ⵍⴰ ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⵉⵣⵉ ⵜⴰⵣⴳⵔⴰⵔⵜ ⵏⴳⵔ 8 ⴷ 14 ⴽⵟⵓⴱⵕ 2025, ⵢⴰⵏ ⵓⴽⴰⴱⴰⵔ ⵢⴰⵜⵜⵓⵢⵏ ⵙⴳ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵜⴰⵙⵉⵎⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⴷⵓⴷⴰ ⵏ ⴱⵓⵔⵓⵏⴷⵉ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵎⴰⵔⵜⴰⵏ ⴱⵍⴰⵢⵣ ⵏⵢⴰⴱⵓⵀⵓ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴱⵓⵔⵓⵏⴷⵉⵜ, ⴷⵉⴷⵙ ⵎⴰⵙⵙ ⵊⵉⵔⴰⵔ ⵔⵓⵊⵉⵎⵉⵏⵜⴼⴰⵣⴰ, ⴰⵏⵎⵀⴰⵍ ⵏ ⵓⵏⵙⵙⵉⵅⴼ, ⴷ ⵎⴰⵙⵙⴰ ⴳⵍⵓⵔⵢⵓⵣ ⵏⵉⵎⵉⵏⵢⴰ, ⵜⴰⴳⵎⴰⵎⵜ ⵏ ⵜⵙⵇⵇⵉⵎⵜ, ⴷ ⵎⴰⵙⵙⴰ ⴱⵢⴰⵜⵔⵉⵙ ⵏⴽⵓⵔⵓⵏⵣⵉⵣⴰ, ⵜⴰⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵓⵙⵉⵔⴰ ⴰⵎⵣⵣⴳⴰⵔ, ⴷ ⵎⴰⵙⵙ ⵊⵓⵏ ⴱⵓⵙⴽⵓ ⵎⴰⵔⵉⵏⵎⴱⵓⵏⴰ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ.

ⴳ ⵢⴰⵜ ⵜⴳⵓⵔⵉ ⵜⵙⵙⵏⴽⴷ ⵙ ⵓⵣⵎⵣⵣⵓ ⵏ ⵓⵕⵥⵥⵓⵎ ⵏ ⵉⵎⴰⵍⴰⵙⵙ ⴰⴷ ⴰⵣⵔⴰⵡⴰⵏ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵜⴳⴰ ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⵍⴰⵍ ⵏ ⵜⵎⵔⵙⵍⵜ ⵏⵏⵙ ⵜⴰⵏⴰⵎⵓⵔⵜ ⵜⵉⵔⵎⵉⵜ ⵜⴰⴼⵔⵉⵇⵉⵜ ⵉⵣⴷⴷⵉⴳⵏ ⵏⵏⴰ ⵉⵙⵙⵓⵊⴰⴷ ⵍⵎⵖⵔⵉⴱ/ⴰⵙⵇⵇⵉⵎ ⵉ ⵉⵏⵎⵣⴰⵖⵏ/ⵜⵉⵏⵎⵣⴰⵖⵉⵏ ⵉⴼⵔⵉⵇⵉⵢⵏ.

ⵜⵙⵎⵖⵔ ⵎⴰⵙⵙⴰ ⴱⵓⵄⵢⵢⴰⵛ ⴰⵙⵔⵙ ⴰⴷ ⴰⵎⴰⵢⵏⵓ ⴳ ⵓⵙⴰⴽⴰ ⵏ ⵓⵎⵢⴰⵡⴰⵙ ⵏⴳⵔ ⵙⵏⴰⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵉ ⵓⵙⵎⵢⴰⵏⴰⵡ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴷ ⵓⵙⴱⵓⵖⵍⵓ ⵏ ⵜⵙⵏⵜⴰⵢⵉⵏ ⵜⵉⵎⴰⵣⴰⵔⵉⵏ ⵉⵜⵜⴰⵡⵙⵏ ⴳ ⵓⵙⴷⵓⵙ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵙⵏ ⴳ ⵓⵙⴰⵢⵔⴰⵔ ⵏⵏⵖ ⴰⴼⵔⵉⵇⵉ.
ⴰⵔ ⵏⵜⵜⴰⵏⵏⴰⵢ ⵎⴰⵙ ⵉⴳⴰ ⵓⵙⵎⵢⴰⵏⴰⵡ ⵏ ⵉⴼⵔⴷⵉⵙⵏ ⵏ ⵜⵉⵔⵎⵉⵜ ⵏⵏⵖ ⴷ ⵉⵥⵕⵉ ⵏ ⵜⵉⵔⵎⵉⵜⵉⵏ ⵏ ⵜⵎⵔⵙⴰⵍ ⵢⴰⴹⵏⵉⵏ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵜⴰⵙⵉⵍⴰ ⵜⴰⴷⵙⵍⴰⵏⵜ ⵉ ⵡⴰⵏⵏⴰⵍ ⵏ ⵜⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⴷ ⵓⵙⴷⵓⵙ ⵏ ⵜⵥⴹⴰⵕⵉⵏ ⵏⵏⵙⵏⵜ ⴳ ⵢⵉⴳⵔ ⵏ ⵜⴹⴼⵕⵉ ⴷ ⵓⵎⵢⴰⵖ ⴰⴽⴷ ⵉⵎⴰⵙⵙⵏ ⵉⴳⵔⴰⵖⵍⴰⵏⵏ.

ⴳ ⵓⵎⵙⴰⵡⴰⵍ ⵏⵏⵙ ⵅⴼ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⵎⵖⵔ ⵎⴰⵙⵙⴰ ⴱⵓⵄⵢⵢⴰⵛ ⵜⵉⵍⴰⵍⵜ ⵜⴰⵏⴰⵎⵎⴰⵙⵜ ⵏ ⵜⵎⵔⵙⴰⵍ ⴰⴷ ⴳ ⵉⵙⴰⴽⴰⵜⵏ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵉⴼⵔⵉⵇⵢⴰ, ⵜⵙⵎⵖⵔ ⴰⵙⵓⵖⵏ ⵏ ⴽⵔⴰ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵙ ⵓⵙⴱⴷⴷⵉ ⵏ ⵓⵣⵣⴳⵉⵔ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵉⵍⴽⵎ ⵓⵟⵟⵓⵏ ⵏⵏⵙⵏ 33 ⵏ ⵓⵡⴰⵏⴽ. ⴰⵙⵡⴰⵍⴰ ⴰⵏⴼⴳⴰⵏ ⵉⵣⵣⵉⴳⵣⵏ ⴷ ⴰⵎⵣⵡⴰⵔ ⴳ ⵜⵎⵏⵥⴰⵡⵜ, ⵏⵏⴰⵔⵏ ⵉⵡⴰⵏⴽⵏ ⵏ ⵉⴼⴼⵓⵙ ⴰⵙⴰⴽⴰ ⵏⵏⵙ ⴰⴳⵔⴰⵖⵍⴰⵏ ⴰⵙⵙ ⴰ, ⵙⵍⴰⵡⴰⵏ ⴰⴽⴽⵯ ⵎⴰⵙ ⵉⵣⴷⵉ ⵓⵔⵣⴰⴼ ⴰⴷ ⴰⵣⵔⴰⵡⴰⵏ ⴷ ⵓⵙⵙⵓⵊⴷ ⵏ ⵓⵙⵇⵇⵉⵎ ⵉ ⵓⵙⵏⵓⴱⴳ ⵏ ⵉⵎⴷⵔⴰⵡⵏ ⵏⵏⵙ ⵉⵏⴰⵎⵓⵔⵏ ⴳ ⵓⵏⵎⵓⵇⵇⴰⵔ ⵏⵏⵙⵏ ⴰⵎⵏⵄⴰⵕ ⴰⵙⴳⵯⵙⴰⵏ ⵉ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ (10 ⴽⵟⵓⴱⵕ).

ⵙⴳ ⵜⵙⴳⴰ ⵏⵏⵙ, ⵉⵙⵎⵖⵔ ⵎⴰⵙⵙ ⵎⴰⵔⵜⴰⵏ ⴱⵍⴰⵢⵣ ⵏⵢⴰⴱⵓⵀⵓ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵜⴰⵙⵉⵎⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⴷⵓⴷⴰ ⵏ ⴱⵓⵔⵓⵏⴷⵉ, ⵜⵉⵔⵎⵉⵜ ⵏ ⵍⵎⵖⵔⵉⴱ ⴷ ⵜⵎⵔⵙⵍⵜ ⵏⵏⵙ ⵜⴰⵏⴰⵎⵓⵔⵜ ⴷ ⵉⵣⵎⴰⵣ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴷ ⴱⵓⵔⵓⵏⴷⵉ, ⵙ "ⵓⵙⴱⵖⵔ ⵙⴳ ⵜⵎⵓⵣⴰⵢⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵢⵉⴳⵔⴰⵏ ⵏ ⵓⴼⵔⴰⴳ ⴷ ⵜⴹⴼⵕⵉ ⴷ ⵓⵙⵡⴰⵍⴰ ⴷ ⵓⵙⵎⴽⵍ ⵏ ⵜⵏⵓⵔⵣⵉⵏ ⴷ ⵓⵙⴷⵓⵙ ⵏ ⵜⵥⴹⴰⵕⵉⵏ ⵏ ⵉⵎⵙⵡⵓⵔⵉⵢⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ".

ⵉ ⵓⵙⵙⴽⵜⵉ, ⵉⴳⴰ ⵓⵔⵣⴰⴼ ⴰⴷ ⵜⴰⵎⵍⴷⴰ ⵉ ⵜⵡⵙⵙⵏⴰ ⵏ ⵉⴳⵎⴰⵎⵏ ⵏ ⵓⴽⴰⴱⴰⵔ ⴰⴱⵓⵔⵓⵏⴷⵉ ⵜⵉⵙⵎⵉⴳⴰⵍ ⵏ ⵓⵙⵇⵇⵉⵎ ⴷ ⵜⴱⵔⵉⴷⵉⵏ ⵏ ⵜⵡⵓⵔⵉ ⵏⵏⵙ ⴳ ⵢⵉⴳⵔⴰⵏ ⵉⵎⵢⴰⵏⴰⵡⵏ ⵉⵥⵍⵉⵏ ⵙ ⵓⵥⵍⴰⵢ ⵙ ⵜⵙⵎⵉⴳⴰⵍ ⵏ ⵓⵙⵇⵇⵉⵎ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴹⴼⵕⵉ ⵏ ⵜⵕⵥⵉⵢⵉⵏ ⴷ ⵓⵏⴰⴳⵔⴰⵡ ⵏ ⵓⵙⵎⴽⵍ ⵏ ⵜⵏⵓⵔⵣⵉⵏ ⴷ ⵜⵙⵜⵔⴰⵜⵉⵊⵉⵢⵉⵏ ⵏ ⵓⵎⵢⴰⵡⴰⴹ ⴷ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵍⴰ ⴰⵎⵢⴰⵖ ⴷ ⵉⵎⴰⵙⵙⵏ ⵉⴳⵔⴰⵖⵍⴰⵏⵏ ⵙⵍⴰⵡⴰⵏ ⴰⴽⴽⵯ ⴰⵙⵖⵣⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵖⵓⵔ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵎⴽⴷⴰ ⵢⵓⵎⴰ ⵓⵖⴰⵡⴰⵙ ⵉⵏⵎⵓⵇⵇⴰⵔⵏ ⴰⴽⴷ ⵜⵎⴰⴷⴷⴰⵙⵉⵏ ⵙⴳ ⵡⴰⵎⵓⵏ ⵓⵖⵔⵉⵎ ⵉⵙⵡⵓⵔⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵔⵣⴰⴼ ⵙ ⵓⴱⴰⵔⴰⵣ ⵖⵔ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ ⵉ ⵉⵥⵕⵉ ⵏ ⵜⵉⵔⵎⵉⵜ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵓⵙⵇⵇⵉⵎ.

ⵉ ⵓⵙⵙⴽⵜⵉ, ⴰⵎⵓⵏⵜ ⴳ ⵜⴷⵉⵏⴰⵎⵉⵜ ⴰⴷ ⴳ ⵉⵙⴳⴳⵯⴰⵙⵏ 2024 ⴷ 2025, ⵅⴼ ⵉⴳⴳⵉ ⵏ ⵜⵙⵇⵇⵉⵎⵜ ⵜⴰⴱⵓⵔⵓⵏⴷⵉⵜ, ⵜⵉⵎⵔⵙⴰⵍ ⵜⵉⵏⴰⵎⵓⵔⵉⵏ ⵙⴳ ⵜⵎⵏⴰⴹⵉⵏ ⵜⵉⵎⵢⴰⵏⴰⵡⵉⵏ, ⵙⴳⵉⵙⵏⵜ: ⵜⴰⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵉⴳⵣⵉⵔⵉⵏ ⵏ ⵍⵇⵓⵎⵓⵕ, ⵜⴰⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⴷⵓⴷⴰ ⵏ ⵉⴼⵔⵉⵇⵢⴰ ⵜⴰⵏⴰⵎⵎⴰⵙⵜ, ⴰⵏⴳⵎⴰⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵍⴷⵉⵜ ⵏ ⵄⵓⵎⵎⴰⵏ, ⵜⴰⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵟⵓⴳⵓ, ⵜⴰⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵙⵙⵉⵏⵉⴳⴰⵍ, ⵜⴰⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⴷⵓⴷⴰ ⵏ ⴷⵊⵉⴱⵓⵜⵉ, ⵜⴰⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴱⵓⵔⴽⵉⵏⴰ ⴼⴰⵙⵓ, ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴽⵓⵜ ⴷⵉⴼⵡⴰⵔ (…).