵎⴳⵔⵓⵜ

ⵙ ⵓⵎⵙⴰⵙⴰ ⴰⴽⴷ ⵜⵎⵓⵛⴰ ⵉⵍⵍⴰⵏ ⵖⵔ ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵔ 6 ⵖⵓⵛⵜ 2026, ⵜⵜⵓⵡⴰⵣⵎⵎⴰⵎⵏⵜ ⵜⵎⵙⴽⴰⵔ ⴰⴷ, ⴹⴰⵕⵜ ⵏ ⵓⵙⵎⵔⵙ ⵏ ⵜⴽⵔⴹⵉ ⴷ ⵓⵙⵓⴽⵓ ⵏ ⵍⵖⴰⴼⵉⵜ ⴳ ⵡⴰⵢⴷⴰⵜⵏ ⴳ ⵡⴰⴽⵓⴷ ⵏ ⵓⴳⴷⴷⵓⵍ ⵏ ⵜⴰⵏⴹⵡⴰ ⵏ ⵜⵏⵎⵓⵔⴰ/ⵉⵏⵎⵓⵔⴰⵏ ⴷ ⵉⴱⵕⵕⴰⵏⵉⵢⵏ ⵖⵔ ⵙⴱⵜⴰ:

ⴰⵍⴰⵢ ⵏ ⵓⵟⵟⵓⵏ ⵏ ⵜⵎⵜⵜⴰⵏⵉⵏ ⵖⵔ 14 ⵏ ⵡⵓⴳⴳⵉⴷ, ⵙ ⵓⵎⵙⴰⵙⴰ ⴰⴽⴷ ⵜⵎⵓⵛⴰ ⵜⵉⵎⵖⵔⵉⴱⵉⵢⵉⵏ. ⵙ ⵢⴰⵜ ⵜⴰⵍⵖⴰ ⵉⴼⵔⵓⵔⵉⵏ ,ⴳ ⵡⴰⴽⵓⴷ ⵏⵏⴰ ⴳ ⴰⵔ ⵙⵙⵎⵉⵔⵏⵜ ⵜⵉⵏⴱⴰⴹⵉⵏ ⵏ ⵙⴱⵜⴰ  ⵅⴼ ⵜⵎⵜⵜⴰⵏⵜ ⵏ 80؛

ⵣⴳ ⵜⵏⵉⵍⴰ ⵏⵏⵙ, ⵙⵓⵍⵏ ⵉⵖⵙⵙⴰⵏ ⴳ ⵓⵙⵔⵔⵓⵙ ⵏ ⵉⵎⵜⵜⵉⵏ ⴳ ⵓⴳⴰⵏⵉ ⵏ ⵓⵙⵎⴷ ⵏ ⵜⵖⴰⵔⴰⵙⵉⵏ ⵏ ⵜⵓⴽⵣⴰ ⵖⵉⴼⵙⵏ ⴷ ⵓⵜⵉⴽⴽⵉ ⵏⵏⵙⵏ ⵉ ⵜⵡⵊⵉⵡⵉⵏ ⵏⵏⵙⵏ؛

ⵢⵉⵡⴹ ⵡⵓⵟⵟⵓⵏ ⵏ ⵉⵏⴳⴰⵙⵏ ⵉⵜⵜⵓⵣⵎⵎⴻⵎⵏ ⵊⴰⵊ ⵏ ⵓⵖⵔⵉⵎⵏ 136 ⵏ ⵡⴰⴷⴷⴰⴷ ⵏ ⵡⵓⵏⴳⵉⵙ ⴰⴼⵙⵙⴰⵙ, ⴳ ⵡⴰⴽⵓⴷ ⵏⵏⴰ ⵜⵡⵡⴰⵙⵉⵏ 13 ⵏ ⵓⵎⵜⵜⵓⵔⵙ ⵖⵔ ⵜⵎⵔⵙⴰⵍ ⵜⵉⵙⴳⵏⴼⴰⵏⵉⵏ, ⵍⵓⵎⵎⵏ ⴳ ⵡⴰⴷⴷⴰⴷⵏ ⵏ ⵜⵕⵥⵉ ⵏⵖⴷ ⵡⵉⵏ  ⵡⴰⵙⵙⴰⵔ ⵏ ⵉⵣⵣⵔⴰⵢⵏ ⵏ ⵉⴼⵙⵉⵔⵏ ⵙ ⵓⵥⵏⵥⵕ

ⵙ ⵓⵎⵙⴰⵙⴰ ⴰⴽⴷ ⵜⵎⵓⵛⴰ ⵉⵍⵍⴰⵏ ⵖⵔ ⴰⵙⵇⵇⵉⵎ, ⵜⵜⵓⵡⴰⵙⵎⵏⵉⴷⵏⵜ ⵉⵎⵛⴰⵡⴰⵕⵏ ⴷ ⵉⵊⵉⵊⵊⵉⵜⵏ ⵉⵎⵙⵏⵉⵊⵊⵉⵜⵏ ⵉ 87 ⵏ ⵓⴼⵔⴷⵉⵙ ⵣⴳ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ, ⴳ ⴳ ⵡⴰⴽⵓⴷⵏⵏⴰ  ⴳ ⵓⵔ ⵉⵜⵜⵓⵣⵎⵎⵉⵎ ⴰⵡⴷ ⵢⴰⵜⵜⵙⴳⵓⵔⵉ ⵣⴳ ⵜⵏⵉⵍⴰ ⵏ ⵜⵏⴱⴰⴹⵉⵏ ⵏ ⵚⴱⵍⵢⵓⵏ ⵅⴼ ⵡⴰⴷⴷⴰⴷⵏ ⵏⵉⵏⴳⴰⵙⵏ ⵊⴰⵊ ⵏ ⵜⴰⴳⴳⴰⵍⵉⵏ ⵏⵏⵙ ⵜⵉⴳⴷⵓⴷⴰⵏⵉⵏ؛

ⵢⵉⵡⴹ ⵡⵓⵟⵟⵓⵏ ⵏ ⵡⵉⵏⵏⴰ ⵉⵜⵜⵡⴰⵎⵥⵏ ⴹⴰⵕⵜ ⵏ ⵉⵎⵊⵕⵉⵜⵏ ⴳ ⵙⴱⵜⴰ ⴰⵜⵜⴰⵢⵏ ⵏ 100 ⵏ ⵡⵓⴳⴳⵉⴷ, ⴳⵉⵙⵏ 11 ⵏ ⵡⵓⵎⵥⵉⵢ. ⵙ ⵓⵎⵙⴰⵙⴰ ⴰⴽⴷ ⵜⵎⵓⵛⴰ ⵉⵍⵍⴰⵏ ⵖⵔ ⴰⵙⵇⵇⵉⵎ, ⵜⵜⵓⵡⴰⴹⴼⴰⵕⵏ 69 ⵏ ⵡⵓⴳⴳⵉⴷ ⴳ ⵡⴰⴷⴷⴰⴷ ⵏ ⵡⴰⵎⵎⴰⵥ ⴷ 14 ⵏ ⵡⵓⴳⴳⵉⴷ ⴳ ⵡⴰⴷⴷⴰⴷ ⵏ ⵜⵉⵍⴻⵍⵍⵉ.  ⵉⴷ ⴰⵢⵏⵏⴰ ⵉⵣⴷⵉⵏ  ⵖⵔ ⵓⵎⵥⵉⵢⵏ, ⵜⵜⵓⵡⴰⵙⵔⵙⵏ ⵚⴹⵉⵚ ⵣⵉ ⴷⵉⴽⵙⵏ ⴳ ⵡⴰⵎⵎⴰⵙⵏ ⵏ ⵓⵏⵀⵍⵍⴰ ⴰⵏⴰⵎⵓⵏⵏ ⴷ ⵜⵓⴽⴽⵉ ⵏ ⵚⵎⵎⵓⵙ ⵉ ⴰⵢⵜ ⵓⵅⴰⵎ ⵏⵏⵙⵏ. ⴰⵎ ⵓⵢⵏⵏⴰ ⵜⵜⵓⵡⴰⵔⴳⵍⵏ ⵉⵙⴷⴰⵡⵏⵏ ⵏ ⵚⴹⵉⵚ ⵏ ⵡⵓⴳⴳⵉⴷⵏ ⴱⵍⴰ ⴰⴹⴼⴼⵓⵕ ⵙ ⵜⵎⵏⵜⵉⵍⵜ ⵏ ⵜⵏⴰⴱⴱⴰⵢⵜ ⵏ ⵜⵎⵙⴽⵉⵔⵜ ⵜⴰⵏⴱⴽⴰⴹⵜ؛

