ⵔⴰⴷ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵜⵉⴳⵎⵎⵉ ⵜⵓⵎⵍⵉⵍⵜ-ⵙⵟⵟⴰⵜ, ⵙ ⵓⵣⴷⴰⵢ ⴰⴽⴷ ⵜⵎⵀⵍⴰ ⵜⴰⵏⵎⵏⴰⴹⵜ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ ⴳ ⵜⵎⵏⴰⴹⵜ, ⵢⴰⵏ ⵓⵏⵎⵓⵇⵇⴰⵔ ⴰⵏⵎⵏⴰⴹ ⵉ ⵜⵖⵓⵔⵉ ⵏ ⵜⵓⵎⴰⵢⵉⵏ ⵏ ⵜⴰⵏⴰⴹⵜ ⵜⴰⵙⴳⵓⵎⴰⵏⵜ ⵏⵏⴰ ⴷ ⵉⵙⵙⴰⴼⵖ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ "ⵜⴰⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⴷⵓⵙⵉ ⴳ ⵍⵎⵖⵔⵉⴱ .. ⵉⵏⴰⵥⴰⵕⵏ ⴷ ⵉⵎⵙⴰⵔⴰⵙⵏ ⴷ ⵉⵙⴰⴷⴰⴼⵏ ⵏ ⵓⵙⴷⵓⵙ", ⴰⵙⵙ ⵏ ⵓⴽⵡⴰⵙ 13 ⴽⵟⵓⴱⵕ 2022 ⵙⴳ ⵜⵙⵔⴰⴳⵜ ⵜⵉⵙ ⵜⵥⴰ ⵏ ⵜⵉⴼⴰⵡⵜ, ⴳ ⵓⵙⵖⵉⵎ ⵏ ⵜⵎⵀⵍⴰ ⵜⴰⵏⵎⵏⴰⴹⵜ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⴳ ⵜⴳⵎⵎⵉ ⵜⵓⵎⵍⵉⵍⵜ. ⵢⴰⵎⵓ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵏ ⵜⵥⵍⴰⵢⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵣⴷⵉⵏⵉⵏ ⵙ ⵓⵙⵓⵜⴳ ⵏ ⵜⵎⵢⴰⴳⴰⵏⵜ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ. ⵉⵙⵡⵓⵜⵜⵙ ⴰⵙⴱⵓⵖⵍⵓ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ, ⵏⵏⴰ ⵉⵕⵥⵎ ⵓⵙⵇⵇⵉⵎ ⵅⴼ ⵓⵣⵔⴼ ⴳ ⵜⴷⵓⵙⵉ ⴳ ⵓⵙⵡⵉⵔ ⴰⵏⵎⵏⴰⴹ, ⴰⴽⴷ ⵜⵓⴳⵜ ⵏ ⵉⵏⴳⵎⴰⵎⵏ ⴷ ⵉⵎⴳⴳⴰⵢⵏ ⴷ ⵉⵎⵓⵣⴰⵢⵏ ⴷ ⵉⵎⵔⵣⴰ ⴷ ⵉⵎⵙⵜⴳⴳⴰⵔⵏ ⵙ ⵓⵙⴳⵓⵎ ⴳ ⵓⵙⵡⵉⵔ ⵏ ⵜⵎⵏⴰⴹⵜ ⵏ ⵜⴳⵎⵎⵉ ⵜⵓⵎⵍⵉⵍⵜ-ⵙⵟⵟⴰⵜ, ⴳ ⵓⵙⵙⵉⴷⴷ ⵏ ⵜⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵏ ⵜⴰⵏⴰⴹⵜ ⵜⴰⵙⴳⵓⵎⴰⵏⵜ ⵏⵏⴰ ⴷ ⵉⵙⵙⴰⴼⵖ ⵓⵙⵇⵇⵉⵎ ⵅⴼ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⴷⵓⵙⵉ ⴳ ⵡⴰⵢⵢⵓⵔ ⵏ ⵉⴱⵔⵉⵔ 2022. ⵔⴰⵏ ⵉⵎⴷⵔⴰⵡⵏ ⴰⴷ ⵎⵔⴰⵔⴰⵏ ⵅⴼ ⵉⵎⵔⵙⵉ ⵏ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⴷⵓⵙⵉ ⵙⴳ ⴽⵕⴰⴹ ⵉⵙⴳⵓⵎⵏ ⵉⴷⵙⵍⴰⵏⵏ: "ⵜⴰⵖⵓⵔⵉ ⴳ ⵜⴰⵏⴰⴹⵜ ⵜⴰⵙⴳⵓⵎⴰⵏⵜ ⵏ ⵓⵙⵇⵇⵉⵎ"; "ⵜⵉⵍⵍⴰⵡⵜ ⴷ ⵉⵎⵉⴷⵏ ⵏ ⵜⴷⵓⵙⵉ ⴳ ⵜⵎⵏⴰⴹⵜ ⵏ ⵜⴳⵎⵎⵉ ⵜⵓⵎⵍⵉⵍⵜ-ⵙⵟⵟⴰⵜ" ⴷ "ⵜⵉⵎⵓⴽⵔⵉⵙⵉⵏ ⵣⴷⵉⵏⵉⵏ ⵙ ⵜⵎⵢⴰⴳⴰⵏⵜ ⵏ ⵓⵙⵉⴷⴼ ⵙ ⵓⵣⵔⴼ ⴳ ⵜⴷⵓⵙⵉ ⴳ ⵜⵎⵏⴰⴹⵜ". ⵉ ⵓⵙⴽⵜⵉ, ⵉⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵕⵥⵎ, ⴳ 14 ⴽⵟⵓⴱⵕ 2020, ⵢⴰⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ "ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⴷⵓⵙⵉ ⴳ ⵍⵎⵖⵔⵉⴱ: ⵖⵔ ⵢⴰⵏ ⵓⵏⴳⵔⴰⵡ ⴰⴷⵓⵙⴰⵏ ⵉⵏⵏⴰⵍⵏ ⵅⴼ ⵜⵎⵢⴰⴷⴰⵙⵜ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ", ⴰⴼⴰⴷ ⴰⴷ ⵉⵜⵜⵓⴳⴰ ⵓⵏⵄⴰⵕ ⵅⴼ ⵓⵙⵔⵙ ⵏ ⵢⴰⵜ ⵜⵙⵜⵔⴰⵜⵉⵊⵉⵜ ⵜⴰⴷⵓⵙⴰⵏⵜ ⵜⴰⵏⴰⵎⵓⵔⵜ ⵜⴰⵎⵙⵙⵉⴷⴼⵜ, ⵜⴰⵎⵙⵙⵓⵎⵓⵜ ⴷ ⵜⵓⵎⵙⵉⵙⵜ ⵉⵣⵎⵔⵏ ⴰⴷ ⵜⵏⴼⵔⵓ ⴰⵣⵔⴼ ⵏ ⵇⴰⵃ ⴳ ⵜⴷⵓⵙⵉ. ⴳ ⵜⴰⵎⴰ ⵏ ⵓⵏⵎⵓⵇⵇⴰⵔ ⴰⴷ, ⵔⴰⴷ ⵜⴻⵜⵜⵓⵙⵙⴳⵎⴹ ⵢⴰⵜ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⵉⵏⴳⵔ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵜⴳⵎⵎⵉ ⵜⵓⵎⵍⵉⵍⵜ-ⵙⵟⵟⴰⵜ ⴷ ⵜⵎⵀⵍⴰ ⵜⴰⵏⵎⵏⴰⴹⵜ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⵏⵏⵉ ⵉⵙⵡⵓⵜⵜⵙⵏ ⴰⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵣⴷⴰⵢ ⵉⵏⴳⵔ ⵜⵎⵔⵙⴰⵍ ⵙ ⵙⵏⴰⵜ ⴳ ⵢⵉⴳⵔⴰⵏ ⵏ ⵓⴼⵔⴰⴳ ⴷ ⵓⵙⴷⵓⵙ ⵏ ⵓⵣⵔⴼ ⴳ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ.