ⵙⵙⵏⵜⵉⵏⵜ, ⵜⵉⴼⴰⵡⵜ ⵏ ⵡⴰⵙⵙ ⴰⴷ ⴰⵙⵉⵏⴰⵙ 20 ⵛⵓⵜⴰⵏⴱⵉⵔ2022 ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵍⴱⵓⵍⵉⵙ, ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵅⴼ "ⵉⵏⴰⵡⴰⵢⵏ ⴷ ⵜⵎⵙⴽⵔⵉⵏ ⵣⴷⵉⵏⵉⵏ ⵙ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵓⵎⵔⵔⵜ ⵏⵉⵖ ⴰⴷⵔⵡⵙ ⵏⵉⵖ ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ ⴳ ⵓⵣⵎⵣ ⵏ ⵓⵙⴱⴷⴷⵉ ⴷ ⵓⵙⵙⴼⵍⴷ ⴷ ⴳ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ”. ⵉⴷⴷⴰ ⴷ ⵓⵙⵏⵎⴰⵍⴰ ⵏ ⵜⵉⵏⴰⵡⵜ ⴰⴷ ⴳ ⵓⵙⴰⵜⵉ ⵏ ⵓⵕⵥⵥⵓⵎ ⴰⵎⵢⴰⴳⴰⵏ ⵉ ⵓⵖⴰⵡⴰⵙ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵏⵏⵉ ⵉⵜⵜⵓⵙⵙⴳⵎⴹⵏ ⵉⵏⴳⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵎⴰⵙⵙ ⵄⴱⴷ ⵍⵍⴰⵟⵉⴼ ⵍⵃⵎⵎⵓⵛⵉ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵎⴰⵜⵔ ⵏ ⵡⴰⵎⵓⵔ ⴰⵏⴰⵎⵓⵔ, ⴰⵙⵙ ⵏ ⵓⴽⵕⴰⵙ 14 ⵛⵓⵜⴰⵏⴱⵉⵔ 2022 ⴳ ⵕⵕⴱⴰⵟ, ⵏⵏⴰ ⵉⵙⵡⵓⵜⵜⵙⵏ ⵜⴰⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴱⵔⵉⴷⵉⵏ ⵏ ⵓⵙⴰⵏⵓⵏ ⴷ ⵓⵙⵎⵓⵜⵜⴳ ⵏ ⵍⴱⵓⵍⵉⵙ, ⵜⴳ ⴰⵙⴰⵖⵓⵍ ⴷ ⵓⵏⵎⵎⴰⵍ ⵉⵙⵙⵓⵜⵉⵢⵏ ⵉ ⵜⵙⵎⵉⴳⴰⵍ ⵏ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵜⵜⵓⵙⵎⴰⴳⵍⵏ ⵙ ⵓⵣⵣⴳⵉⵔ ⵏ ⵉⵙⵍⴳⵏⵏ. ⵜⴻⵜⵜⵡⴰⵙⵙⴰⵏ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵎⵉ ⵉⵙⵙⵡⵀⵏ ⵜⵉⵡⵓⵔⵉⵡⵉⵏ ⵏⵏⵙ ⵎⴰⵙⵙ ⵃⵎⴰⴷ ⵃⵔⵣⵏⵏⵉ, ⴰⵎⵙⵇⴰⴷ ⴰⵎⴰⵍⵍⴰⵢ ⵉⵜⵜⵓⵙⵎⴰⴳⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵏⵙⵙⵉⵅⴼ ⴰⵎⵣⵡⴰⵔ ⵏ ⵓⵙⵇⵇⵉⵎ ⵏ ⵓⵎⵛⴰⵡⴰⵕ ⵏⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⴷⵔⴰⵡⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙ ⵎⵓⵃⵎⵎⴰⴷ ⴷⴷⵅⵉⵙⵉ, ⴰⵏⵎⵀⴰⵍ ⵏ ⵍⴱⵓⵍⵉⵙ ⴰⵏⴱⴽⴰⴹ ⴳ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵎⴰⵙⵙ ⵎⵓⵍⴰⵢ ⵍⵃⴰⵙⴰⵏ ⴷⴷⴰⴽⵉ, ⴰⴳⵏⵙⴰⵙ ⴰⵎⴰⵜⴰⵢ ⵏ ⵓⴳⵍⵍⵉⴷ ⵖ ⴷⴰⵔ ⵜⵙⵏⴱⴹⴰⵢⵜ ⵏ ⵜⵕⵓⵥⵉ ⴷ ⵓⵏⵙⵙⵉⵅⴼ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⴷ ⵜⴳⵏⵙⴰⵙⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵏⵣⵔⴰⴼⵜ. ⵙⵡⵓⵜⵜⵙⵏ ⵉⵎⵛⵛⵕⴽⵏ ⵙⴳ ⵓⵙⵏⵎⴰⵍⴰ ⵏ ⵜⵉⵏⴰⵡⵜ ⴰⴷ ⵜⴰⴳⵔⴰⵖⵍⴰⵏⵜ, ⵏⵏⵉ ⵉⵜⵜⵡⴰⵙⵙⴰⵏⵏ ⵙ ⵜⴷⵔⴰⵡⵜ ⵏ ⵏ ⵉⵎⴳⴳⴰⵢⵏ ⴷ ⵉⵎⵓⵣⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⴰⵙⵙⵉⴷⴷ ⵅⴼ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴳ ⵢⵉⴳⵔ ⵏ ⵓⵣⵣⴳⵉⵔ ⵏ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⴷ ⵜⵓⵎⵀⵉⵍⵉⵏ ⵕⵡⴰⵏⵉⵏ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵅⴼ ⵉⴳⴳⵉ ⵏ ⵓⵎⵙⴳⴷⴰⵍ ⵏ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ ⵉ ⵓⴳⴷⴷⵓⵍ ⵏ ⵓⵙⵔⴼⵓⴼⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⵡⵉⵔ ⴰⴳⵔⴰⵖⵍⴰⵏ; ⴷ ⵓⵙⵙⴼⵔⴽ ⵙ ⵜⵉⵍⴰⵍⵜ ⵏ ⵉⵎⴰⵙⵙⵏ ⵏ ⵓⵎⴷⴰⵢ ⴷ ⵓⴱⵟⵟⵓ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵣⴷⵉⵏⵉⵏ ⵙ ⵓⵙⵡⵓⴷⴷⵓ ⴷ ⵓⴹⴼⴼⵓⵕ. ⵙ ⵜⵎⵍⴷⴰ ⴰⴷ, ⵜⵙⵙⴼⴰⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ ⵜⴳⴰ "ⵜⵎⴷⵔⴰⵡⵜ ⵉⵏⴳⵔ ⵓⵙⵇⵇⵉⵎ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵜⴰⵎⴷⵔⴰⵡⵜ ⵉⵟⵟⴰⴼⵏ ⵜⵎⴰⵜⴰⵔⵜ ⵜⴰⴽⵙⵡⴰⵜ ⴷ ⵜⵖⴱⵉ ⵜⴰⵣⵔⴼⴰⵏⵜ ⵓⵔ ⵉⵍⵉⵏ ⴰⵏⴰⵡ, ⵉⴷⴷⵖ ⵜⴳⴰ ⵜⴰⵙⵜⵔⴰⵜⵉⵊⵉⵜ ⵜⴰⵖⵣⵓⵔⴰⵏⵜ ⵉⵣⵔⵉⵏ ⵉⵡⵜⵜⴰ ⵏ ⵜⵡⵓⵔⵉ ⵜⴰⵎⵔⵙⴰⵍⵜ ⴰⵔ ⵜⵙⵙⵓⵎⵓⵔ ⵜⵉⵙⵏⵜⴰⵢⵉⵏ ⵏ ⵓⵙⴱⵓⵖⵍⵓ ⵏ ⵜⵎⵙⴽⵔⵉⵏ ⵏ ⵓⵙⵎⵀⵍ ⵏ ⵉⵏⴰⵡⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵃⵟⵟⵓ ⵏ ⵓⴱⵓⵔⵣ ⴰⵏⴼⴳⴰⵏ ⴳ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⵉⴹⴼⵕⵏ ⵉ ⵜⵏⴼⵔⵓⵜ ⵜⴰⵏⴰⵎⵓⵔⵜ". ⴰⵔ ⵜⵜⴰⵏⵏⴰⵢ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵙⴰⵏⵓⵏ ⴷ ⵓⵙⴷⵓⵙ ⵏ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵖⴰⵏⵜ ⵏ ⵜⵏⴼⵔⵓⵜ ⵜⴰⵙⴰⵜⵓⵔⵜ ⵏ ⵓⴼⵊⵊⵉⵊ ⵙ ⵉⵣⵔⴼⴰⵏ ⴷ ⵓⵙⴰⵙⵜⵍ ⵉⵟⵟⴰⴼⵏ ⴰⵖⵣⴰⵏ ⴰⵎⴰⵜⵜⴰⵢ ⵉ ⵓⵙⵓⵜⴳ ⵏ ⵓⵙⵖⴰⵍ ⵏ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⵏ ⵉⵡⴰⵏⴽⵏ, ⵍⵓⵎⵎⵏ ⵍⵍⵉⵖ ⵜⵍⵍⴰ "ⵜⵏⴼⵔⵓⵜ ⴳ ⵜⵏⴰⴼⵓⵜ ⵏ ⵓⵏⵎⵓⵔⵉ, ⵙ ⵎⴰⵢⴰ, ⵉⴳⴰ ⴰⵎⴳⴳⴰⵢ ⴰⵣⵔⴼⴰⵏ ⴳ ⵜⵎⵙⵓⵜⴰⵍ ⴰⴽⴽⵯ ⵉⵎⵎⵔⵏ ⵏ ⵓⵏⵎⵓⵔⵉ, ⵍⵍⵉⵖ ⵉⵜⵜⵓⴼⴰⵜⵉ ⵙⴳ ⵜⴷⵔⴼⵉ ⵏⵏⵙ". ⴳ ⵎⴰⴷ ⵉⵥⵍⵉⵏ ⵙ ⵓⵙⵔⵓⵙ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⴰⵣⵎⵣ ⵓⵔ ⵉⵍⵉⵏ ⴰⵏⴰⵡ ⴳ ⵓⴱⵔⵉⴷ ⵏ ⵜⵓⵚⴽⴰ ⵏ ⵓⵡⴰⵏⴽ ⵏ ⵓⵙⵍⴳⵏ, ⴷ ⵜⴷⴰⵙⵉⵍⵜ ⵜⴰⴷⵙⵍⴰⵏⵜ ⴳ ⵜⵓⴳⴳⴰⵣ ⵏ ⵓⵙⴷⵓⵙ ⵏ ⵜⵏⴼⵔⵓⵜⵉⵏ ⵏ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵀⵍ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵜⴰⵣⵔⴼⴰⵏⵜ ⵏⵏⴰ ⵉⵙⵙⵕⵚⴰ ⵓⴷⵓⵙⵜⵓⵔ ⵏ 2011, ⵉⴷⴷⵖ ⵜⴳⴰ ⴰⵙⴷⴷⵉⴷ ⵅⴼ ⵓⴱⵓⵢ ⴰⴽⴷ ⵜⴼⵔⴽⵜ ⵏ ⵜⵕⵥⵉⵢⵉⵏ, ⴷ ⵜⵏⴼⵔⵓⵜ ⵏ ⵉⵍⵓⴳⵏⵏ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ ⴳ ⵓⴳⵏⵙⵓ ⵏ ⵡⴰⵎⵎⴰⵙⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ. ⵓⵔ ⵜⴻⵜⵜⵓ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴳ ⵜⵖⵉⵎⵉⵜ ⴰⴷ ⵜⴰⵍⵍⵖ ⵙ ⵜⵎⴰⵖⵓⵏⵜ ⵏ ⵜⵡⵓⵔⵉ ⵏ ⵉⵎⵉⵙ ⵏⵏⴰ ⵜⵙⵏⵓⵎⵎⵍ ⵙ ⵜⵓⵎⵏⵉⴳⵜ ⴷ ⵜⵎⵙⵙⵔⵇⴱⵜ, ⵍⵓⵎⵎⵏ ⵍⵍⵉⴳ ⵉⵣⵎⵎⴻⵎ ⴰⵙⵖⴰⵍ ⵢⵓⵡⴹⵏ ⵉⵏⴳⵔ 80 ⴷ 90 ⴳ ⵜⴳⵎⵉⴹⵉ, ⴳ ⵎⴰⴷ ⵉⵥⵍⵉⵏ ⵙ ⵓⵎⵢⴰⵖ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⵏⵉⵖ ⵜⴰⵎⵀⵍⴰ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵏⵉⵖ ⵜⵉⵊⴹⵕⵎⵜ ⵜⴰⴳⵍⴷⴰⵏⵜ ⴰⴽⴷ ⵉⵙⵖⵍⴰⴼ ⵏⵏⵙ, ⵜⵙⵙⴽⵜⵉ ⵎⴰⵙ ⴷⴰ ⵉⵙⵙⵓⵊⴰⴷ ⵉⵎⵉⵙ ⵉ ⵉⵔⵣⴰⴼⵏ ⵏ ⵓⴹⴼⴼⵓⵕ ⵉ ⴽⵉⴳⴰⵏ ⵏ ⵜⵙⵏⴱⴹⴰⵢⵉⵏ ⴷ ⵉⵙⴰⴳⴳⵯⵣⵏ ⴷ ⵉⵙⴳⵏⴰⴼⵏ ⵏ ⵜⵎⴰⴹⵓⵏⵉⵏ ⵜⵉⵎⵏⵍⵍⵉⵜⵉⵏ ⴰⴼⴰⴷ ⴰⴷ ⵉⵙⵖⵍ ⴰⵙⵎⵀⵍ ⵏ ⵉⵙⵖⵍⴰⴼ ⵏⵏⵙ, ⵉⵙⵡⵓⵜⵜⵙ ⴳ ⵙⵉⵏ ⵉⵙⴳⴳⵯⴰⵙⵏ ⵏⵏⵉ ⴷ ⵉⴷⴷⴰⵏ ⴰⴷ ⵢⴰⵍⵍ ⵓⵟⵟⵓⵏ ⵏ ⵉⵔⵣⴰⴼⵏ ⵏⵏⵙ ⵙ 100 ⵏ ⵉⵔⵣⴰⴼⵏ ⴳ ⵓⵙⴳⴳⵯⴰⵙ ⵏ 