ⴳ ⵓⵙⵡⵉⵔ ⵏ ⵉⵎⴰⵍⴰⴷⵏ ⵉⵎⴰⵜⵜⵉⵡⵏ ⴳ ⵜⵎⴷⵉⵏⵜ ⵏ ⵍⴼⵏⵉⴷⵇ ⴷ ⴱⴰⴱ ⵙⴱⵜⴰ, ⵢⴰⵏⵏⴰⵢ ⵓⵙⵇⵇⵉⵎ, ⵙ ⵓⴱⴷⴰⴷ ⵅⴼ ⵓⵎⵣⴰⵔⴰⵢ ⵏ ⵉⵏⵖⵎⵉⵙⵏ ⵉⵍⵍⴰⵏ ⵖⵓⵔⵙ ⴰⵔ 3 ⵖⵓⵛⵜ 2026, ⴰⵙⵓⴳⵉ ⵅⴼ ⵡⴰⵜⵜⴰⵢⵏ ⵏ 61 ⵏ ⵜⵀⵉⵔⵔⵉⵜ ⵜⵓⵙⵍⵉⴳⵜ ⴷ 15 ⵏ ⵜⵙⵏⵙⵖⴰⵍⵜ ⴷ 18 ⵏ ⵜⵀⵉⵔⵔⵉⵜ ⵉⴹⴼⴰⵕⵏ ⵉ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ؛

ⵉⴷ ⴰⵢⵏⵏⴰ ⵉⵣⴷⵉⵏ ⵖⵔ ⵉⵎⵊⵕⵉⵜⵏ ⵍⵍⵉ ⵜⵙⵙⵏ ⵜⴳⵔⴰⵡⵜ ⵏ ⴱⵏⵉ ⵏⵚⴰⵕ, ⵜⵜⵓⵢⴰⵡⵉⵏ 23 ⵏ ⵡⵓⴳⴳⵉⴷ ⵉⵜⵜⵓⵡⴰⴹⴼⴰⵕⵏ ⵖⵔ ⵜⵙⵏⴱⴹⴰⵢⵜ ⵏ ⵡⴰⵍⴰⵙ ⴳ ⵏⵏⴰⴹⵓⵕ, ⴳⵉⵙⵏ ⵙⵉⵏ ⵉⴱⵕⵕⴰⵏⵉⵢⵏ, ⴷ ⵡⴰⵡⴰⵢ  ⵏ 11 ⵏ ⵡⵓⵎⵥⵉ ⵖⵔ ⴰⵙⴰⴳⴳⵯ ⴳ ⵜⵙⵏⴱⴹⴰⵢⵜ ⵏⵏⴰ ⵏⵉⵜ؛

IV. ⵉⵎⵙⴳⵔⴰ ⵉⵎⵏⵣⴰ ⵉⵎⴰⵜⴰⵢⵏ

ⵜⴰⵏⴹⵡⴰ ⵏ ⵉⴼⴹⴰⵏ ⵏ ⵜⵏⵎⵓⵔⴰ ⴷ ⵉⵏⵎⵓⵔⴰⵏ ⴷ ⵉⴱⵕⵕⴰⵏⵉⵢⵏ ⵣⴳ ⵍⴼⵏⵉⴷⵇ ⵖⵔ ⵙⴱⵜⴰ, ⵜⵜⵓⵡⴰⵣⵎⵎⴻⵎⵏⵜ ⴹⴰⵕⵜ ⵏⵏⵙ 14 ⵏ ⵡⴰⴷⴷⴰⴷⵏ ⵏ ⵜⵎⵜⵜⴰⵏⵜ ⵙ ⵓⵎⵙⴰⵙⴰ ⴰⴽⴷ ⵜⵎⵓⵛⴰ ⵜⵉⵎⵖⵔⵉⴱⵉⵢⵉⵏ, ⴳ ⵓⵎⵏⵉⴷ ⵏⵏⴰ ⴳ ⵢⵓⵡⴹ ⵓⵟⵟⵓⵏ ⵏ ⵜⵎⵜⵜⴰⵏⵉⵏ, ⵙ ⵓⵎⵙⴰⵙⴰ ⴰⴽⴷ ⵜⵎⵓⵛⴰ ⵜⵉⵎⴰⴷⴷⵓⴷⵉⵏ ⵜⵉⵚⴱⵍⵢⵓⵏⵉⵢⵉⵏ, ⵖⵔ 80 ⵏ ⵡⴰⴷⴷⴰⴷ ⵏ ⵜⵎⵜⵜⴰⵏⵜ؛

ⵢⴰⵏⵏⴰⵢ ⵓⵙⵇⵇⵉⵎ ⵜⵉⵍⵉⵜ ⵏ ⵜⵡⵊⵉⵡⵉⵏ ⵏ ⵉⵜⵙⵏ ⵉⵎⵏⴹⴰⵡⵏ ⴳ ⴱⴰⴱ ⵙⴱⵜⴰ. ⴰⵔ ⵉⵙⴷⴷⵉⴷ ⵓⵙⵇⵇⵉⵎ ⵅⴼ ⵓⵙⵉⵣⵡⵔ ⵏ ⵓⵙⵔⵓⵙ  ⵏ ⵜⵓⵚⴽⵉⵡⵜ ⵜⴰⵎⴳⵔⵓⵜ ⴷ ⵜⴰⵎⵙⵜⴳⴳⴰⵔⵜ ⵉ ⵓⵏⵥⴰⵥ ⴳ ⵓⵟⵟⵓⵏ ⵏ ⵜⵎⵜⵜⴰⵏⵉⵏ ⴷ ⵅⴼ ⵜⴹⵓⵍⵍⵉⵜ ⵏ ⵓⵙⵔⵎⵙ ⵏ ⵎⴰⵕⵕⴰ ⵜⵉⵖⴰⵔⴰⵙⵉⵏ ⵍⵍⵉ ⵉⵜⵜⴰⵡⵙⵏ ⴳ ⵜⵓⴽⵣⴰ ⵏⵏⵙⵏ ⴷ ⵓⴹⴰⴽⴰⵍ ⵏ ⵜⵡⵓⵔⵔⵉⵜ ⵏⵏⵙⵏ ⵖⵔ ⵜⵡⵊⵉⵡⵉⵏ ⵏⵏⵙⵏ ⴱⴰⵛ ⴰⴷ ⴰⵙⵏ ⴰⴷⵔⵏ ⴳ ⵜⴼⴰⴷⵉⵡⵉⵏ ⵉⵜⵜⵡⵇⵇⴰⵔⵏ ⴰⴷⴷⵓⵔ ⴰⵏⴼⴳⴰⵏ؛

