ⵉⴳⴰ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵢⴰⵏ ⵉⵎⵉⵙ ⴰⵙⵉⵎⴰⵏ ⵏ ⵓⵎⴰⵜⵔ ⵏ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ, ⵉⵜⵜⵡⴰⵙⵔⴰⵙ ⵙ ⵓⵎⵙⴰⵙⴰ ⴰⴽⴷ ⵜⵎⵜⵜⴰ 12 ⵏ ⵓⵙⵍⴳⵏ 76-15 ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵙⴰⴷⵎⵔ ⵉ ⵜⵎⵜⵜⴰ 3 ⵏ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵓⵎⵔⵔⵜ ⵏⵉⵖ ⵜⴰⵎⵔⵔⵓⵜ ⵏ ⵓⴷⵔⵡⵙ, ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ (OPCAT) ⵏⵏⵉ ⵉⵙⵖⵣⵏ ⵍⵎⵖⵔⵉⴱ ⴳ 24 ⵏⵓⵡⴰⵏⴱⵉⵔ 2014 : “ⴷⴰ ⵉⵙⵔⴰⵙ ⵏⵉⵖ ⴷⴰ ⵉⵙⵎⴰⵍ ⵏⵉⵖ ⴷⴰ ⵉⵙⵡⵓⴷⴷⵓ ⴽⵓ ⵓⵡⴰⵏⴽ ⵉⴳⴰⵏ ⵜⴰⴼⵓⵍⵜ ⵢⴰⵏ ⵓⵏⴳⵎⴰⵎ ⴰⵏⵔⵣⵓⴼ ⵏⵉⵖ ⵓⴳⴳⴰⵔ ⴳ ⵓⵙⵡⵉⵔ ⴰⴷⵖⵔⴰⵏ ⵉ ⵓⵙⴳⴷⵍ ⵏ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵓⵎⵔⵔⵜ ⵏⵉⵖ ⵜⴰⵎⵔⵔⵓⵜ ⵏ ⵓⴷⵔⵡⵙ, ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ.”

ⵉⵥⵍⵉ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵙ ⵓⵙⵓⵔⵙ ⴷ ⵜⵉⵍⴰⵡⵜ ⵏ ⵓⵎⵓⴳⴳⵓ ⵏ ⵓⴳⴳⵉⴷⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙⵏ ⵙ:

• ⵉⴳⵉ ⵏ ⵉⵔⵣⴰⴼⵏ ⵉⵍⵓⴳⴰⵏⵏ ⵉ ⵜⵓⴳⵜ ⵏ ⵉⴷⵖⴰⵔⵏ ⵏⵏⴰ ⴳ ⵍⵍⴰⵏ ⵓⴳⴳⵉⴷⵏ ⵜⵜⵓⵖⴱⵏⵉⵏ ⵏⵉⵖ ⵉⵣⵎⵔⵏ ⴰⴷ ⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙⵏ, ⴰⴼⴰⴷ ⴰⴷ ⵉⵜⵜⵓⵙⴷⵓⵙ ⵓⴼⵔⴰⴳ ⵏⵏⵙⵏ ⵙⴳ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵓⵎⵔⵔⵜ ⵏⵉⵖ ⵜⴰⵎⵔⵔⵓⵜ ⵏ ⵓⴷⵔⵡⵙ, ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ.
• ⴰⵙⴽⴰⵔ ⵏ ⴽⵓ ⴰⵙⵖⵍⴼ ⵏⵏⴰ ⵙ ⵉⵣⵎⵔ ⵓⵙⵡⵓⵔⵉ ⵙⵉⵔⵙ ⴰⴷ ⵉⵙⵖⵓⴷⵓ ⴰⵎⵓⴳⴳⵓ ⴷ ⵉⵙⵓⵔⵙⵏ ⵏ ⵓⴳⴳⵉⴷⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙⵏ ⴷ ⵓⴼⵔⴰⴳ ⵙⴳ ⵓⵙⵔⴼⵓⴼⵏ.
• ⴰⵙⵎⵏⵉⴷ ⵏ ⴽⵓ ⵜⴰⵙⵓⵎⵔⵜ ⵏⵉⵖ ⵜⴰⵏⵏⴰⵢⵜ ⵅⴼ ⵡⴰⵣⵣⵔⴰⴼⵏ ⵏⵏⴰ ⵙ ⵜⵍⵍⴰ ⵜⵡⵓⵔⵉ ⵏⵉⵖ ⵅⴼ ⵉⵙⵏⴼⴰⵔⵏ ⴷ ⵜⵙⵓⵎⴰⵔ ⵏ ⵉⵙⵍⴳⵏⵏ ⵉⵣⴷⵉⵏ ⴷ ⵓⴼⵔⴰⴳ ⵙⴳ ⵓⵙⵔⴼⵓⴼⵏ.

ⵜⴳⴰ ⵜⴼⴰⵜⵉⵜ ⵙⴳ ⵜⴷⵔⴼⵉ, ⴳ ⵓⵏⴰⵎⴽ ⵏ ⵜⵎⵜⵜⴰ 3 ⵏ ⵓⵙⵍⴳⵏ 76-15, ⴽⵔⴰⵢⴳⴰⵜ ⵡⴰⵏⴰⵡ ⵙⴳ ⵡⴰⵏⴰⵡⵏ ⵏ ⵡⴰⵎⵎⴰⵥ ⵏ ⵓⴳⴳⵉⴷⵏ ⵏⵉⵖ ⴰⴽⵔⴰⴼ ⵏⵏⵙⵏ ⵏⵉⵖ ⴰⵙⵔⵓⵙ ⵏⵏⵙⵏ ⴳ ⴽⵔⴰ ⵏ ⵡⴰⵏⵙⴰ, ⴰⵎⴰⵜⴰⵢ ⵏⵉⵖ ⴰⵎⵥⵍⴰⵢ, ⵏ ⵡⴰⵎⵎⴰⵥ ⵖ ⵓⵔ ⴰⵙⵏ ⵉⵜⵜⵡⴰⴼⴽⴰ ⵓⵣⵔⴼ ⵏ ⵓⴼⵓⵖ ⵙⴳⵉⵙ ⴽⵓⴷⵏⵏⴰ ⵔⴰⵏ, ⵉⵖ ⵉⴳⴰ ⵙ ⵡⴰⵏⴰⴹ ⵏ ⴽⵔⴰ ⵏ ⵜⵏⴱⴰⴹⵜ ⵜⵓⵣⵔⵉⴼⵜ ⵏⵉⵖ ⵜⴰⵎⵙⵙⵓⴳⵓⵔⵜ ⵏⵉⵖ ⵜⵉⵏⴱⴰⴹⵉⵏ ⴰⴽⴽⵯ ⵢⴰⴹⵏⵉⵏ.

ⵉⴱⴷⴷ ⵓⵎⵢⴰⵙⵙⴰ ⵉⵏⴳⵔ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵙ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⵙⴳⴷⵍ ⵏ ⵓⵙⵔⴼⵓⴼⵏ ⵏⵏⵉ ⵉⵜⵜⵡⴰⵙⵔⴰⵙⵏ ⵙ ⵓⵎⵙⴰⵙⴰ ⴰⴽⴷ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵓⵎⵔⵔⵜ ⵏⵉⵖ ⵜⴰⵎⵔⵔⵓⵜ ⵏ ⵓⴷⵔⵡⵙ, ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ (OPCAT), ⵅⴼ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ ⴷ ⵜⵡⵉⵙⵉ ⵉⵜⵜⵓⵎⵔⴰⵔⴰⵏ ⵙ ⵜⴱⵔⵉⴷⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴽⵓⴷⵏⵏⴰ ⴰⵙ ⵉⵙⵙⵓⵜⵔ ⵎⴰⵢⴰ ⵏⵏ.

ⵉⵍⵍⴰ ⴼ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵉⵜⵜⵓⵙⵎⴰⴳⵍⵏ ⵙ ⵓⵙⵡⵓⴷⴷⵓ ⵏ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴰⴷ ⵙⵙⵓⵊⴷⵏⵜ ⵉ ⵉⴳⵎⴰⵎⵏ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴽⵓⴷⵏⵏⴰ ⴰⵙⵏⵜ ⵙⵙⵓⵜⵔⵏ:

