ⵔⴰⴷ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵕⵕⴱⴰⵟ- ⵙⵍⴰ- ⵍⵇⵏⵉⵟⵕⴰ ⵢⴰⵏ ⵓⵏⵎⵓⵇⵇⴰⵔ ⵅⴼ ⵉⵎⵔⵙⵉ "ⴰⵣⵔⴼ ⴳ ⵡⴰⵎⴰⵏ ⴷ ⵓⵙⵉⵣⴷⴳ ⴰⴷⵓⵙⴰⵏ: ⴰⵙⵎⴰⵇⵇⵍ ⵏ ⵉⵎⴳⴳⴰⵢⵏ", ⴰⵙⵙ ⵏ ⵓⴽⵡⴰⵙ 3 ⵎⴰⵕⵚ 2022 ⴳ ⵓⵙⵖⵉⵎ ⵏ ⵜⵎⴰⵡⴰⵙⵜ ⵏ ⵓⵎⴰⵡⴰ ⴷ ⵡⴰⵙⵙⴰⵢ ⴷ ⵜⵍⵓⵊⵉⵙⵜⵉⵜ ⴷ ⵡⴰⵎⴰⵏ ⴳ ⵕⵕⴱⴰⵟ. ⵉⵙⵡⵓⵜⵜⵙ ⵓⵏⵎⵓⵇⵇⴰⵔ ⴰⴷ ⵏⵏⴰ ⵔⴰⴷ ⵜⵙⵡⵓⵜⵜⵙ ⵎⴰⵙⵙⴰ ⵃⵓⵔⵢⵢⴰ ⵜⵜⴰⵣⵉ ⵚⴰⴷⵉⵇ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵕⵕⴱⴰⵟ- ⵙⵍⴰ- ⵍⵇⵏⵉⵟⵕⴰ ⵜⴰⵏⴽⴷⴰ ⵏ ⵓⵎⵏⴰⴷ ⵏ ⵜⵓⴳⵜ ⵏ ⵉⵎⴳⴳⴰⵢⵏ ⵅⴼ ⵉⵎⵔⵙⵉ ⵏ ⵓⵣⵔⴼ ⴳ ⵡⴰⵎⴰⵏ ⴷ ⵓⵙⵎⵓⵜⵜⴳ ⵏ ⵓⵔⵎⴰⵙ ⴰⵎⴰⵣⴰⵔ ⴼⵍⵍⴰⵙ. ⵎⴽⴷⴰ ⵔⴰⴷ ⵉⴳ ⵜⴰⵎⵍⴷⴰ ⵏ ⵓⵎⵙⴳⴷⴰⵍ ⴷ ⵓⵙⵏⴼⵍ ⵏ ⵉⵎⵏⴰⴷⵏ ⵉⵏⴳⵔ ⵜⵓⴳⵜ ⵏ ⵉⵎⴳⴳⴰⵢⵏ ⴳ ⵢⵉⴳⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴳⵎⵉ, ⴰⴼⴰⴷ ⴰⴷ ⵜⵉⵍⵉ ⵜⴷⵔⴰⵡⵜ ⴳ ⵓⵙⵎⵓⵜⵜⴳ ⵏ ⵜⴷⴰⵙⵉⵍⵜ ⵜⴰⵎⴰⵣⴰⵔⵜ ⵅⴼ ⵓⵣⵔⴼ ⴰⴷ ⴳ ⵓⵙⵡⵉⵔ ⴰⵏⵎⵏⴰⴹ. ⵔⴰⴷ ⴷⵔⵓⵏ ⴳ ⵓⵏⵎⵓⵇⵇⴰⵔ ⴰⴷ, ⵉⴳⵏⵙⴰⵙ ⵏ ⵜⵎⵙⵎⵓⵏⵉⵏ ⵜⵉⵏⵣⵔⴰⴼⵉⵏ ⴷ ⵉⵎⴳⴳⴰⵢⵏ ⴳ ⵢⵉⴳⵔ ⵏ ⵜⴳⵎⵉ ⵜⴰⵙⵓⵍⴰⵏⵜ ⴷ ⵉⴳⵏⵙⴰⵙ ⵏ ⵜⵎⵔⵙⵍⵜ ⵜⴰⵏⴱⴽⴰⴹⵜ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴷ ⵉⵎⴳⴳⴰⵢⵏ ⵉⴷⵖⵔⴰⵏⵏ ⴷ ⵉⴽⴰⴷⵉⵎⵉⵢⵏ... ⴰⴼⴰⴷ ⴰⴷ ⵙⴱⵓⵖⵍⵓⵏ ⴰⵎⴹⴰⴽⴰⵕ ⴷ ⵓⵙⵎⵓⵜⵜⴳ ⵏ ⵜⴰⵏⴰⴹⵜ ⵉⵙⵙⵉⴳⵣⵓⵍⵏ ⵜⵉⵙⴳⴳⵯⵉⵏ ⴰⴽⴽⵯ ⵣⴷⵉⵏⵉⵏ ⵙ ⵓⵣⵔⴼ ⴳ ⵡⴰⵎⴰⵏ ⴷ ⵓⵎⵙⴳⵔⴰ ⵏ ⵉⵙⵖⵍⴰⴼ ⵏⵏⴰ ⵔⴰⴷ ⵢⴰⵡⵙ ⴳ ⵜⵙⵉⵍⴰⵡⵜ ⵏ "ⴰⵖⵓⵔⵉ ⵏ ⵜⵎⵢⴰⴳⵏⵜ ⵏ ⵓⵣⵔⴼ ⴳ ⵡⴰⵎⴰⵏ ⴷ ⵓⵙⵉⵣⴷⴳ ⵏ ⵓⵃⵔⵓⵔⴰⵢ ⵣⵖ ⵓⵙⵎⴰⵇⵇⵍ ⵏ ⵜⴳⵎⵉ ⵜⴰⵙⵓⵍⴰⵏⵜ". ⵔⴰⴷ ⵢⴰⴷⴷ ⵓⵎⴹⴰⴽⴰⵕ ⵅⴼ ⴽⵉⴳⴰⵏ ⵏ ⵉⵙⴳⵓⵎⵏ ⵣⴷⵉⵏⵉⵏ ⵙ ⵓⵎⴰⵜⴰ ⵙ: "ⴰⵣⵔⴼ ⴳ ⵡⴰⵎⴰⵏ, ⵙⴳ ⵜⵓⵜⵜⵔⴰ ⵙ ⵓⵙⵎⵀⵍ"; "ⴰⵎⴰⵏ, ⴰⴼⵔⴷⵉⵙ ⴰⴷⵙⵍⴰⵏ"; "ⴰⵣⵔⴼ ⴳ ⵡⴰⵎⴰⵏ, ⵎⴰⵏ ⴰⵏⴰⵡ ⴰⵎⴰⵙⵙⴰⵏ"; "ⴰⵣⵔⴼ ⴳ ⵡⴰⵎⴰⵏ: ⵙⴳ ⵜⵎⴰⵅⵉⵔⵜ ⵙ ⵜⴷⵔⵙⵉ". ⵉⴼⵓⴽ ⴰⴷ ⵏⵙⵎⵍ ⵎⴰⵙ ⵉⵙⴷⵓⵙ ⵍⵎⵖⵔⵉⴱ ⴰⵣⵔⴼ ⴳ ⵡⴰⵎⴰⵏ ⴳ ⵓⵎⴰⴳⵔⴰⴷ 31 ⵏ ⵓⴳⵓⵙⵜⵓⵔ ⵏⵏⴰ ⵉⵙⴹⵕⵚⵏ ⵎⴰⵙ :"ⴷⴰ ⵉⵙⵡⵓⵔⵉ ⵓⵡⴰⵏⴽ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⵅⴼ ⵓⵙⵎⵓⵙⵙⵓ ⵏ ⵇⴰⵃ ⵉⵎⴰⵙⵙⵏ ⴳ ⵓⵙⵡⵀⵏ ⵏ ⵜⵎⵏⵜⵉⵍⵉⵏ ⵏ ⵓⵚⴰⵃⴰ ⵏ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ, ⵙ ⵉⵙⴽⵉⵍ, ⵏ ⵓⵣⵔⴼ ⴳ (...) ⵓⵙⵉⴷⴼ ⵙ ⵡⴰⵎⴰⵏ ⴷ ⵜⵓⴷⵔⵜ ⴳ ⵜⵡⵏⵏⴰⴹⵜ ⵉⵣⴷⴷⵉⴳⵏ; ⵜⵉⴳⵎⵉ ⵜⴰⵙⵓⵍⴰⵏⵜ".