ⵉⵣⵎⵎⴻⵎ ⵓⵙⵇⵇⵉⵎ ⵜⵉⵖⴰⵔⴰⵙⵉⵏ ⵜⵉⴷⵖⵔⵉⵢⵉⵏ ⵣⴳ ⵜⵏⵉⵍⴰ ⵏ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⴳ ⵎⵏⵏⴰⵡⵜ ⵜⵎⴷⵉⵏⵉⵏ ⵜⵉⵎⵖⵔⵉⴱⵉⵢⵉⵏ ⵉ ⵓⴳⴷⴷⵓⵍ ⵏ ⵓⵎⵓⵜⵜⵉ ⵏ ⵡⵓⵟⵟⵓⵏⵏ ⵉⵎⵇⵕⴰⵏⵏ ⵏ ⵉⵄⵔⵔⵉⵎⵏ ⵖⵔ ⵜⵎⴷⵉⵏⵉⵏ ⵏ ⵓⴳⴰⴼⴰⵢ؛

ⵜⵜⵓⵡⴰⵙⵙⵏ ⵜⴰⵏⴹⵡⴰ ⵙ ⵢⴰⵏ ⵓⵏⵢⴰ ⴰⵎⵙⵙⴽⴼⵍ ⵣⵉ ⵡⴰⵙⵙ ⵏ 14 ⵢⵓⵍⵢⵓⵣ 2026. ⵉⵡⴹⵏ ⵡⴰⴷⴷⴰⴷⵏ ⵏ ⵜⵏⴹⵡⴰ  ⵢⴰⵜ ⵜⴼⵙⵏⴰ ⵜⴰⵏⴰⴼⵍⵍⴰⵜ ⴳ ⵓⵙⴰⴽⵓⴷ ⵏ 30 ⴷ 31 ⵢⵓⵍⵢⵓⵣ 2026؛

ⵜⵙⵙⵏ ⵜⵏⴹⵡⴰ ⵖⵔ ⵜⵎⴷⵉⵏⵉⵏ ⵎⵏⵏⴰⵡ ⵏ ⵜⵉⵔⵎⵉⵜⵉⵏ, ⵎⴰⵛⴰ ⵜⵣⵎⵎⴻⵎ ⵢⴰⵏ ⵓⵙⵎⵓⵙⵙⵓ ⵓⵔ ⵊⵊⵉⵏ ⵉⴽⴽⵉⵏ ⴹⴰⵕⵜ ⵏ ⵓⴼⵙⴰⵔ ⵏ ⵓⵖⵜⴰⵙ ⵏ ⵜⵙⵏⴱⴹⴰⵢⵜ ⵜⴰⵚⴱⵍⵢⵓⵏⵉⵜ ⵜⴰⵏⴰⴼⵍⵍⴰⵜ ⴷ ⵓⴼⴰⵙⵔ ⵏⵏⵙ ⵣⴳ ⵜⵏⵉⵍⴰ ⵏ ⵉⵎⴹⴼⵓⵕⵏ ⵏ ⵉⵥⴹⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ؛

ⴳⴰⵏⵜ ⵜⴳⵔⵓⵎⵎⵉⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⵢⴰt ⵜⵉⵍⴰⵍⵜ ⵜⴰⴷⵙⵍⴰⵏⵜ ⴳ ⵉⵎⵊⵕⵉⵜⵏ ⴰⴷ, ⴳ ⵓⵙⵡⵉⵔ ⵏ ⵓⴼⵙⴰⵔ, ⴰⵣⵏⵣⵉ ⴷ ⵜⵎⵙⵓⵖⵜ ⵏ ⵉⵎⴰⵙⵙⵏ ⵏ ⵓⵛⵓⵛⴼ, ⵜⵉⴽⴱⴰⵔ ⵏ ⵜⵏⴼⵔⵓⵜ, ⵜⵉⵎⵍⵙⵉⵜ ⵏ ⵜⵓⵏⵏⵓⵏⵉⵏ ⵜⵉⵢⵍⴰⵏⵉⵏ, [ⵜⵉⴼⵔⵉⵡⵉⵏ ⵏ ⵓⵛⵓⵛⴼ],  ⴷ ⵓⵎⵔⴰⵔⴰ ⵏ ⵉⵙⵙⴼⴰⵡⵏ ⵓⵎⵀⵉⵍⵏ ⵅⴼ ⵓⵙⵓⵊⴷ ⵉ ⵜⵏⴹⵡⴰ, ⴰⵙⵎⵓⵙⵙⵓ ⴳ ⵓⵙⵡⵉⵔ ⵏ ⵜⵎⴷⵉⵏⵉⵏ ⴷ ⵉⴷⵖⴰⵔⵏ ⵏ ⵓⵏⵎⵓⵇⵇⴰⵔ ⵉ ⵓⵎⵓⴷⴷⵓ ⴰⵎⴳⵔⵓ, ⴰⵎⵔⴰⵔⴰⵏ ⵏ ⵡⵓⵎⵍⴰⵏ  ⵏ ⵓⴱⴰⵔⴰⵣ ⴳⵔ ⵉⴳⵎⴰⵎⵏ ⵏ ⵜⴳⵔⵓⵎⵎⵉⵏ, ⵜⵉⵎⵔⵣⵉⵡⵉⵏ ⴷ ⵉⵙⵇⵙⵉⵜⵏ ⴷ ⵉⵙⵡⴰⵍⴰⵜⵏ ⵅⴼ ⵜⵎⴰⵎⴽⵜ ⵏ ⵓⵎⵓⴷⴷⵓ ⴷⴼⴼⵉⵔ ⵏ ⵡⴰⵡⴰⴹ ⵖⵔ ⵜⵎⴷⵉⵏⵜ ⵏ ⵟⴰⵏⵊⴰ ⴷ ⵜⵎⴰⵎⴽⵜ ⵏ ⵡⴰⵡⴰⴹ ⵖⵔ ⵙⴱⵜⴰ ⴷ ⵓⵙⵎⴷ ⵏ ⵓⵣⴷⴷⵓⵢ ⴳ ⵜⴳⵔⵓⵎⵎⵉⵏ ⵏ ⵡⴰⵜⵙⴰⴱ ⴷ ⵜⵉⵍⵉⴳⵔⴰⵎ ⴷ ⵓⴱⵟⵟⵓ ⵏ ⵉⵙⵖⵓⵏⵏ ⵏ ⵓⴽⵛⵛⵓⵎ ⵖⵔ ⵜⴳⵔⵓⵎⵎⵉⵏ ⴰⴷ.