• ⵇⴰⵃ ⵓⵎⵍⴰⵏ ⵉⵣⴷⵉⵏ ⵙ ⵜⵓⴳⵜ ⵏ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴷ ⵡⴰⵏⵙⵉⵡⵏ ⵏⵏⵙⵏ ⴷ ⵓⵟⵟⵓⵏ ⵏ ⵓⴳⴳⵉⴷⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙⵏ ⵍⵍⴰⵏⵉⵏ ⴳ ⵉⴷⵖⴰⵔⵏ ⴰⴷ ;
• ⵇⴰⵃ ⵓⵎⵍⴰⵏ ⵣⴷⵉⵏⵉⵏ ⵙ ⵓⵎⵓⴳⴳⵓ ⵏ ⵓⴳⴳⵉⴷⵏ ⴰⴷ ⴷ ⵜⵎⵙⵓⵜⴰⵍ ⵏ ⵡⴰⵎⵎⴰⵥ ⵏⵏⵙⵏ ;
• ⴰⴷⴰⴼ ⵙ ⵇⴰⵃ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴷ ⵜⵓⵚⴽⵉⵡⵉⵏ ⵏⵏⵙⵏ ⴷ ⵡⴰⵏⵙⵉⵡⵏ ⵏⵏⵙⵏ ;
• ⵜⴰⴷⵔⴼⵉ ⵏ ⵓⵙⵜⴰ ⵏ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⵏⵏⵉ ⵔⴰⵏ ⴰⵙⵉⵔⵙⵏ ⵔⵣⴼⵏ ⴷ ⵓⴳⴳⵉⴷⵏ ⵏⵏⵉ ⵔⴰⵏ ⴰⴷ ⵎⵏⵉⴳⴳⵉⵔⵏ ;
• ⵉⴳⵉ ⵏ ⵉⵏⵎⵓⵇⵇⴰⵔⵏ ⵉⵎⵥⵍⴰⵏ ⴰⴽⴷ ⵓⴳⴳⵉⴷⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙⵏ ⴱⵍⴰ ⵜⵉⵍⵉⵜ ⵏ ⵉⵏⴰⴳⴰⵏ ⴷ ⵓⵎⵏⵉⵍⵉ ⴷⵉⴷⵙⵏ ⵙ ⵜⵡⵉⵍⴰ ⵜⵓⴼⵔⵉⴷⵜ. ⵜⵣⵎⵔ ⵜⵙⵇⵇⵉⵎⵜ, ⴽⵓⴷⵏⵏⴰ ⵉⴳⴰ ⴰⵙⵓⵖⵏ, ⴰⴷ ⵜⵙⵙⵓⵜⵔ ⴰⵎⵢⴰⵡⴰⵙ ⵏ ⴽⵔⴰ ⵏ ⵓⵎⵙⵙⵓⵖⵍ ⵏⵉⵖ ⴽⵔⴰⵢⴳⴰⵜ ⵓⴳⴳⵉⴷ ⵙ ⵜⴰⵏⵏⴰⵢ ⴰⴼⵓⵍⴽⵉ ⴳ ⵜⵉⵍⵉⵜ ⵏⵏⵙ.

ⴷⴰ ⵜⵜⵓⵙⴱⵖⵔⵏ ⵓⴳⴳⵉⴷⵏ, ⵉⵖ ⴳⴰⵏ ⵉⵏⵉⵎⴰⵏⵏ ⵏⵉⵖ ⵉⵡⵏⴳⵉⵎⵏ, ⵏⵏⵉ ⵉⵙⵙⵉⵡⴹⵏ ⵉ ⵢⵉⵎⵉⵙ ⴽⵔⴰ ⵏ ⵓⵎⵍⴰⵏ ⵏⵉⵖ ⵉⵙⴼⴽⴰ, ⵙⴳ ⵓⴼⵔⴰⴳ ⵏⵏⵉ ⵉⵜⵜⵓⵖⵜⴰⵙⵏ ⵉ ⵉⵎⵙⵙⵉⵡⵉⴹⵏ ⵙ ⵓⵎⵙⴰⵙⴰ ⴰⴽⴷ ⵉⴱⴹⵉⵢⵏ ⵏ ⵜⵎⵜⵜⴰ 9-82 ⵏ ⵓⵙⵍⴳⵏ ⵓⵟⵟⵓⵏ 01.22 ⵉⵣⴷⵉⵏ ⵙ ⵜⴱⵔⵉⴷⵜ ⵜⴰⵏⴱⴽⴰⴹⵜ.
ⴷⴰ ⵜⵜⵡⴰⵏⵜⴰⵍⵏ ⵓⵎⵍⴰⵏ ⵉⵜⵜⵡⴰⴼⴽⴰⵏ ⵉ ⵢⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ. ⵉⵜⵜⵡⴰⵙⴳⴷⵍ ⴰⴷ ⵜⵜⵡⴰⴼⵙⴰⵔⵏ ⴽⵔⴰⵢⴳⴰⵜ ⵓⵎⵍⴰⵏ ⵉⵏⵉⵎⴰⵏⵏ ⴱⵍⴰ ⵜⴰⵢⵢⵉⵀⵜ ⵜⴰⵙⴼⴼⵏⵥⴰⵢⵜ ⵏ ⵓⴳⴳⵉⴷ ⴳⴰⵏⵉⵏ ⴰⵎⵏⵜⴰⵢ ⵙ ⵓⵎⵍⴰⵏ ⴰⵏⵏ ⵏⵉⵡ ⴰⵎⴰⵔⵉ ⵏⵏⵙ ⴰⵍⵓⴳⴰⵏ, ⵏⵉⵖ ⵜⵜⵓⵙⵎⵔⵙⵏⵜ ⵜⵎⵔⵔⵓⵜⵉⵏ ⵜⵜⵡⴰⵙⴹⵕⵚⵏⵉⵏ ⴳ ⵓⵎⴰⴳⵔⴰⴷ 446 ⵏ ⵜⴳⵔⵓⵎⵎⴰ ⵏ ⵓⵙⵍⴳⵏ ⴰⵏⴱⴽⴰⴹ.
ⵓⵔ ⴷⴰ ⵉⵜⵜⵓⵎⵔⵔⴰⵜ ⴽⵔⴰ ⵏ ⵓⴳⴳⵉⴷ, ⴰⵏⵉⵎⴰⵏ ⵏⵉⵖ ⴰⵡⵏⴳⵉⵎ, ⵉⴷⴷⵖ ⵉⵙⵙⵉⵡⴹ ⴽⵔⴰ ⵏ ⵓⵎⵍⴰⵏ ⵉⵎⵉⴷⵉⵜⵏ ⵏⵉⵖ  ⵉⵔⵎⵉⴷⵉⵜⵏ.
ⴰⵔ ⵉⵜⵜⵓⵎⵔⵔⴰⵜ ⵓⴳⴳⵉⴷ ⵏⵏⴰ ⵉⵙⵙⵉⵡⴹⵏ ⵉ ⵢⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴽⵔⴰ ⵏ ⵓⵎⵍⴰⵏ ⵉⵔⵎⵉⴷⵉⵜⵏ ⵉⵖ ⵜⵏ ⵉⴼⵙⵔ ⵙ ⴽⵔⴰⵢⴳⴰⵜ ⵏ ⵜⴱⵔⵉⴷⵜ, ⵙ ⵜⵎⵔⵔⵓⵜⵉⵏ ⵜⵜⵓⵙⴹⵕⵚⵏⵉⵏ ⴳ ⵓⵎⴰⴳⵔⴰⴷ 445 ⵏ ⵜⴳⵔⵓⵎⵎⴰ ⵏ ⵓⵙⵍⴳⵏ ⴰⵏⴱⴽⴰⴹ.

ⴷⴰ ⵉⵜⵜⴼⵊⵊⵉⵊ ⵓⵎⵣⴷⴰⵢ ⵏ ⵢⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵉⴳⵎⴰⵎⵏ ⵏⵏⵙ ⵙ ⵓⴼⵔⴰⴳ ⵉⵜⵜⵓⵙⵙⵓⵖⵏⵏ, ⵙ ⵜⵎⵍⴷⴰ ⵏ ⵉⴳⵉ ⵏⵏⵙⵏ ⵉ ⵜⵙⵎⵉⴳⴰⵍ ⵏⵏⵉ ⵙ ⵜⵜⵓⵙⵖⵍⴼⵏ, ⵙⴳ ⴽⵔⴰⵢⴳⴰⵜ ⴰⴽⵛⵛⵓⵎ ⵏⵉⵖ ⴰⴽⵕⴰⵥ ⵏⵏⵉ ⴰⵙⵏ ⵉⵜⵜⵓⴳⴰⵏ, ⵎⴰⵢⴰ ⵏⵏ ⴰ ⵅⴼ ⵉⵅⵚⵚⴰ ⴰⴷ ⵓⵔ ⵜⵜⵢⴰⵎⴰⵥⵏ ⵡⴰⵍⴰ ⴰⴷ ⴷⵉⴷⵙⵏ ⵉⵜⵜⵓⴳⴰ ⵓⵙⴰⴳⴳⵯ ⵡⴰⵍⴰ ⴰⴷ ⵜⵜⵡⴰⴹⴼⴰⵕⵏ ⵙ ⵜⵎⵏⵜⵉⵍⵉⵜ ⵏ ⵜⴰⵏⵏⴰⵢⵉⵏ ⵏⵏⵙⵏ ⵏⵉⵖ ⵜⵉⵎⵙⴽⵔⵉⵏ ⵏⵏⵉ ⴳⴰⵏ.
ⵎⴽⴷⴰ ⵓⵔ ⵉⵜⵜⵡⴰⵣⵎⴰⵔ ⴰⴷ ⵜⵜⵓⵙⴱⵉⴷⴷⵏⵜ ⵜⵙⵎⵉⴳⴰⵍ ⵏ ⵉⴳⵎⴰⵎⵏ ⵏ ⵢⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴽⵓⴷⵏⵏⴰ ⴷⴰ ⵜⵏⵜ ⵙⴽⴰⵔⵏ, ⴰⴱⵍⴰ ⴳ ⵡⴰⴷⴷⴰⴷⵏ ⵉⵜⵜⵡⴰⵚⴹⵕⵚⵏ ⴳ ⵜⵎⵜⵜⴰ 39 ⵏ ⵓⵙⵍⴳⵏ 76.15 ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.