2024. ⵜⵔⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⴷⴰ ⵙⵙⵃⵔⴰⵛⵏⵜ ⵜⵢⴰⴼⵓⵜⵉⵏ ⴰⴷ ⵅⴼ ⵓⵣⵣⵉⴳⵣ ⵙ ⵢⴰⵜ ⵜⵡⵉⵍⴰ ⴳ ⵓⵔ ⵉⵍⵍⵉ ⵓⵣⵀⵣⵣⴰ ⴳ ⵓⵙⴱⴷⴷⵉ ⵏ ⴽⵓⵍⵍⵓ ⵎⴰⴷ ⵉⵣⵎⵔⵏ ⴰⴷ ⵉⵟⵟⴰⵚ ⴰⴱⵓⵔⵣ ⴰⵏⴼⴳⴰⵏ, ⵍⵓⵎⵎⵏ ⵍⵍⵉⵖ "ⵏⵙⵡⵓⵜⵜⵙ ⴰⴷ ⵏⴰⵡⴹ ⴰⵎⵢⴰ ⵏ ⵓⵎⵙⵓⵔⵓⴼ ⴰⴽⴷ ⵓⵙⵔⴼⵓⴼⵏ ⵏⵉⵖ ⴰⴷⵔⵡⵙ ⴷ ⵓⵎⵔⵎⴷ ⴷ ⵓⵣⵣⵓⴳⵣ ⵙ ⵓⴱⵓⵔⵣ ⵏ ⴽⵔⴰ ⵏ ⵓⴼⵔⵉⴷ, ⵉⴳⴰⵏ ⴰⵡⵜⵜⴰⵙ ⴰⵎⴰⵜⵜⴰⵢ". ⵙⴳ ⵜⵙⴳⴰ ⵏⵏⵙ, ⵢⵓⵍⵍⵖ ⵎⴰⵙⵙ ⵄⴱⴷ ⵍⵍⴰⵟⵉⴼ ⵍⵃⵎⵎⵓⵛⵉ, ⴰⵏⵎⵀⴰ ⴰⵎⴰⵜⴰⵢ ⵏ ⵜⵏⴼⵔⵓⵜ ⵜⴰⵎⴰⵜⴰⵢⵜ ⴷ ⵓⵎⴰⵜⵔ ⵏ ⵡⴰⵎⵓⵔ ⴰⵏⴰⵎⵓⵔ ⴳ ⵜⴳⵓⵔⵉ ⵏⵏⴰ ⵉⵖⵔⴰ ⵙ ⵜⵙⵎⵉⵔⵉⵜ ⵅⵉⴼⵙ ⵎⴰⵙⵙ ⵎⵓⵃⵎⵎⴰⴷ ⴷⴷⵅⵉⵙⵉ, ⴰⵏⵎⵀⴰⵍ ⵏ ⵍⴱⵓⵍⵉⵙ ⴰⵏⴱⴽⴰⴹ ⴳ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵎⴰⵙ ⵉⴳⴰ ⵓⵙⵔⵓⵙ ⵏ "ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ" ⵉⵜⵜⵓⵙⴹⵕⵚⵏ ⴳ ⵓⴳⵣⵣⵓⵎ ⵡⵉⵙ ⴽⴽⵓⵥ ⵏ ⵓⴱⵕⵓⵜⵓⴽⵓⵍ ⴰⵔⵓⵛⵛⵉⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ, ⵜⴳⴰ ⵜⵉⴼⵔⴽⵜ ⵜⴰⵎⵇⵇⵔⴰⵏⵜ ⴳ ⵓⴱⵔⵉⴷ ⵏ ⵓⵙⵎⵀⵍ ⵏ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⴷⵙⵜⴰⵔⵉⵏ ⵏ ⵍⵎⵖⵔⵉⴱ. ⵉⵔⵏⵓ ⵎⴰⵙ ⵜⴰⵎⵓ ⵜⵙⵏⵜⴰⵢⵜ ⵏ ⵓⵙⵏⵎⴰⵍⴰ ⵏ ⵓⵏⵎⵓⵇⵇⴰⵔ ⴰⴷ ⴰⵎⴰⵙⵙⴰⵏ ⴳ ⵜⵉⵔⴰⵜ ⵉⵜⵜⵓⵙⴷⴷⵉⴷⵏ ⴳ ⵓⵙⵎⵓⵙⵙⵓ ⴷ ⵓⵣⴷⴰⵢ ⵏ ⵜⵓⴳⴳⴰⵣ ⴳ ⵓⵙⴰⵜⵉ ⵏ ⵜⵎⴷⵔⴰⵡⵜ ⵜⴰⵎⴳⴳⴰⵢⵜ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵙ ⵇⴰⵃ ⵜⵡⵉⵍⴰⵜⵉⵏ ⵏⵏⵙ, ⵏⵏⴰ ⵙⵎⵏⴰⵍⵏ ⵇⴰⵃ ⵉⵙⴳⴷⵏ ⵏ ⵉⴳⵏⵏⴰ ⴰⵔ ⵜ ⵙⴱⴽⴽⵉⴹⵏ ⵉⵙⵍⴳⵏⵏ ⵉⵏⴰⵎⵓⵔⵏ ⴰⵔ ⵜ ⵜⵜⵏⴽⴰⴹⵏⵜ ⵜⵙⴰⵖⵓⵍⵉⵏ ⵜⵉⵣⵔⴼⴰⵏⵉⵏ ⵜⵉⵖⵥⵓⵕⴰⵏⵉⵏ. ⵉⵙⴷⴷⵉⴷ ⵎⴰⵙⵙ ⴷⴷⴰⴽⵉ, ⴳ ⵓⵙⴰⵜⵉ ⵏ ⵉⵔⵣⵣⵓⵜⵏ ⵏⵏⴰ ⵜⵜⴳⴳⴰ ⵜⵎⵓⵔⴰⵢⵜ ⵜⴰⵎⴰⵜⴰⵢⵜⴳ ⵎⴰⴷ ⵉⵥⵍⵉⵏ ⵙ ⵉⴱⵔⵔⵉⵡⵏ ⵏ ⵓⵙⵔⴼⵓⴼⵏ, ⵉⵜⵜⵡⴰⵏⵥⴰⵢ ⵎⴰⵙ ⵢⴰⵖⵓⵍ ⵓⵟⵟⵓⵏ ⵏ ⵜⵏⵓⵔⵣⵉⵏ ⵏⵏⵉ ⴰⵙ ⵉⵜⵜⵓⵙⵎⵏⵉⴷⵏ ⵉⴷⵔⵓⵙ ⴳ ⴽⵕⴰⴹ ⵏ ⵉⵙⴳⴳⵯⴰⵙⵏ ⵉⵎⴳⴳⵓⵔⴰ; ⵜⵜⵓⵣⵎⵎⵉⵎⵏⵜ ⴳ ⵓⵙⴳⴳⵯⴰⵙ ⵏ 2020 ⵢⴰⵜ ⴷ ⵎⵔⴰⵡⵜ ⵏ ⵜⵏⵓⵔⵣⵉⵏ ⵣⴷⵉⵏⵉⵏ ⵙ ⵉⴱⵔⵔⵉⵡⵏ ⵏ ⵓⵙⵔⴼⵓⴼⵏ, ⵓⵟⵟⵓⵏ ⴰⴷ ⵏⵉⵜ ⵉⵜⵜⵓⵣⵎⵎⴻⵎ ⴳ ⵓⵙⴳⴳⵯⴰⵙ ⵏ 2021; ⵎⴰⵛ ⵉⴳⴳⵣ ⵙ 7 ⵏ ⵜⵏⵓⵔⵣⵉⵏ ⴷⴰⵢ ⴳ ⵜⵉⵣⵉ ⵜⴰⵣⴳⵔⴰⵔⵜ ⵙⴳ 01 ⵉⵏⵏⴰⵢⵔ 2022 ⴰⵔ ⵜⵉⴳⵉⵔⴰ ⵏ ⵡⴰⵢⵢⵓⵔ ⵏ ⵖⵓⵛⵜ ⵏ ⵓⵙⴳⴳⵯⴰⵙ ⴰⴷ ⵏⵉⵜ, ⵜⵜⵡⴰⵕⵥⴰⵎⵏ ⴼⵍⵍⴰⵙⵏ ⵉⵔⵣⵣⵓⵜⵏ ⵉⵏⴱⴽⴰⴹⵏ, ⵜⵜⵡⴰⵙⴰⵢⵏⵜ ⵜⵖⵜⴰⵙⵉⵏ ⵎⵙⴰⵙⴰⵏⵉⵏ ⴳ ⵓⵙⵙⵉⴷ ⵏ ⵎⴰⵢⴰ ⵏⵏ. ⵉ ⵓⵙⴽⵜⵉ, ⵜⴻⵜⵜⵡⴰⵙⵙⴰⵏ ⵜⵉⵏⴰⵡⵜ ⴰⴷ ⵜⴰⴳⵔⴰⵖⵍⴰⵏⵜ, ⵏⵏⴰ ⴳ ⵙⵡⵓⵔⵉⵏ ⵉⵎⴷⵔⴰⵡⵏ ⵏⵏⵙ ⵅⴼ ⵜⵖⵓⵔⵉ ⵏ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵉⵎⴰⵙⵙⵏ ⴷ ⵜⵎⴳⴳⵉⵜⵉⵏ ⵏ ⵡⴰⵔⴰⵢ ⵙⴳⵉⵙ, ⵙ ⵜⴷⵔⴰⵡⵜ ⵏ ⵉⵎⵓⵣⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴷ ⵉⴳⵏⵙⴰⵙ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ ⴷ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵏⴱⴽⴰⴹⵜ ⴷ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵜⵎⴰⵡⴰⵙⵜ ⵏ ⵜⵣⵔⴼⵜ ⴷ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵙⴷⴰⵡⵉⵢⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴷ ⵓⴳⴳⴰⵔ.