ⵜⵜⵓⵏⵥⴰⵏ ⵡⵓⵥⵕⵉⴳⵏ ⵏⵏⴰ ⴳ ⵍⵍⴰⵏ ⵉⵏⵎⵎⴰⵍⵏ ⵅⴼ ⵓⵎⵓⵙⵙⵓ ⵏ ⵉⵎⵙⴷⵔⵉⵢⵏ ⵏⵖⴷ ⵉⵥⴹⵡⴰⵏ  ⵍⵍⵉ ⵉⵣⵎⵔⵏ ⴰⴷ ⵣⴷⵉⵏ ⵙ ⵓⵙⵖⵏⵣⵉ ⴳ ⵓⴼⴳⴰⵏ, ⴰⵔ ⴼⵙⵙⵔⵏ " ⵜⵉⵏⵓⴼⴰ " ⵏ ⵓⵙⵏⵎⴰⵍⴰ ⵏⵖⴷ ⴰⵙⵙⵀⵡⵏ ⵏ ⵉⵎⵓⴷⴷⵓⵜⵏ ⵏ ⵜⵏⴹⵡⴰ, ⴷ ⵓⴳⴰⵔ ⵏ ⵜⵥⵕⵉⴳⵉⵏ ⵅⴼ ⵉⴷⵖⴰⵔⵏ ⵏ ⵜⵉⴹⴰⴼ ⴷ ⵉⴱⵔⴷⴰⵏ] ⵏⵖⴷ ⴰⴽⵓⴷ ⵍⵍⵉ ⵢⵓⵙⴰⵏ ⴷ ⵜⵉⵔⵎⵉⵜⵉⵏ ⵏ ⵜⵏⴹⵡⴰ ⵣⵔⵉⵏⵉⵏ ⴷ ⵜⵎⵔⵏⵉⵡⵜ ⵏ ⵜⵥⵕⵉⴳⵉⵏ ⵍⵍⵉ ⵉⵙⵙⵎⴰⵜⴰⵔⵏ ⵎⴰⵙ ⵜⵎⵓⵔⵙ ⵢⴰⵜ ⵜⴳⵔⵓⵎⵎⴰ ⵏ ⵡⵓⴳⴳⵉⴷⵏ ⵖⵔ ⴰⵡⴰⴹ ⵖⵔ ⵙⴱⵜⴰ.

ⵉⵣⵎⵎⴻⵎ ⵓⵙⵇⵇⵉⵎ ⵜⵉⵍⵉⵜ ⵏ ⵡⵓⵟⵟⵓⵏ ⵏ ⵉⵎⵉⴹⴰⵏⵏ ⵉⴱⵕⵕⴰⵏⵉⵢⵏ ⵊⴰⵊ ⵏ ⵜⴳⵔⵓⵎⵎⵉⵏ ⵜⵉⵎⵖⵔⵉⴱⵉⵢⵉⵏ ⴰⵔ ⴼⵙⵙⵔⵏⵜ ⵉⵏⵖⵎⵉⵙⵏ ⵉⵎⵙⵉⵛⴽⵉⵜⵏ ⴷ ⵜⵥⵕⵉⴳⵉⵏ ⵉ ⵓⵙⵙⴱⵖⵙ ⴷ ⵓⵙⵙⵀⵡⵏ ⵏ ⵜⴰⵏⴹⵡⴰ. ⵙ ⵓⵎⵙⴰⵙⴰ ⴰⴽⴷ ⵓⵢⵏⵏⴰ ⵢⴰⵏⵏⴰⵢ ⵓⵙⵇⵇⵉⵎ ⴷ ⵓⵢⵏⵏⴰ ⵉⵙⵙⵏⵜⵎ, ⵜⵙⴼⴹ ⵢⴰⵜ ⵜⴳⵔⵓⵎⵎⴰ, ⵍⵍⵉ ⵉⵙⵏⵄⴰⵜⵏ ⵜⵉⴱⵔⵉⴷⵉⵏ ⵜⴰⵏⴹⵡⴰⵖⵔ ⵙⴱⵜⴰ  ⴳ ⵡⴰⵜⵙⴰⴱ ⵏ (...), ⵎⴰⵕⵕⴰ ⵡⵓⵟⵟⵓⵏⵏ ⵏ ⵜⵉⵍⵉⴼⵓⵏ ⵍⵍⵉ ⵉⵍⴰⵏ ⵓⵟⵟⵓⵏ ⴰⴳⵔⴰⵖⵍⴰⵏ ⵏ ⵜⵎⴰⵣⵉⵔⵜ ⵜⴰⴱⵕⵕⴰⵏⵉⵜ. ⵜⵙⵎⵓⵏ ⵢⴰⵜ ⵜⴳⵔⵓⵎⵎⴰ ⵢⴰⴹⵏ, ⵍⵍⵉ ⵢⴰⵏⵏⴰⵢ ⵓⵙⵇⵇⵉⵎ ⵉⴳⵎⴰⵎⵏ ⵏⵏⵙ, ⵓⴳⴰⵔ ⵏ 18 ⵏ ⵡⵓⵟⵟⵓⵏ ⵏ ⵜⵉⵍⵉⴼⵓⵏ ⵏ ⵜⵎⴰⵣⵉⵔⵜ ⴰⴷ ⵜⴰⴱⵕⵕⴰⵏⵉⵜ؛

ⵢⵉⵡⴹ ⵍⴰⵥ ⴷ ⵉⵔⵉⴼⵉ ⵉⵏⵊⴷⴰ ⵙⵉⵏ ⵏ ⵡⵓⵙⵙⴰⵏ ⵙ ⵜⵎⵏⵜⵉⵍⵜ ⵏ ⵓⵖⵜⴰⵙ ⵏ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⵉ ⵜⵔⴳⵍⴰ ⵏ ⵜⵃⵓⵏⴰ ⴷ ⵍⵇⵀⴰⵡⵉ ⴷ ⵜⵙⵉⵔⴰⵎ ⴷ ⵉⴱⴷⴷⵉ ⵅⴼ ⵜⵓⴽⴽⵉ ⵏ ⵜⵡⵉⵙⵉ ⵉ ⵉⵏⵊⴷⴰ, ⴳⵉⵙⵏ ⵉⵛⵉⵔⵔⴰⵏ ⴷ ⵜⵎⵖⴰⵔⵉⵏ ⴷ ⵡⵓⴳⴳⵉⴷⵏ ⴳ ⵡⴰⴷⴷⴰⴷ ⵏ ⵉⵎⴷⵍⵉⴼⴰⵏ, ⵜⵜⵓⵡⴰⵙⵔⵙⵏ ⴳ ⵍⴰⵥ ⴷ ⵉⵔⵉⴼⵉ ⵙ ⵓⴳⴷⴷⵓⵍ ⵏⵏⵙⵏ ⵣⴳ ⵜⵎⵙⵓⵖⵜ ⵏ ⵡⴰⵎⴰⵏ ⴷ ⵡⵓⵜⵛⵉ. ⵙ ⵓⵎⵙⴰⵙⴰ ⴰⴽⴷ ⵜⵓⴳⴳⴰ ⵜⵉⵎⵢⴰⵏⴰⵡⵉⵏ, ⴽⵛⵛⵎⵏⵜ ⵜⴰⴳⴳⴰⵍⵉⵏ ⵏ ⵜⵏⴼⵔⵓⵏⵉⵏ ⴱⴰⵛ ⴰⴷ ⵙⵙⵓⴼⵖⵏ ⵉⵄⵔⵔⵉⵎⵏ ⵣⴳ ⵜⵙⵉⵔⴰⵎ ⵍⵍⵉ ⵉⵖⵜⵙⵏ ⴰⵙⵎⵏⵉⴷ ⵏ ⵜⵡⵉⵙⵉ ⵉ ⵉⵜⵙⵏ ⵣⴳ ⵡⵓⴳⴳⵉⴷⵏ ⴰⴷ؛

ⴳⴰⵏⵜ ⵜⴳⵔⵓⵎⵎⵉⵏ ⵜⵉⵎⵟⵟⵓⵕⴼⴰ ⵢⴰⵏ ⵓⵙⵓⴳⵉ ⵅⴼ ⵉⵄⵔⵔⵉⵎⵏ ⴷ ⵡⵓⵎⵥⵉⵢⵏ ⴷ ⵜⴹⴼⵕⵉ ⵏⵏⵙⵏ ⴳ ⵜⵙⵡⴰⴽ ⴷ ⵓⵙⵔⵙ ⵏⵏⵙⵏ ⴳ ⵎⴰⵕⵕⴰ ⵜⴰⵍⵖⵉⵡⵉⵏ ⵏ ⵜⴽⵕⴹⵉ ⵣⴳ ⵓⵔⴳⴰⵎ, ⴷ ⵜⴰⵢⵜⵉ ⴷ ⵓⴽⵙⴰⵏ ⴳ ⵙⴱⵜⴰ. ⵜⵣⵎⵎⴻⵎ ⵜⵔⴰⴱⴱⵓⵜ ⵏ ⵜⵉⴹⴰⴼ ⴳ ⵓⴱⴰⵔⴰⵣ ⵉⴹⵉⵚⵏ ⵏ ⵜⴰⵢⵜⵉ ⴷ ⵉⵣⵎⵎⵓⵍⵏ ⵅⴼ ⵜⵖⵙⵙⵉⵡⵉⵏ ⵏ ⵉⵄⵔⵔⵉⵎⵏ, ⵉⵜⵜⵓⵡⴰⵙⵖⴷ ⴰⵡⴷ ⵉ ⵜⵓⴳⴳⵉⵡⵉⵡⵉⵏ ⵏ ⵉⵎⴰⵖⵓⵍⵏ ⴳⵉⵙⵏⵜ ⵉⵡⵏⵏⴰⵏ ⵉⵎⵢⴰⵏⴰⵡⵏ ⵏⵏⴰ ⵉⵎⵙⴰⵙⴰⵏ ⴷ ⴳⴰⵔ ⵏ ⵜⵎⵀⵍⵜ ⴷ ⵓⵙⵓⴳⵉ ⵣⵉ ⵜⵏⵉⵍⴰ ⵏ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ ⵜⵉⵚⴱⵍⵢⵓⵏⵉⵢⵉⵏ, ⵍⵓⵎⵎⵏ "ⴳ ⵉⴷⵖⴰⵔⵏ ⵍⵍⵉ ⵓⵔ ⴷⴰ ⵙⵙⵏⵜⴰⵎⵏⵜ ⵉⴷ ⵍⴽⴰⵎⵉⵕⴰ" ⵙ ⵓⵎⵙⴰⵙⴰ ⴰⴽⴷ ⵜⵙⴳⵓⵔⵉⵡⵉⵏ ⵏⵏⵙⵏ؛

ⵜⵙⵙⵖⴷ ⵜⴰⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵟⴰⵡⵉⵏ-ⵍⵃⵓⵙⵉⵎⴰ ⵉ ⵢⴰⵏ ⵓⵎⴷⵢⴰ ⵍⵍⵉ ⵉⵜⵜⵓⵡⴰⵣⵓⵣⵣⵔⵏ ⵙ ⵜⵎⴰⵎⴽⵜ ⵜⴰⵅⴰⵜⴰⵔⵜ ⴳ ⵉⵥⴹⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⴰⵔ ⵜⵙⵙⵎⴰⵜⴰⵔ ⴰⵙⴷⵉⴷⴷⵉ ⵏ ⵜⵏⴼⵔⵓⵜ ⵜⴰⵖⵙⵙⴰⵏⵜ ⵏ ⵡⵓⴳⴳⵉⴷ ⴰⴷ ⵣⴳ ⵜⵏⵉⵍⴰ ⵏ ⵢⴰⵏ ⵓⴳⵎⴰⵎ ⵏ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ. ⴰⵔ ⵉⵙⵔⵓⵙ ⵓⵙⵇⵇⵉⵎ ⵜⴰⵏⴰⴹⵜ ⵏ ⵓⵙⵖⴷ ⵖⵔ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴱⴰⵛ ⴰⴷ ⵉⵙⵎⵀⵍ ⴰⵙⵍⴳⵏ. ⵉⵅⵚⵚⴰ ⴰⴷ ⵏⵉⵏⵉ ⵎⴰⵙ, ⵙ ⵓⵎⵙⴰⵙⴰ ⴰⴽⴷ ⵓⵢⵏⵏⴰ ⵢⴰⵏⵏⴰⵢ ⵓⵙⵇⵇⵉⵎ ⴷ ⵜⵓⴳⴳⴰ ⵏ ⵡⵓⴳⴳⵉⴷ ⴰⴷ, ⵜⵜⵓⵙⵏⵎ ⵜⵡⵍⴰⴼⵜ ⵏ ⵉⵎⵊⵕⵉ ⴷ ⵜⵡⴰⵍⵙ ⵜⵓⵚⴽⴰ ⵏⵏⵙ ⵙ ⵓⵙⵎⵔⵙ ⵏ ⵜⵖⵉⵙⵜ ⵜⴰⵙⵎⴳⵓⵔⵜ. ⴰⵎ ⵓⵢⵏⵏⴰ ⴳ ⵓⵔ ⵉⵎⵏⵉⵄ ⵉⵎⵊⵕⵉ ⴰⴷ ⵣⴳ ⵜⴽⵏⴷⴰⵡⵜ, ⵙ ⵓⵙⴼⵙⵔ ⵏ ⵜⵡⵍⴰⴼⵜ "ⵉⵙⵙⵏⵜⵎⵏ" ⵉⵏⴳⴰⵙⵏ ⵍⵍⵉ ⵉⵎⵏⴰⵍⴰ ⵡⵓⴳⴳⵉⴷ ⴰⴷ ⵏⵏⴰ ⵖⵔ ⵓⵔ ⵉⵍⵍⵉ ⴰⵡⴷ ⵢⴰⵏ ⵓⵙⵖⵓⵏ ⴷ ⵓⵎⵏⴰⴹ ؛

ⵉⵣⵎⵎⴻⵎ ⵓⵙⵇⵇⵉⵎ ⴰⴷⴷⴰⴷⵏ ⵏ ⵜⴽⵏⴷⴰⵡⵜ ⵜⴰⵏⵖⵎⴰⵙⵜ ⴳ ⵉⵙⴰⵔⵓⵜⵏ ⵉⵎⵙⴰⵢⵔⴰⵔⵏ ⵏⵏⴰ ⵉⴼⵙⵔⵏ ⵜⵓⵎⴰⵢⵉⵏ  ⵏ ⵡⴰⴷⴷⴰⴷⵏ ⵏ ⵜⵏⴹⵡⴰ ⴱⵍⴰ ⵜⵉⵎⵏⵥⵉⵜ, ⵏⵏⴰ ⵉⵜⵜⵓⵚⴼⴹⵏ ⴹⴰⵕⵜ ⵏ ⵓⵢⵏⵏⴰ ⴱⵍⴰ ⴰⵙⵙⵉⵙⴼⵉⵡ ⵓⵍⴰ. ⴰⵎ ⵓⵢⵏⵏⴰ ⵉⵣⵎⵎⴻⵎ ⴰⵡⴷ ⵓⵙⵇⵇⵉⵎ ⴱⵣⵣⴰⴼ ⵏ ⵡⴰⴷⴷⴰⴷⵏ ⵏ ⵃⵎⵎⵣⵡⵉⵔ ⴰⵏⵖⵎⴰⵙ ⵅⴼ ⵡⴰⵙⵉⵜⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏⵉ ⵓⵙⵎⵏⵉⴷ ⵏⵜⵓⵔⴷⴰⵡⵉⵏ ⴷ ⵉⴼⴰⵙⵔⵏ  ⵓⴷⵔⵉⴼⵏ “ ⴰⵏⵎⴷⵓ ”, ⴹⴰⵕⵜ ⵏ ⵉⵎⵊⵕⵉⵜⵏ ⴰⴷ ⵏⵉⵛⴰⵏ, ⴰⵎ ⵓⵢⵏⵏⴰ ⵉⵜⵜⵓⵣⵎⵎⴻⵎ ⴳ ⵓⵙⵡⵉⵔ ⵏ ⵓⵎⵓⵖⵍⵉ ⴰⵏⵖⵎⴰⵙ ⴰⵏⴰⵎⵓⵔ, ⵡⴰⴷⴷⴰⴷⵏ ⵏ ⵓⵣⵓⵣⵣⵔ ⵏⵜⵙⴳⵓⵔⵉⵡⵉⵏⵏⵏⴰ ⵎⵉ ⵓⵔ ⵉⵜⵜⵓⵡⵉ ⴱⵄⵉⵜ ⵉ ⵜⵖⴰⵔⵉⵡⵉⵏ ⵏ ⵜⵥⵕⵉⴳⵜ ⵏⵏⴰ ⵉⵜⵜⴱⵣⵣⵉⵣⵏ ⴰⵎⵙⴰⵙⴰ ⴰⴽⴷ ⵜⵎⵙⵜⴰⵍ  ⵜⵉⵣⵔⴼⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵛⵏⴰⵏ ⵉⵣⴷⵉⵏ ⵙ ⵜⵥⵕⵉⴳⵜ, ⵉ ⵓⴼⵔⴰⴳ ⵏ ⵡⴰⴷⴷⵓⵔ ⵏ ⵡⵓⴳⴳⵉⴷⵏ ⴷ ⵉⵣⵔⴼⴰⵏ ⵏ ⵉⵛⵉⵔⵔⴰⵏ ⴷ

ⵉⵡⵜⵜⴰⵏ ⵏⵏⵙⵏ ⵉⵛⵏⴰⵏ.

ⵉⵣⵎⵎⴻⵎ ⵓⵙⵇⵇⵉⵎ ⴰⴷⴷⴰⴷⵏ ⵏ ⵜⴽⵕⴹⵉ ⴷ ⵓⵙⵓⴳⵉ ⵅⴼ ⵡⴰⵢⴷⴰⵜⵏ ⵓⵙⵍⵉⴳⵏ ⴷ ⵉⵎⴰⵜⴰⵢⵏ ⴷ ⵓⵙⴽⵎⴹ ⵏ ⵜⵀⵉⵔⵔⵉⵜⵉⵏ. ⵉⵙⵙⵏⵜⵎ ⵓⵙⵇⵇⵉⵎ ⴰⴷⴷⴰⴷⵏ ⵏ ⵜⴽⵕⴹⵉ  ⴷ ⵜⵏⴽⵔⴰ ⵏ ⵉⵎⵏⴰⵍⴰⵜⵏ ⵓⴽⵕⵉⴹⵏ ⴳⵔ ⵉⵄⵔⵔⵉⵎⵏ ⴷ ⵡⵓⵎⵥⵉⵢⵏ, ⵣⴳ ⵢⴰⵏ ⵜⵙⴳⴰ, ⴷ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ, ⵣⴳ ⵜⵙⴳⴰ ⵢⴰⴹⵏ, ⵙ ⵜⵎⵏⵜⵉⵍⵜ ⵏ ⵓⴳⴷⴷⵓⵍ ⵏⵏⵙⵏ ⵣⴳ ⵜⴰⵏⴹⵡⴰ, ⵢⵓⵊⵊⴰ ⴰⴷ ⵓⵢⴰ ⵙ ⵓⵎⵙⴰⵙⴰ ⴰⴽⴷ ⴰⵢⵏⵏⴰ ⵜⴰⵏⵏⴰⵢ ⵜⵔⴰⴱⴱⵓⵜ ⵏ ⵜⵉⴹⴰⴼ ⴳ ⵓⴱⴰⵔⴰⵣ, ⵏ ⵉⵏⴳⴰⵙⵏ  ⴳ ⵡⴰⵎⵎⴰⵙ  ⵏ ⵉⵄⵔⵔⵉⵎⵏ ⴷ ⵉⴳⵎⴰⵎⵏ ⵏ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ؛

ⵉⵣⵎⵎⴻⵎ ⵓⵙⵇⵇⵉⵎ ⵓⵖⵓⵍ ⴰⵎⵅⴰⵙ ⵏ ⵉⴼⴹⴰⵏ ⵏ ⵉⵏⵊⴷⴰ ⴷ ⵡⵓⵖⵓⵍ ⵏ ⵓⴱⵣⵣⴻⵣ ⵉ ⵡⵓⵟⵟⵓⵏ ⵢⴰⴹⵏ ⵏⵏⴰ ⴳ ⵍⵍⴰⵏ ⵡⵓⵎⵥⵉⵢⵏ, ⵙ ⵓⵎⵙⴰⵙⴰ ⴰⴽⴷ ⵓⵢⵏⵏⴰ ⵢⴰⵏⵏⴰⵢ ⴳ ⵉⴼⵉⴷⵢⵓⵜⵏ؛

V. ⵉⵎⵙⴳⵔⴰ ⵉⵎⴰⵜⴰⵢⵏ

ⴰⵔ ⵉⵙⵙⵎⴽⵜⴰⵢ ⵓⵙⵇⵇⵉⵎ ⵙ ⵓⵢⵏⵏⴰ ⵜⵙⵎⵓⵏ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵓⵙⴳⴳⵯⴰⵙ ⵏ 2024, ⵏⵏⴰ ⵉⵣⵎⵎⴻⵎⵏ ⴰⵔⵣⴰⵢ ⵏ ⵜⵙⵏⵉⵡⵉⵏ ⴷ ⵉⵎⵉⴹⴰⵏⵏ ⴷ ⵜⴳⵔⵓⵎⵎⵉⵏ ⵜⵉⵎⵓⵟⵟⵓⵏⵉⵏ ⵍⵍⵉ ⵉⵙⵙⵏⵙⵉⵢⵏ ⵅⴼ ⵓⵣⵓⵣⵣⵔ ⵏ ⵉⵙⵎⴰⵍⵏ ⵉⵙⴼⴼⵏⵥⴰⵢⵏ ⵉⵜⵜⵓⵙⵡⴰⵍⴰⵏ ⵉ ⵓⵙⵎⵏⵉⴷ ⵏ "ⵜⵏⵓⴼⴰ" ⵎⵎ ⵓⴷⵔⵉⵣ ⴰⵔⵓⵍⴳⵉⵏ, ⵉⴱⴷⴷⴰⵏ ⵅⴼ ⵓⵙⵏⵎⴰⵍⴰ ⴷ ⵓⵙⵎⵓⵙⵙⵓ ⵏ ⵜⵎⵀⴰⵍ ⵏ ⵜⵏⴹⵡⴰ ⵜⴰⵔⵓⵍⴳⵉⵏⵜ ⵙ ⵓⵙⵎⵔⵙ ⵏ ⵡⴰⵎⵎⴰⴽⵏ ⵏ ⵢⵉⵍⵍ, ⵎⵏⵉⴷ ⵏ ⵡⴰⵜⵉⴳⵏ ⵏ ⵉⴷⵔⵉⵎⵏ؛

ⵉⵣⵎⵎⴻⵎ ⵓⵙⵇⵇⵉⵎ ⵜⵉⴳⵎⵉ ⵏ ⵜⵉⵔⵎⵉⵜⵉⵏ ⵏ ⵜⵏⴹⵡⴰ ⵍⵓⵎⵎⵏ ⵣⴳ 14 ⵢⵓⵍⵢⵓⵣ ⵉⵣⵔⵉⵏ, ⴷⴰⵜ ⵎⴰ ⵜⵜⵓⵣⵎⵎⴻⵎⵏ ⵡⴰⴷⴷⴰⴷⵏ ⵏ ⵜⵏⴹⵡⴰ ⴰⴼⵍⵍⴰ ⵏⵏⵙⵏ ⴰⵙⵙ ⵏ 30 ⵢⵓⵍⵢⵓⵣ ⵉⵣⵔⵉⵏ؛

ⵙⵙⵉⵡⵙⵏ ⵉⵙⴰⵢⵔⴰⵔⵏ ⵉⵎⵓⵟⵟⵓⵏⵏ ⵙ ⵢⴰⵜ ⵜⴰⵍⵖⴰ ⵜⴰⵎⵙⵖⵜⴰⵙⵜ ⴳ ⵎⴰⵕⵕⴰ ⵏ ⵜⵎⵔⵙⴰⵍ ⵏ ⵓⵙⵓⵊⴷ ⵉ ⵜⵏⴹⵡⴰ ⴷ ⵎⴰ ⵜ ⵉⴹⴼⴰⵕⵏ ⴳ ⵙⴱⵜⴰ, ⴷ ⵙ ⵢⴰⵏ ⵓⵙⵡⵉⵔ ⵉⴷⵔⵓⵙⵏ ⴳ ⵎⵍⵉⵍⵢⴰ, ⴰⵢⵏⵏⴰ ⵙ ⵙⵙⵎⵔⵙⵏⵜ ⵜⴷⴰⴱⵓⵜⵉⵏ ⴰⴷ ⴰⵖⵜⴰⵙ ⵏ ⵜⵙⵏⴱⴹⴰⵢⵜ ⵜⴰⵚⴱⵍⵢⵓⵏⵉⵜ ⵜⴰⵏⴰⴼⵍⵍⴰⵜ ⴰⵎ ⵓⵙⴰⴳⵎ ⵉ ⵜⴽⵏⴷⴰⵡⵜ ⴷ ⵓⵣⵓⵣⵣⵔ ⴷ ⵓⵣⴷⴷⵓⵢ ⴷ ⵓⵙⵎⵓⵜⵜⴳ ⴷ ⵓⵙⵎⵓⵙⵙⵓ. ⴰⵎ ⵓⵢⵏⵏⴰ ⴰⵔ ⵜⵙⵙⵎⵏⵉⴷ "ⵜⵉⵏⵓⴼⴰ" ⵉ ⵓⵙⵖⵏⵣⵉ ⴳ ⵓⴼⴳⴰⵏ. ⵉⴹⴼⴰⵕ ⵓⵙⵇⵇⵉⵎ ⵎⵏⵏⴰⵡ ⵏ ⵉⵎⵉⴹⴰⵏⵏ ⴷ ⵡⵓⵟⵟⵓⵏⵏ ⵏ ⵜⵉⵍⵉⴼⵓⵏ ⴷ ⵜⵓⵎⴰⵢⵉⵏ ⵏ ⵉⵎⵙⵏⴼⵍⵓⵍⵏ ⵏ ⵜⵓⵎⴰⵢⵜ, ⵣⴳ ⴱⵕⵕⴰ ⵏ ⵍⵎⵖⵔⵉⴱ, ⵊⴰⵊ ⵏ ⵜⴳⵔⵓⵎⵎⵉⵏ ⵜⵉⵎⵖⵔⵉⴱⵉⵢⵉⵏ؛

ⴰⵔ ⵉⵙⵙⵉⵡⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵣⴳ ⵉⴹⵉⵚⵏ ⵏ ⵓⵙⵎⵔⵙ ⴰⵙⵔⵜⴰⵏ ⵏ ⵜⵏⴹⵡⴰ ⴰⴷ ⵜⴰⵎⴳⵔⵓⵜ ⴷ ⴰⵔ ⵉⵏⴽⴽⴹ ⵉⵏⴰⵡ ⴰⵎⴽⵢⴰⴹ ⵉⴳⵎⵎⴰⵏ ⵉ ⵜⵣⵡⴰⴳⵜ ⴷ ⵉⵣⵔⴼⴰⵏ ⵏ ⵉⵎⵣⵡⴰⴳⵏ ⴷ ⵜⵡⵊⵉⵡⵉⵏ ⵏⵏⵙⵏ ⴷ ⵉⵙⵡⵉⵔⵏ ⵏ ⵓⵙⵃⵓⵕⵛ ⵅⴼ ⵓⴽⵙⴰⵏ ⴷ ⵜⵙⵙⴰⵥⵓⵕⵜ ⵎⵏⵉⴷ ⵏ ⵉⴱⵕⵕⴰⵏⵉⵢⵏ؛

ⴰⵔ ⵉⵜⵜⵣⵎⵎⴰⵎ ⵓⵙⵇⵇⵉⵎ ⴰⵡⴷ ⵜⵓⵖⵓⵏⵜ ⵏ ⵉⵙⴽⵔⴰⴼ ⵣⴳ ⵜⵏⵉⵍⴰ ⵏ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⵅⴼ ⵓⵎⵓⵜⵜⵉ ⵏ ⵡⵓⴳⴳⵉⴷⵏ ⵖⵔ ⵓⴳⴰⴼⴰⵢ ⵏ ⵜⵎⴰⵣⵉⵔⵜ, ⴷ ⵅⴼ ⵡⴰⴷⴷⴰⴷⵏ ⵍⵍⵉ ⵉⵙⵙⵏⴽⴰⵔⵏ ⴰⵔ ⴰⵡⵇⵇⵔ ⵏ ⵉⵍⵓⴳⵏⵏ ⴷ ⵜⵎⵙⵜⴰⵍ ⵉⵙⵏⵎⴰⵍⴰⵏ ⴰⵙⵎⵔⵙ ⵏ ⵜⴰⴳⴳⴰⵍⵜ ⵣⴳ ⵜⵏⵉⵍⴰ ⵏ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ, ⴳ ⵓⴳⴷⴷⵓⵍ ⵏ ⵉⵏⵎⵓⵔⴰ ⴷ ⵉⴱⵕⵕⴰⵏⵉⵢⵏ ⵣⴳ ⵜⵏⴹⵡⴰ, ⵍⵓⵎⵎⵏ ⵉⵎⵏⵣⴰⵢⵏ ⵏ ⵜⴹⵓⵍⵍⵉⵜ ⴷ ⵓⵎⵙⴰⵙⴰ؛

ⵉⵣⵎⵎⴻⵎ ⵓⵙⵇⵇⵉⵎ ⵓⵟⵟⵓⵏ ⵏ ⵉⵎⵊⵕⵉⵜⵏ ⴷ ⵜⵎⵙⴽⴰⵔ ⵏⵏⴰ ⵉⵙⵙⵏⴽⴰⵔⵏ ⵜⵉⵡⴷⵉ ⵜⴰⵏⵉⵍⴰⵡⵜ ⵅⴼ ⵎⴽⵜⴰ ⴰⵢⴷ ⵜⵜⵓⵡⵇⵇⵔⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵀⴰⵍ ⵏ ⵜⵏⴹⵡⴰ؛

ⵜⵜⵡⴰⴹⴼⴰⵕⵏ ⵡⴰⴷⴷⴰⴷⵏ ⵏ ⵎⴰⵙ ⵜⵜⵓⵙⵙⵉⵖ ⵙⵙⵍⴰⵎⵜ ⵜⴰⵖⵙⵙⴰⵏⵜ ⵉ ⵡⵓⴳⴳⵉⴷⵏ ⵉⵏⵊⴷⴰ ⵣⴳ ⵜⵏⵉⵍⴰ ⵏ ⵜⵏⴱⴰⴹⵉⵏ ⵜⵉⵚⴱⵍⵢⵓⵏⵉⵢⵉⵏ ⴷ ⵜⵎⵖⵔⵉⴱⵉⵢⵉⵏ, ⴰⵎ ⵓⵢⵏⵏⴰ ⵜⵜⵡⴰⴹⴼⴰⵕⵏ ⵡⴰⴷⴷⴰⴷⵏ ⵏ ⵎⴰⵙ ⵜⵜⵓⵙⵙⵉⵖ ⵙⵙⵍⴰⵎⵜ ⵜⴰⵖⵙⵙⴰⵏⵜ ⵏ ⵜⴰⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ ⵜⵉⵎⵖⵔⵉⴱⵉⵢⵉⵏ؛

ⵜⵖⵜⵙ ⵜⵏⴱⴰⴹⵜ ⵜⴰⴷⵖⴰⵔⴰⵏⵜ ⴳ ⵙⴱⵜⴰ ⵉⵜⵜⵓⵣⴷⵖⵏ ⴰⵅⵔⵔⵎ ⵅⴼ ⵓⵙⵎⵏⵉⴷ ⵏ ⵜⵡⵉⵙⵉ ⵉⵅⵚⵚⴰⵏ ⵙ ⵓⵙⵓⴼⵖ ⵏ ⵡⴰⵏⴰⴹⵏ ⵉ ⵜⵔⴳⵍⴰ ⵏ ⵜⵙⵉⵔⴰⵎ ⴷ ⵍⵇⵀⴰⵡⵉ ⴷ ⵜⵃⵓⵏⴰ ⵜⵉⵎⵇⵕⴰⵏⵉⵏ, ⴰⵢⵏⵏⴰ ⵢⵓⵊⵊⴰⵏ ⵉⵏⵊⴷⴰ ⴰⴷ ⵓⵔ ⵜⵜⴼⵍⴰⵥⵏ ⵣⴳ ⵓⵣⵔⴼ ⴳ ⵡⴰⵎⴰⵏ ⴷ ⵡⵓⵜⵛⵉ؛

ⵢⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵓⵔ ⵜⵜⵓⵡⵇⵇⵉⵔⵏⵜ ⵜⵎⵙⵜⴰⵍ ⵙ ⵉⴹⴰⴽⴰⵍⵏ ⵓⵍⴳⵉⵏⵏ ⵉⵅⵚⵚⴰⵏ ⴳ ⵜⵙⵏⵙⵉ ⵏ ⵜⵎⵀⴰⵍ ⵏ ⵡⵓⵖⵓⵍ ⵏⵖⴷ ⵜⴰⵔⴰⵔⵉⵜ, ⴷⵉⴽⵙⵏⵜ ⵜⵉⵏⵏⴰ ⵉⵣⴷⵉⵏ ⴷ ⵡⴰⵡⴰⴹ ⵖⵔ ⵜⵖⴰⵔⴰⵙⵉⵏ ⵏ ⵓⵣⵡⴰⴳ ⵉ ⵉⴱⵕⵕⴰⵏⵉⵢⵏ؛

ⵉⵙⵙⵏⵜⵎ ⵓⵙⵇⵇⵉⵎ ⴰⵔ ⴰⵊⴱⴰⵕ ⵏ ⵜⵡⵉⵙⵉ ⴷ ⵓⴼⵔⴰⴳ ⵉⵅⵚⵚⴰⵏ ⵉ ⵉⵏⵊⴷⴰ ⵣⴳ ⵉⵙⵓⴳⵉⵜⵏ ⴷ ⵜⵓⴽⵢⴰ ⵉⵍⴰⵏ ⴰⴷⵔⵉⵣ ⴰⵎⵙⵙⴰⵥⵓⵕ ⴷ ⵓⴽⵙⴰⵏ ⵏ ⵉⴱⵕⵕⴰⵏⵉⵢⵏ ⵏⵏⴰ ⵜⵏ ⵢⵉⵡⴹⵏ ⵊⵊⴰⵊ ⵏ ⵙⴱⵜⴰ؛

ⵙ ⵓⴱⴷⴰⴷ ⵅⴼ ⵎⵏⵏⴰⵡⵜ ⵜⵓⴳⴳⴰ ⵣⵉ ⴷⵉⴽⵙⵏⵜ ⵜⵉⵏⵏⴰ ⵎⵉ ⵉⵜⵜⵓⵡⴰⵙⵖⴷ, ⴰⵔ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵓⵔ ⵉⵥⴹⴰⵕ ⴰⴷ ⵜⵜⵓⵡⴰⵙⵔⵙⵏⵜ ⵜⵉⵔⵎⵉⵜⵉⵏ ⵏ ⵜⴰⵏⴹⵡⴰ ⵜⴰⵎⴳⵔⵓⵜ ⵏ ⵉⵄⵔⵔⵉⵎⵏ ⴷ ⵡⵓⵎⵥⵉⵢⵏ ⵖⵔ ⵙⴱⵜⴰ ⵏⵖⴷ ⵎⵍⵉⵍⵢⴰ ⵊⴰⵊ ⵏ ⵢⴰⵜ ⵜⴰⵎⵢⴰⴷⴰⵙⵜ ⵜⴰⴽⵍⴰⵙⵉⴽⵉⵜ ⵉⵣⴷⴷⵉⵏ "ⵜⴰⵣⵡⴰⴳⵜ" ⴷ ⵉⵎⴷⵍⵉⴼⴰⵏ ⵏⵖⴷ ⴰⵥⵍⴰⴹ ⵙ ⵢⴰⵜ ⵜⴰⵍⵖⴰ ⵜⵓⵙⵍⵉⴷⵜ. ⴰⵔ ⵉⵇⵇⴰⵔ ⴱⴰⵛ ⴰⴷ ⵜⵜⵓⵔⵎⵙⵏ ⵉⵔⴼⵜⵉⵍ ⵏⵏⵙⵏⵜ,  ⵣⵉ ⴷⵉⴽⵙⵏ, ⴰⵎ ⵓⵖⵜⴰⵙ ⵓⵙⵍⵉⴳ ⵉ ⵓⵎⵣⵡⴰⴳ, ⵉⵣⴷⵉⵏ ⴷ ⵓⵙⵏⴼⵍ ⴰⵏⵖⴱⵓ ⴳ ⵓⵙⵡⵉⵔ ⵏ "ⵉⵏⵓⵔⴰⵣ", ⵉ ⵜⴰⵏⴹⵡⴰ ⵣⴳ ⵡⴰⵏⵙⴰ ⵖⵔ ⵡⴰⵢⵢⴰⴹ, ⴳ ⵓⵜⵉⵍⵉⵜ ⵏ ⵜⵎⵙⵎⵓⵏⵉⵏ ⵜⵉⵎⵓⵟⵟⵓⵏⵉⵏ ⵏⵏⴰ ⵉⵜⵜⴰⴳⵉⵏ ⵜⴰⵎⵥⵍⴰⵏ  ⵏ ⵉⵡⵜⵜⴰ ⴷ ⵉⴼⵔⴰⴳⵏ.